The Phnom Penh Post Search

Search form

អភិបាល​រង​ខេត្ត​កូតា​ហ៊្វុនស៊ិនប៉ិច​៣​នាក់ ត្រូវ​​​ផ្លាស់​ចេញ

អភិបាល​រង​ខេត្ត​កូតា​ហ៊្វុនស៊ិនប៉ិច​៣​នាក់ ត្រូវ​​​ផ្លាស់​ចេញ

ភ្នំពេញៈ រដ្ឋាភិបាល​បាន​សម្រេច​ផ្ទេរ​ភារកិច្ច​អភិបាល​រង​ខេត្ត​បី​រូប​មក​ពី​គណបក្ស ហ្វ៊ុន​ស៊ិន​ប៉ិច ដែល​មិន​បាន​ជាប់​អាសនៈ​នៅ​ក្នុង​ការ​បោះ​ឆ្នោត​កន្លង​មក​ឲ្យ​មក​បំពេញ​ការងារ​នៅ​ទីស្តីការ​ក្រសួង​មហាផ្ទៃ​វិញ។

ការ​ប្រកាស​ផ្ទេរ​នេះ ធ្វើ​ឡើង​តាម​រយៈ​អនុក្រឹត្យ​ចំនួន ៣ ចុះ​ថ្ងៃ ទី២៩ ខែ​សីហា ចុះ​ហត្ថលេខា​ដោយ​លោក​នាយក​រដ្ឋ​មន្រ្តី ហ៊ុន សែន។ ក្នុង​អនុក្រឹត្យ​នោះ បាន​សម្រេច​ថា លោក កាន់ វុឌ្ឍី ត្រូវ​ប្តូរ​ពី​អភិបាល​រង​នៃ​គណៈ​អភិបាល ខេត្ត​ព្រះ​វិហារ ឲ្យ​មក​បំពេញ​ការងារ​នៅ​ទីស្តី​ការ​ក្រសួង​មហាផ្ទៃ ហើយ​អ្នក​ត្រូវ​ចូល​ជំនួស​តំណែង​របស់​លោក គឺ លោក លី សារ៉ារិទ្ធិ មាន​ឋានន្តរស័ក្តិ​វរ​មន្រ្តី ថ្នាក់​លេខ ១០។

លោក ចាន់ សាមិន ប្តូរ​ពី​អភិបាល​រង​នៃ​គណៈ​អភិបាល ខេត្ត​កែប ឲ្យ​មក​បំពេញ​ការងារ​នៅ​ទីស្តី​ការ​ក្រសួង​មហាផ្ទៃ ហើយ​អ្នក​ត្រូវ​ជំនួស​តំណែង​របស់​លោក​គឺ លោក ទេព យុទ្ធិ មាន​ឋានន្តរស័ក្តិ​វរ​មន្រ្តី ថ្នាក់​លេខ ៦។

ចំណែក លោក ឌៀប ណារ៉េត ត្រូវ​ប្តូរ​ពី​អភិបាល​រង​នៃ​គណៈ​អភិបាល ខេត្ត​ស្ទឹងត្រែង ឲ្យ​មក​បំពេញ​ការងារ​នៅ​ឯ​ទីស្តីការ​ក្រសួង​មហាផ្ទៃ ហើយ​លោក យូ ប៉ាសិទ្ធិ មាន​ឋានន្តរស័ក្តិ​វរ​មន្រ្តី ថ្នាក់​លេខ ១០ ត្រូវ​ចូល​ជំនួស​តំណែង​របស់​លោក។

ជុំវិញ​ការ​ផ្លាស់​ប្តូរ​នេះ អគ្គ​លេខាធិការ​គណបក្ស ហ្វ៊ុន​ស៊ិន​ប៉ិច លោក ញឹក ប៊ុនឆៃ បាន​ថ្លែង​ថា លោក​មិន​បាន​ដឹង​ច្បាស់​ពី​មូល​ហេតុ​នៃ​ការ​ដក​ហូត​តំណែង​មន្រ្តី​ទាំង​បី​នាក់​នេះ​ទេ តែ​លោក​មាន​ការ​សោក​ស្តាយ ដោយ​លោក​គិត​ថា ពួក​គេ​ទាំង​នោះ សុទ្ធ​តែ​ជា​មនុស្ស​មាន​សមត្ថភាព និង​ធ្វើ​ការងារ​ល្អ​ក្នុង​ជួរ​រដ្ឋាភិបាល។

លោក​គិត​ថា ការ​ផ្លាស់​ប្តូរ​នេះ អាច​ជាប់​ពាក់​ព័ន្ធ​នឹង​រឿង​នយោបាយ​ខ្លះ តែ​មិន​ទាំង​ស្រុង​នោះ​ទេ។

លោក ប៊ុនឆៃ បន្ថែម​ថា៖ «គណបក្ស​នឹង​រៀប​ចំ​កិច្ច​ប្រជុំ ហើយ​ដាក់​លិខិត​ស្នើ​សុំ​ការ​បំភ្លឺ​ពី​ក្រសួង​មហាផ្ទៃ​ឆាប់ៗ​នេះ ជុំវិញ​ការ​ផ្លាស់​ប្តូរ​នេះ»។

អ្នក​នាំ​ពាក្យ​ក្រសួង​មហាផ្ទៃ លោក ខៀវ សុភ័គ បាន​ថ្លែង​ថា លោក​មិន​បាន​ដឹង​លម្អិត​ពី​រឿង​នេះ​ទេ តែ​លោក​ជឿ​ថា ការ​ផ្លាស់​ប្តូរ​នេះ គឺ​ធ្វើ​ឡើង​ដោយ​មាន​ហេតុ​ផល​សមរម្យ៕

អត្ថបទគួរចាប់អារម្មណ៍