.jpg)
ប្រជាពលរដ្ឋចូលរួមស្ដាប់សវនាការនៅអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) កាលពីថ្ងៃម្សិលមិញ។ រូបថត អ.វ.ត.ក
ភ្នំពេញៈ អង្គបុរេជំនុំជម្រះនៃអង្គជំនុំជម្រះវិសាមញ្ញក្នុងតុលាការកម្ពុជា (អវតក) ដែលចាប់ផ្តើមសវនាការមានរយៈពេល ៣ ថ្ងៃ នៅក្នុងសំណុំរឿង ០០៣ ប្រឆាំងនឹង មាស មុត នៅថ្ងៃទី ២៧ ខែ វិច្ឆិកា ឆ្នាំ ២០១៩ នេះ គឺជាសវនាការធ្វើឡើងដើម្បីស្តាប់នូវអំណះអំណាងដោយផ្ទាល់មាត់របស់ភាគីពាក់ព័ន្ធនានាក្នុងសំណុំរឿង ០០៣ ដែលមាន មាស មុត ជាជនត្រូវចោទ។ នេះបើតាម លោក នេត្រ ភក្ត្រា ប្រធានផ្នែកកិច្ចការសាធារណៈនៃ អ.វ.ត.ក. បានបញ្ជាក់កាលពីម្សិលមិញ។
លោក នេត្រ ភក្ត្រា បានថ្លែងថា សវនាការនៅពេលនេះមិនមែនជាសវនាការលើអង្គសេចក្តីពិនិត្យលើភ័ស្តុតាងឡើយ។ ប៉ុន្តែជាសវនាការលើបណ្តឹងឧទ្ធរណ៍ក្នុងសំណុំរឿង ០០៣ ដែលភាគីពាក់ព័ន្ធនានាបានប្តឹងជំទាស់នឹងដីកាដំណោះស្រាយរបស់សហចៅក្រមស៊ើបអង្កេតដែលបានចេញនាពេលកន្លងទៅ។
ជាកិច្ចចាប់ផ្តើមនាពេលនោះប្រធានអង្គជំនុំជម្រះប្រកាសបើកសវនាការជាសាធារណៈ បន្ទាប់មកមានការអានរបាយការណ៍នៃសំណុំរឿងនេះជាសាធារណៈដែលលើកឡើងនូវអង្គហេតុពាក់ព័ន្ធនានា និងប្រវត្តិនីតិវិធីនៃសំណុំរឿង ០០៣ ព្រមទាំងសេចក្តីលម្អិតនៃបណ្តឹងឧទ្ធរណ៍នានាដែលបានដាក់នៅចំពោះមុខអង្គជំនុំជម្រះ។
របាយការណ៍នេះត្រូវបានចេញក្នុងនាមអង្គបុរេជំនុំជម្រះទាំងមូល និងបានដាក់បញ្ចូលទៅក្នុងសំណុំរឿង។ សាធារណជនជាង ៥០០ នាក់ បានចូលរួមស្តាប់សវនាការដែលបើកជាសាធារណៈដោយផ្ទាល់នេះ។
សវនាការនេះបានធ្វើឡើងជាសាធារណៈ នៅពេលដែលចាប់ផ្តើមឧទ្ទេសនាមភាគីនៅក្នុងសំណុំរឿងជូនអង្គជំនុំជម្រះ នៅពេលដែលអង្គជំនុំជម្រះអានសេចក្តីរាយការណ៍អំពីសំណុំរឿងនេះ និងនៅពេលចៅក្រមសួរសំណួរផ្សេងៗទៅកាន់ភាគី។
ក្រៅពីនេះអង្គបុរេជំនុំជម្រះនឹងស្តាប់ទឡ្ហីករណ៍ពីភាគីនៅក្នុងសំណុំរឿងនៅក្នុងសវនាការសម្ងាត់វិញ។ សវនាការនឹងបន្តដំណើរការនៅថ្ងៃទី ២៨ និងថ្ងៃទី ២៩ ខែ វិច្ឆិកា ឆ្នាំ ២០១៩ តទៅទៀតអនុលោមទៅតាមដីកាកំណត់កាលវិភាគសម្រាប់សវនាការដែលបានចេញនៅថ្ងៃទី ២៤ ខែតុលា ឆ្នាំ២០១៩។
ជនត្រូវចោទ មាស មុត នៅឯស្រុកសំឡូត ខេត្តបាត់ដំបង កាលពីឆ្នាំ ២០១៥។ ហេង ជីវ័ន
ជាមួយគ្នានេះលោក នេត្រ ភក្ត្រា ប្រធានផ្នែកកិច្ចការសាធារណៈលើកឡើងថា ការដែលនាំឱ្យមានការបើកសវនាការស្តាប់ទឡ្ហីករណ៍ក្នុងសំណុំរឿង ០០៣ នេះគឺដោយសារតែអង្គបុរេជំនុំជម្រះនៃ អ.វ.ត.ក បានទទួលបណ្តឹងឧទ្ធរណ៍ដាក់ដោយសហព្រះរាជអាជ្ញាជាតិនៅថ្ងៃទី ៥ ខែ មេសា ឆ្នាំ ២០១៩។ ទទួលបណ្តឹងឧទ្ធរណ៍ដាក់ដោយសហមេធាវីការពារក្តីឱ្យ មាស មុត នៅថ្ងៃទី ៨ ខែ មេសា ឆ្នាំ ២០១៩ ប្រឆាំងនឹងដីកាដំណោះស្រាយដែលចេញដោយសហចៅក្រមស៊ើបអង្កេតអន្តរជាតិនៅថ្ងៃទី ២៨ ខែ វិច្ឆិកា ឆ្នាំ ២០១៨ នៅក្នុងសំណុំរឿង ០០៣ ដែលបានចោទប្រកាន់ មាស មុត។
ជាមួយគ្នានេះក៏មានបណ្តឹងឧទ្ធរណ៍ដាក់ដោយសហព្រះរាជអាជ្ញាអន្តរជាតិ នៅថ្ងៃទី ៨ ខែមេសា ឆ្នាំ ២០១៩ ប្រឆាំងនឹងដីកាលើកលែងចោទប្រកាន់លើ មាស មុត ដែលចេញដោយសហចៅក្រមស៊ើបអង្កេតជាតិនៅថ្ងៃទី ២៨ វិច្ឆិកា ២០១៨ ក្នុងសំណុំរឿង ០០៣។
អង្គបុរេជំនុំជម្រះបានសម្រេចថា សវនាការនឹងត្រូវធ្វើឡើងនៅក្នុងសំណុំរឿង ០០៣ ដើម្បីស្តាប់ទឡ្ហីករណ៍ពីភាគីនៅក្នុងសំណុំរឿង មុនពេលដែលអង្គបុរេជំនុំជម្រះចេញសាលដីកាលើបណ្តឹងឧទ្ធរណ៍ទាំងនោះ។
លោក នេត្រ ភក្ត្រា ថ្លែងថា អង្គបុរេជំនុំជម្រះបានព្យាករថានឹងអាចចេញសាលដីកាលើបណ្តឹង ឧទ្ធរណ៍ប្រឆាំងនឹងដីកាដំណោះស្រាយក្នុងសំណុំរឿង ០០៣ នេះនៅត្រឹមត្រីមាសទី ១ ឆ្នាំ ២០២០ ខាងមុខ ថាតើសំណុំរឿងនេះត្រូវបញ្ជូនទៅជំនុំជម្រះ ឬក៏ទម្លាក់ចោល គឺអាស្រ័យលើការសម្រេចរបស់ចៅក្រុមនៃអង្គបុរេជំនុំជម្រះដែលមានចៅក្រមជាតិ ៣ រូប និងចៅក្រមអន្តរជាតិចំនួន ២ រូប៕
