ភ្នំពេញៈ ដើម្បីទប់ស្កាត់ការរីករាលដាលជំងឺកូវីដ ១៩ នៅក្នុងភូមិសាស្ត្ររាជធានីភ្នំពេញលោក ឃួង ស្រេង អភិបាលសាលារាជធានីភ្នំពេញ នៅថ្ងៃនេះបានសម្រេចចេញនូវវិធានការរដ្ឋបាលឱ្យផ្អាកអាហារដ្ឋានពេលយប់ជាបណ្តោះអាសន្ន ដែលមានថិរវេលាអនុវត្តរយៈពេល ២ (ពីរ) សប្ដាហ៍ គិតចាប់ពីថ្ងៃទី ១ ខែ មេសា ឆ្នាំ ២០២១ នេះ រហូតដល់ថ្ងៃទី ១៤ ខែ មេសា ឆ្នាំ ២០២១។
លោក ឃួង ស្រេង បានបញ្ជាក់នៅថ្ងៃនេះថា៖ «ត្រូវផ្អាកជាបណ្តោះអាសន្ននូវសកម្មភាពអាជីវកម្មចំពោះតូបអាហារ អាហារដ្ឋាន ភោជនីយដ្ឋាន ហាងកាហ្វេ ហាងភេសជ្ជៈ និងភោជនីយដ្ឋាននៅតាមសណ្ឋាគារ។ល។ ដែលទទួលអតិថិជនចូលមកទទួលទាន អាហារភេសជ្ជៈ ឬទទួលទានគ្រឿងស្រវឹងនៅចន្លោះម៉ោង ៨ យប់ ដល់ម៉ោង ៥ ព្រឹកជាកំហិត»។ ក៏ប៉ុន្តែទីតាំងអាជីវកម្មទាំងនោះអាចលក់ជាលក្ខណៈវេចខ្ចប់បាន។
ជាមួយនេះសាលារាជធានីភ្នំពេញ ក៏បានសម្រេចផ្អាកជាបណ្តោះអាសន្ននូវការប្រមូលផ្តុំ ឬការជួបជុំគ្នាទទួលទានអាហារ ភេសជ្ជៈ ឬទទួលទានគ្រឿងស្រវឹង និងការធ្វើចរាចរណ៍នៅចន្លោះម៉ោងដដែលនេះផងដែរ។
ការសម្រេចនេះបានតម្រូវឱ្យនាយករដ្ឋបាលសាលារាជធានីភ្នំពេញ ស្នងការដ្ឋាននគរបាលរាជធានីភ្នំពេញ បញ្ជាការដ្ឋានកងរាជអាវុធហត្ថរាជធានីភ្នំពេញរដ្ឋបាលខណ្ឌទាំង ១៤ មន្ទីរ-អង្គភាពជំនាញ ជុំវិញរដ្ឋបាលរាជធានីភ្នំពេញ អនុវត្តចាប់ពីថ្ងៃចុះហត្ថលេខានេះតទៅ៕
វីដេអូ៖