.jpg)
ភ្លើងឆេះព្រៃរាលដាលដល់ស្ពានកាលពីថ្ងៃ ២១ កុម្ភៈ។ រូបថត សហការី
ព្រះវិហារៈ អភិបាលស្រុកសង្គមថ្មីខេត្តព្រះវិហារ លោក ជុំ ពុយ បានជំរុញឲ្យអាជ្ញាធរមូលដ្ឋានពន្លឿនការសាងសង់ស្ពានឈើឆ្លងកាត់ស្ទឹងស្ដៅជាបណ្ដោះអាសន្នឡើងវិញ បន្ទាប់ពីមានករណីភ្លើងឆេះព្រៃបង្កឲ្យឆេះរាលដាលស្ពានឈើចាស់មួយដែលឆ្លងកាត់ស្ទឹងនេះនៅចំណុចភូមិត្រពាំងធ្លក ឃុំស្តៅ កាលពីថ្ងៃទី ២១ ខែ កុម្ភៈ ឆ្នាំ ២០២០។
លោក ពុយ និយាយថាការដុតព្រៃដើម្បីស្ទាក់ចាប់សត្វដោយខ្វះការប្រុងប្រយ័ត្នរបស់អ្នកភូមិមួយចំនួនបានបង្កឲ្យមានភ្លើងឆេះព្រៃ ហើយរាលដាលឆេះដល់ស្ពាន ដូច្នេះដើម្បីសម្រួលមធ្យោបាយធ្វើដំណើររបស់ពលរដ្ឋ និងអាជ្ញាធរមូលដ្ឋានក្នុងការឆ្លងកាត់ស្ទឹងខាងលើនេះ «យើងចាំបាច់ត្រូវការសាងសង់ស្ពានឈើថ្មីមួយ ដើម្បីប្រើប្រាស់ជាបណ្ដោះអាសន្ន» ព្រោះនៅប៉ុន្មានខែដ៏ខ្លីខាងមុខនេះមន្ទីរសាធារណការ និងដឹកជញ្ជូនខេត្តព្រះវិហារមានគម្រោងសាងសង់ស្ពានបាឡេ (ស្ពានដែក) ឆ្លងកាត់ស្ទឹងនេះ។
ជាមួយគ្នានេះលោក ពុយ បានអំពាវនាវសុំឲ្យពលរដ្ឋបញ្ឈប់ជាបន្ទាន់នូវសកម្មភាពរុករកអនុផលព្រៃឈើ និងចាប់សត្វព្រៃ ដោយប្រើភ្លើង ខណៈរដូវប្រាំងដែលកំពុងរាំងស្ងួតនេះ ងាយបណ្ដាលឲ្យមានភ្លើងឆេះព្រៃកើតឡើងដែលប៉ះពាល់ដល់ទ្រព្យសម្បត្តិសាធារណៈ។
បើតាមលោក ជួន មឿន អធិការស្រុកសង្គមថ្មីករណីភ្លើងឆេះរាលឆេះស្ពានឈើចាស់ឆ្លងកាត់ស្ទឹងស្ដៅក្នុងភូមិសាស្ត្រខាងលើនេះបានកើតឡើងដំបូងនៅវេលាម៉ោង ១០:៣០ នាទីព្រឹកថ្ងៃទី ២១ ខែកុម្ភៈ ប៉ុន្តែត្រូវកម្លាំងនគរបាលប៉ុស្តិ៍រដ្ឋបាលឃុំស្ដៅ និងប្រជាពលរដ្ឋរួមគ្នាពន្លត់ឲ្យរលត់អស់ទៅវិញ។
លុះដល់ម៉ោង ២:៣០ នាទីរសៀលថ្ងៃដដែល ក៏ស្រាប់តែមានភ្លើងឆេះព្រៃកើតឡើងម្ដងទៀតនៅក្បែរចំណុចកើតហេតុខាងលើនោះ ហើយក្រុមអ្នកភូមិ និងអាជ្ញាធរបាននាំគ្នាពន្លត់ភ្លើងព្រៃនោះសាជាថ្មីម្ដងទៀត ប៉ុន្តែនៅលើកទី ២ នេះកំសួលភ្លើងឆេះខ្លាំងជាងមុន ហើយបានរាលដាលទៅដល់ក្រោមស្ពានព្រែកស្ដៅ។
លោក មឿន ថ្លែងថា៖ «ដោយរថយន្តពន្លត់អគ្គិភ័យយើងខូចមិនអាចចេញទៅជួយអន្តរាគមន៍បាន កម្លាំងនគរបាលយើង និងអ្នកភូមិសរុបគ្នា ៣០ នាក់បាននាំគ្នាប្រើប្រាស់ធុងស្ពេត្រូដងទឹកទៅជះពន្លត់ និងកាប់មែកឈើទៅវាយពន្លត់ រហូតដល់ភ្លើងរលត់អស់ជាលើកទី ២។ ប៉ុន្តែតំបន់នោះសម្បូរទៅដោយព្រៃឫស្សីជាហេតុនាំឲ្យសំណល់រងើកភ្លើងក្នុងគុម្ពឫស្សីមួយចំនួនបានបង្កជាអណ្ដាតភ្លើងឆាបឆេះជាថ្មីម្ដងទៀត គឺនៅវេលាម៉ោង ៦ ល្ងាចក្នុងថ្ងៃដដែលនោះបណ្ដាលឲ្យរាលឆេះស្ពានឈើតែម្ដង»។
ជុំវិញការឆេះស្ពានឈើនេះដែរលោក BEN DEVIS សកម្មជនការពារព្រៃឈើ ដែលទាំងគ្រួសារលោកកំពុងរស់នៅក្នុងដែនជម្រកសត្វព្រៃភ្នំត្នោត-ភ្នំពកក្នុងខេត្តព្រះវិហារបានប្រាប់ភ្នំពេញប៉ុស្តិ៍ថា ប្រជាពលរដ្ឋនៅទីនេះហាក់ដូចជាមិន «ខ្វល់» ចំពោះសារាចរណែនាំរបស់ក្រសួងបរិស្ថាន និងក្រសួងកសិកម្ម រុក្ខាប្រមាញ់ និងនេសាទដែលបានហាមដាច់ខាត ការដុតព្រៃក្នុងគោលបំណងស្ទាក់ចាប់សត្វព្រៃ ឬពង្រីកផ្ទៃដីកសិកម្ម ពិសេសនៅក្នុងរដូវក្ដៅនេះ។
លោក Ben ថ្លែងថា៖ «ខ្ញុំយល់ថា បើអ្នកភូមិគាត់ស្វែងយល់ពីច្បាប់ និងសុវត្ថិភាព ព្រមទាំងសន្តិសុខស្បៀងរបស់ខ្លួននោះករណីភ្លើងឆេះព្រៃនឹងលែងកើតមានតទៅទៀតហើយ។ យើងជាសហគមន៍ការពារព្រៃ យើងរស់ដោយសារធនធានព្រៃឈើ និងសត្វព្រៃ ដូច្នេះយើងគប្បីនាំគ្នាថែរក្សា ការពារ និងអភិរក្សឲ្យបានល្អដោយគ្រប់គ្នាត្រូវគោរពអនុវត្តច្បាប់ និងបទដ្ឋានគតិយុត្តិនានារបស់រដ្ឋ»។
លោក Ben បានបន្តថា មានពលរដ្ឋខ្មែរមួយចំនួនបានចាត់ទុកករណីភ្លើងឆេះព្រៃរាលដាលឆេះស្ពាននេះគឺជាទង្វើរបស់ក្រុមជនប្រព្រឹត្តបទល្មើសព្រៃឈើ និងសត្វព្រៃក្នុងគោលបំណងគំរាមកំហែងដល់គ្រួសាររបស់លោកឲ្យនាំគ្នាចាកចេញពីតំបន់នោះ ដើម្បីពួកគេងាយស្រួលប្រព្រឹត្តបទល្មើស។
លោក Ben បានបញ្ជាក់ថា៖ «ខ្ញុំ និងក្រុមគ្រួសារក៏មានក្ដីបារម្ភអំពីសុវត្ថិភាពសន្តិសុខដែរ ប៉ុន្តែខ្ញុំនឹងក្រុមគ្រួសារនឹងមិនចាកចេញពីទីនេះទេ ព្រោះយើងស្រឡាញ់ធម្មជាតិ ព្រៃឈើ និងសត្វព្រៃនៅទីនេះ។ ខ្ញុំជឿថាមនុស្សភាគច្រើនលើសលប់នៅក្នុងលោកនេះ ស្រឡាញ់ធម្មជាតិ និងចង់ថែរក្សាការពារធនធានធម្មជាតិដូចជាខ្ញុំដែរ»។
ដោយឡែកនៅខេត្តកំពង់ធំមានសេចក្ដីរាយការណ៍ពីមន្ត្រីកងពន្លត់អគ្គិភ័យកាលពីរសៀលថ្ងៃទី ២៣ ខែកុម្ភៈ ថា មានករណីភ្លើងឆេះជញ្ជ្រាំងស្រូវ រាលឆេះដល់ព្រៃឈើនៅក្បែរបរិវេណតំបន់ប្រាសាទសំបូរព្រៃគុកសរុបជាង ៨០ ហិកតា។
លោក ហាយ គឹមហ៊ន ប្រធានការិយាល័យបង្ការ និងពន្លត់អគ្គិភ័យខេត្តកំពង់ធំបានប្រាប់ភ្នំពេញប៉ុស្តិ៍ថា៖ «ថ្វីបើយើងបានអន្តរាគមន៍បាញ់ពន្លត់ មិនឲ្យឆេះរាលដាលប៉ះពាល់ដល់ប្រាសាទ និងអគារអភិរក្សដ្ឋានសំបូរព្រៃគុក ប៉ុន្តែភ្លើងឆេះជញ្ជ្រាំងស្រូវពីដីស្រែរបស់អ្នកភូមិដ៏ធំនោះបានឆេះរាលដាលប៉ះពាល់ដល់ព្រៃការពារដែលស្ថិតនៅជាប់តំបន់ប្រាសាទសំបូរព្រៃគុក រហូតដល់ ៨៤ ហិកតា»។
លោក គឹមហ៊ន បានបន្តថា នៅក្នុងការពន្លត់ភ្លើងឆេះព្រៃនេះសមត្ថកិច្ចបានប្រើប្រាស់ទឹកអស់ ១០ ឡាន ខណៈអ្នកភូមិ និងមន្ត្រីឧទ្យានុរក្ស ប្រាសាទសំបូរព្រៃគុករាប់សិបនាក់រួមគ្នាប្រើប្រាស់ទឹកធុង និងមែកឈើវាយពន្លត់ភ្លើងកុំឲ្យឆេះរាលដាលដល់ប្រាសាទដោយប្រើប្រាស់រយៈពេលជាង ២ ម៉ោង៕
