ភ្នំពេញ៖ លោក ឃួង ស្រេង អភិបាលរាជធានីភ្នំពេញបានព្រមានចាត់វិធានការតាមផ្លូវច្បាប់ចំពោះពលរដ្ឋរស់នៅត្រង់ចំណុចគោលដៅផ្លូវជាតិលេខ ៤ ដែលមិនគោរពវិធានការរដ្ឋបាលនៃការបិទខ្ទប់
ខណៈពេលលោកចុះពិនិត្យ ក្រោយមានរបាយការណ៍ថា តំបន់នោះនៅតែមានមនុស្សចេញចូលច្រើន។
ការប្រកាសយ៉ាងដូច្នេះបានធ្វើឡើងក្នុងពេលលោកបានដឹកនាំកម្លាំងចុះពិនិត្យស្ថានភាពចរាចរណ៍ និងច្រកចេញ-ចូលរាជធានីភ្នំពេញនាថ្ងៃ ២១ មេសានេះ នៅត្រង់ចំណុចគោលដៅផ្លូវជាតិលេខ ៤ ក្នុងមូលដ្ឋានខណ្ឌពោធិ៍សែនជ័យ និងខណ្ឌកំបូលរាជធានីភ្នំពេញ។
ថ្លែងក្នុងឱកាសនោះ លោក ឃួង ស្រេង បានបញ្ជាក់ថា៖ «រដ្ឋបាលរាជធានីភំ្នពេញសូមធ្វើការណែនាំជាថ្មីម្ដងទៀត សូមបងប្អូនដែលពុំមានភារកិច្ចចាំបាច់កុំចេញក្រៅផ្ទះ។ ដើម្បីការពារខ្លួនយើង គ្រួសារយើង និងបងប្អូនប្រជាជាតិយើង ចូលរួមទាំងអស់គ្នាទើបអាចទប់ស្កាត់ការរីករាលដាលនៃជំងឺកូវីដ ១៩ បានយ៉ាងមានប្រសិទ្ធភាព»។
លោកបានសង្កត់ធ្ងន់ថា បើនៅតែបំពានបម្រាម រដ្ឋបាលរាជធានីភ្នំពេញនឹងអនុវត្តតាមសេចក្ដីសម្រេច ស្ដីពីការពិន័យអន្តរការណ៍ចំពោះបុគ្គលដែលមិនគោរពវិធានការរដ្ឋបាល។
កាលពីយប់ថ្ងៃទី ១៤ ខែមេសា រដ្ឋាភិបាលបានប្រកាសសម្រេចបិទខ្ទប់រាជធានីភ្នំពេញ និងក្រុងតាខ្មៅ នៃខេត្តកណ្តាល រយៈពេល ២ សប្ដាហ៍ ដើម្បីទប់ស្កាត់ការឆ្លងរាលដាលជំងឺកូវីដ ១៩។ ក៏ប៉ុន្តែការអនុវត្តគិតចាប់ពីថ្ងៃទី ១៥ ខែមេសា រហូតដល់ថ្ងៃទី ២៨ ខែមេសា៕