ភ្នំពេញ៖ លោកឃួង ស្រេង អភិបាលសាលារាជធានីភ្នំពេញបានសម្រេចផ្អាកដំណើរការជាបណ្តោះអាសន្នមជ្ឈមណ្ឌលពាណិជ្ជកម្មផ្សារអូរឫស្សីរយៈពេល ២ សប្តាហ៍បន្ទាប់ពីមានអាជីវករនិងកម្លាំងសន្តិសុខផ្សារមួយចំនួនបានឆ្លងវីរុសកូវីដ ១៩ ក្នុងព្រឹត្តិការណ៍សហគមន៍ ២០កុម្ភៈ។
ក្នុងលិខិតជូនដំណឹងរបស់រដ្ឋបាលរាជធានីភ្នំពេញ ដែលចុះហត្ថលេខាដោយ លោក ឃួង ស្រេង កាលពីថ្ងៃទី០៣ ខែមេសា ឆ្នាំ២០២១ បានលើកឡើងថា ក្នុងរយៈពេលប៉ុន្មានថ្ងៃចុងក្រោយនេះ មានអាជីវករនិងសន្តិសុខផ្សារអូរឫស្សីបានឆ្លងវីរុសកូវីដ១៩ ដែលស្ថានភាពបានរីករាលដាលជាបន្តបន្ទាប់នៅច្រើនតូបនិងទីតាំងខុសៗគ្នាក្នុងបរិវេណផ្សារគួរឱ្យបារម្ភនិងចាំបាច់ត្រូវមានវិធានការសុខាភិបាលដើម្បីទប់ស្កាត់ជាបន្ទាន់។
លោកឃួង ស្រេង បានបញ្ជាក់ថា ៖ «ចំពោះមុខរដ្ឋបាលរាជធានីភ្នំពេញ សូមផ្អាកដំណើរការជាបណ្តោះអាសន្នមជ្ឈមណ្ឌលពាណិជ្ជកម្មផ្សារអូរឫស្សី រយៈពេល ១៤ ថ្ងៃ គិតចាប់ពីថ្ងៃទី ០៤ ដល់ថ្ងៃទី ១៧ ខែមេសា ដើម្បីបង្ការនិងទប់ស្កាត់ការឆ្លងរីករាលដាលវីរុសកូវីដ១៩ទៅដល់អាជីវករ អតិថិជន ក៏ដូចជា ប្រជាពលរដ្ឋដែលចេញ-ចូលផ្សារនេះ»។
ក្នុងអំឡុងពេលនៃការផ្អាកដំណើរការជាបណ្តោះអាសន្ននេះដែរ រដ្ឋបាលរាជធានីភ្នំពេញធានារ៉ាប់រងលើការងារសន្តិសុខ និង សុវត្ថិភាពលើសម្ភារ និងអីវ៉ាន់គ្រប់ប្រភេទរបស់បងប្អូនអាជីករ ដែលបានរក្សាទុកក្នុងតូបនីមួយៗ មិនឱ្យមានការបាត់បង់ និងមិនតម្រូវឱ្យមានការបង់ថ្លៃសេវាទៅឱ្យភាគីពាក់ព័ន្ធណាមួយឡើយ៕