.jpg)
លំហាត់សង្គ្រោះចំណាប់ខ្មាំងនៅព្រលានយន្តហោះកន្លងមក។ ហេង ជីវ័ន
ភ្នំពេញៈ រដ្ឋលេខាធិការដ្ឋានអាកាសចរស៊ីវិលនឹងរៀបចំលំហាត់សមយុទ្ធទ្រង់ទ្រាយធំក្នុងការសង្គ្រោះ ចំណាប់ខ្មាំងលើយន្តហោះនៅអាកាសយានដ្ឋានអន្តរជាតិភ្នំពេញនៅថ្ងៃទី ១០ ខែមករា ឆ្នាំ ២០២០។
យោងតាមលិខិតជូនដំណឹងរបស់រដ្ឋលេខាធិការដ្ឋានអាកាសចរស៊ីវិលបានឲ្យដឹងថា កងកម្លាំងប្រដាប់អាវុធរួមទាំងមានយន្តហោះ រថយន្តអគ្គិភ័យ រថយន្តពេទ្យ និងរថយន្តដឹកកងកម្លាំងប្រដាប់អាវុធនឹងចូលរួមក្នុងលំហាត់សមយុទ្ធនៅថ្ងៃនោះ។
លោក ជា អូន អ្នកនាំពាក្យរដ្ឋលេខាធិការដ្ឋាននៃអាកាសចរស៊ីវិលបានឲ្យដឹងថា ការរៀបចំលំហាត់សមយុទ្ធទ្រង់ទ្រាយធំមួយក្រោមប្រធានបទសង្គ្រោះចំណាប់ខ្មាំងលើយន្តហោះនោះ ដើម្បីហ្វឹកហ្វឺនពីការជួយសង្គ្រោះ និងទប់ស្កាត់ហានិភ័យផ្សេងៗដែលអាចកើតមានឡើងជាយថាហេតុ។
លោកថ្លែងថា៖ «លំហាត់សមយុទ្ធទ្រង់ទ្រាយធំមួយនេះគេធ្វើរាល់ ២ ឆ្នាំម្តង ហើយគេធ្វើលំហាត់សមយុទ្ធទ្រង់ទ្រាយធម្មតាទេ។ គោលដៅគេហ្វឹកហាត់ពេលមានគ្រោះអាសន្នមានហានិភ័យអី យើងអាចជួយសង្គ្រោះ និងទប់ស្កាត់ហានិភ័យ ដូចជា មានបញ្ហាធ្លាក់យន្តហោះ ឬក៏មានបញ្ហាគ្រឿងម៉ាស៊ីន ឬលក្ខណៈបច្ចេកទេស ឬក៏បញ្ហាសន្តិសុខផ្សេងៗ»។
លោកបានបន្ថែមថាកាលពីថ្ងៃទី ១៨ ខែធ្នូ ឆ្នាំ ២០១៩ នេះនៅក្នុងអាកាសយានដ្ឋានអន្តរជាតិសៀមរាប ក្រុងសៀមរាប ខេត្តសៀមរាប បាន រៀបចំធ្វើលំហាត់សមយុទ្ធទ្រង់ទ្រាយធំក្នុងគោលបំណងធ្វើការសាកល្បង ហ្វឹកហ្វឺន និងផ្តល់បទពិសោធដល់ស្ថាប័ននានាដែលមានការពាក់ព័ន្ធសំដៅលើកកម្ពស់ការជួយសង្គ្រោះជនរងគ្រោះឲ្យបានទាន់ពេលវេលា នៅពេលមានឧប្បទ្ទវហេតុគ្រោះថ្នាក់ធ្លាក់យន្តហោះដែលអាចកើតមានឡើងជាយថាហេតុ។
យោងតាមសេចក្ដីជូនដំណឹងរបស់លេខាធិការដ្ឋានអាកាសចរស៊ីវិលចុះថ្ងៃទី ៣១ ខែធ្នូ ឆ្នាំ ២០១៩ ផ្ញើជូនលោក ខៀវ កាញារីទ្ធ រដ្ឋមន្ត្រីក្រសួងព័ត៌មាន ដែលទើបផ្សព្វផ្សាយផ្លូវការនៅថ្ងៃទី ៣ ខែមករានេះបានឲ្យដឹងថា ដើម្បីបង្កលក្ខណៈងាយស្រួលក្នុងកិច្ចប្រតិបត្តិការឲ្យបានរលូន និង ទទួលបានជោគជ័យ ដូច្នេះសាធារណជនកុំមានការភ័ន្តច្រឡំពីព្រឹត្តិការណ៍នៅព្រឹកថ្ងៃទី ១០ ខែមករា ឆ្នាំ ២០២០។
សេចក្តីជូនដំណឹងនោះបានបញ្ជាក់ដូច្នេះថា៖ «ខ្ញុំមានកិត្តិយសសូមគោរពជម្រាបជូន ឯកឧត្តម រដ្ឋមន្ត្រី មេត្តាជ្រាបថាយោងអនុសាសន៍ណែនាំរបស់អង្គការអាកាសចរស៊ីវិលអន្តរជាតិតម្រូវឲ្យរដ្ឋជាសមាជិករៀបចំធ្វើលំហាត់សមយុទ្ធទ្រង់ទ្រាយធំនៅរៀងរាល់ ២ ឆ្នាំម្តងនៅក្នុង និងជុំវិញបរិវេណអាកាសយានដ្ឋាន។ សូមរំឭកថានៅក្នុងលំហាត់សមយុទ្ធទ្រង់ទ្រាយធំនៅក្នុងអាកាសយានដ្ឋានអន្តរជាតិសៀមរាប ក្រុងសៀមរាប ខេត្តសៀមរាបមានការដុតប្រេង និងកង់ឡានចាស់ៗ បង្កើតជាអណ្តាតភ្លើង និងផ្សែងខ្មួលខ្មាញ់ជាសិប្បនិម្មិតនៃការធ្លាក់យន្តហោះ៕
