.jpg)
បុរសម្នាក់ជិះម៉ូតូឆ្លងកាត់អាកាសយានដ្ឋានអន្តរជាតិភ្នំពេញ កាលពីពេលថ្មីៗនេះ។ ហុង មិនា
ភ្នំពេញៈ រដ្ឋលេខាធិការដ្ឋាន អាកាសចរស៊ីវិលបានដាក់ចេញផែនការយុទ្ធសាស្ត្រ ៦ ចំណុច ដើម្បីអភិវឌ្ឍវិស័យអាកាសចរណ៍ស៊ីវិលរយៈពេល ៥ ឆ្នាំពីឆ្នាំ ២០២១ ដល់ឆ្នាំ ២០២៥ ដោយផ្ដោតលើសុវត្ថិភាព សន្តិសុខ កិច្ចសហប្រតិបតិ្តការ សេវាកម្ម ហេដ្ឋារចនាសម្ព័ន្ធ និងធនធានមនុស្ស។
លោក ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរស៊ីវិលកាលពីថ្ងៃចន្ទម្សិលមិញបានដឹកនាំកិច្ចប្រជុំស្តីពីការរៀបចំផែនការយុទ្ធសាស្ត្រអភិវឌ្ឍន៍វិស័យអាកាសចរស៊ីវិលសម្រាប់ឆ្នាំ ២០២១-២០២៥។ ផែនការនេះធ្វើឡើងស្របទៅនឹងគោលការណ៍ណែនាំរបស់រាជរដ្ឋាភិបាលតាមរយៈក្រសួងផែនការដែលបានជំរុញឲ្យគ្រប់ក្រសួង ស្ថាប័ន ត្រូវរៀបចំផែនការអភិវឌ្ឍន៍តាមវិស័យរបស់ខ្លួនឲ្យស្របទៅនឹងយុទ្ធសាស្ត្រចតុកោណរបស់រាជរដ្ឋាភិបាល និងផែនការយុទ្ធសាស្ត្រអភិវឌ្ឍន៍ជាតិ។ នេះបើតាមលោក ស៊ីន ចាន់សិរីវុត្ថា អ្នកនាំពាក្យរដ្ឋលេខាធិការដ្ឋានអាកាសចរស៊ីវិល។
លោក ចាន់សិរីវុត្ថា បានបន្តថា ដើម្បីពង្រឹងសុវត្ថិភាពហោះហើរ ប្រតិបត្តិការអាកាសយានរួមមានការហោះចេញ និងចូលព្រះរាជាណាចក្រកម្ពុជាត្រូវតែរក្សាបាននូវសណ្តាប់ធ្នាប់ ការធានាសុវត្ថិភាព និងការពង្រឹងការគ្រប់គ្រង។ លើសពីនេះទៀតត្រូវជំរុញឲ្យមានការអភិវឌ្ឍក្នុងវិស័យដឹកជញ្ជូនតាមផ្លូវអាកាសប្រកបដោយសុវត្ថិភាពខ្ពស់ស្របតាមបទដ្ឋានអន្តរជាតិ និងមានទំនុកចិត្ត។
លោកបន្តថា៖ «ការពង្រឹងសន្តិសុខអាកាសចរណ៍គឺជាការផ្តល់ទំនុកចិត្តជាលក្ខណៈជាតិ និងអន្តរជាតិដោយត្រូវបានធានាតាមរយៈការអនុវត្តយ៉ាងហ្មត់ចត់នូវបទដ្ឋានជាតិ និងអន្តរជាតិទៅលើសន្តិសុខអាកាសចរស៊ីវិលសំដៅការការពារទប់សា្កត់ និងប្រឆាំងរាល់អំពើរំលោភច្បាប់ដូចជាការបំផ្ទុះអំពើភេរវកម្ម ការបំផ្លិចបំផ្លាញ ការគំរាមកំហែងដល់ជីវិត និងទ្រព្យសម្បត្តិជាដើម»។
អាកាសចរស៊ីវិលនឹងពង្រឹងកិច្ចសហប្រតិបត្ដិការអន្ដរជាតិ និងការតភ្ជាប់ការហោះហើរដើម្បីផ្តល់ជាប្រយោជន៍នៅក្នុងការបង្កើត និងការធ្វើឲ្យមានភាពសុខដុមនីយកម្មរវាងគោលនយោបាយ និងផែនទីមគ្គុទេ្ទសក៍ក្នុងការអភិវឌ្ឍវិស័យអាកាសចរណ៍ស៊ីវិលនៅក្នុងអនុតំបន់ តំបន់ និងពិភពលោក។
លើសពីនេះក៏នឹងមានការពង្រឹងសេវាកម្មនាំផ្លូវអាកាសដោយធានាឲ្យបាននូវការនាំផ្លូវហោះហើរសម្រាប់អាកាសយាន និងសេវាកម្មចរាចរណ៍ដែនអាកាសប្រកបដោយសុវត្ថិភាពខ្ពស់ ធានាបាននូវទំនុកចិត្តក្នុងការផ្តល់សេវាកម្មដោយអនុលោមទៅតាមបទដ្ឋានអន្តរជាតិ និងការអភិវឌ្ឍហេដ្ឋារចនាសម្ព័ន្ធនាំផ្លូវហោះហើរ។
បើតាមលោក ចាន់សិរីវុត្ថា ការអភិវឌ្ឍហេដ្ឋារចនាសម្ព័ន្ធអាកាសយានដ្ឋានក៏ជាយុទ្ធសាស្ត្រមួយដែលត្រូវដើរស្របគ្នាទៅនឹងកំណើនអ្នកដំណើរតាមផ្លូវអាកាស និងធ្វើឲ្យវិស័យអាកាសចរស៊ីវិលឆ្លើយតបបានយ៉ាងល្អចំពោះតម្រូវការនានារបស់អ្នកប្រើប្រាស់។ រដ្ឋលេខាធិការដ្ឋានអាកាសចរស៊ីវិលបានបណ្តុះបណ្តាល និងបំពាក់បំប៉នជំនាញមូលដ្ឋាន មធ្យម ជាន់ខ្ពស់ ប្រកបដោយជំនាញជាក់លាក់ដល់បុគ្គលិករបស់ខ្លួនរួចហើយ។
ដោយសារវិបត្តិជំងឺកូវីដ ១៩ លោកថ្លែងថា រដ្ឋលេខាធិការដ្ឋានអាកាសចរស៊ីវិលក៏នឹងដាក់បញ្ចូលយុទ្ធសាស្ត្របដិវត្តន៍ឧស្សាហកម្ម ៤.០ និងការត្រៀមងើបឡើងវិញ និងការស្ដារបន្ទាប់ពីវិបត្តិកូវីដ ១៩។
លោក ហុង វណ្ណៈ ប្រធាននាយកដ្ឋានសេដ្ឋកិច្ចអន្តរជាតិនៃវិទ្យាស្ថានទំនាក់ទំនងអន្តរជាតិនៅរាជបណ្ឌិត្យសភាកម្ពុជាយល់ឃើញថា យុទ្ធសាស្ត្រដែលបានដាក់ចេញនេះមានលក្ខណៈល្អហើយ ប៉ុន្តែបញ្ហាជាក់ស្ដែងគឺថាទាំងក្រុមហ៊ុនហោះហើរ និងអ្នកដំណើរកំពុងជួបបញ្ហារៀងៗខ្លួននៅទូទាំងពិភពលោក។ ផែនការយុទ្ធសាស្ត្រទាំងនេះអាចអនុវត្តទៅបាន នៅពេលដែលស្ថានភាពពិភពលោកវិលត្រឡប់មករកភាពប្រក្រតីវិញ បន្ទាប់ពីវិបត្តិជំងឺកូវីដ ១៩៕
