.jpg)
មន្ត្រីពិនិត្យការដ្ឋានសាងសង់ទំនប់ស្តុកទឹក។ រូបថត សហការី
កំពង់ចាមៈ ពីមួយឆ្នាំទៅមួយឆ្នាំកំណើនសីតុណ្ហភាពនៅក្នុងបរិយាកាសបានបង្កឲ្យមានគ្រោះរាំងស្ងួត ដែលនាំមកនូវបញ្ហាប្រឈមចំពោះកង្វះខាតទឹកនៅគ្រប់ទីតំបន់ទូទាំងពិភពលោករួមទាំងកម្ពុជាផងដែរ។ ទន្ទឹមនឹងនេះ រាជរដ្ឋាភិបាលកម្ពុជាតាមរយៈក្រសួងធនធានទឹកបានអភិវឌ្ឍនូវប្រព័ន្ធស្រោចស្រព និងទំនប់អាងស្តុកទឹកនានាជាបន្តបន្ទាប់ ដើម្បីដោះស្រាយបញ្ហាកង្វះទឹកជូនដល់ប្រជាកសិករក្នុងតំបន់ដែលងាយរងគ្រោះ។
លោក អ៊ុំ វិបុល ប្រធានមន្ទីរធនធានទឹក និងឧតុនិយមខេត្តកំពង់ចាមបានឲ្យដឹងថា ភាពរាំងស្ងួតនាប៉ុន្មានឆ្នាំចុងក្រោយនេះបានធ្វើឲ្យប្រជាកសិករប្រមាណជាង ៣ ២០០ គ្រួសារ នៅក្នុងស្រុកព្រៃឈរ និងស្រុកជើងព្រៃជួបការលំបាកយ៉ាងខ្លាំងនៅក្នុងជីវភាពប្រចាំថ្ងៃ ព្រោះការងារបង្កបង្កើនផលស្រូវរបស់ពួកគាត់ជួបប្រឈមបញ្ហាកង្វះទឹកស្រោចស្រព។
លោកបានបន្តថា ដើម្បីលើកស្ទួយជីវភាពរស់នៅរបស់ប្រជាពលរដ្ឋទាំងនេះ រាជរដ្ឋាភិបាលតាមរយៈក្រសួង និងមន្ទីរធនធានទឹកខេត្តកំពង់ចាមបានចុះអន្តរាគមន៍ជីកស្ដារ និងជួសជុលកែលម្អឡើងវិញនូវទំនប់អាងស្តុកទឹក ១ កន្លែងដែលមានទីតាំងស្ថិតនៅជាប់ព្រំប្រទល់រវាងឃុំព្រៃចារ ស្រុកជើងព្រៃ និងឃុំសំរោង ស្រុកព្រៃឈរ។
លោក វិបុល ថ្លែងថា៖ «នៅពេលនេះក្រុមការងារយើងកំពុងសម្រុកធ្វើការងារជីកស្ដារ និងជួសជុលទំនប់អាងទឹកតំបន់ដើម្បីឆ្លើយតបទៅនឹងតម្រូវការចាំបាច់របស់ប្រជាពលរដ្ឋ ៣ ២១៣ គ្រួសារ នៅក្នុងឃុំ-ស្រុកទាំង ២ នេះ។ ទំនប់អាងស្ទាក់ទឹកតំបន់នេះមានអានុភាពអាចស្តុកទឹកបានរហូតដល់ ១៣ លានម៉ែត្រគុប ដែលអាចផ្គត់ផ្គង់ទឹកដល់ដីស្រែចម្ការប្រមាណជាង ៣ ០០០ ហិកតានៅក្នុងតំបន់នោះ»។
លោក វិបុល បានថ្លែងថាដំណើរការជីកស្ដារ និងជួសជុលឡើងវិញនូវទំនប់អាងទឹកតំបន់នេះនឹងត្រូវរួចរាល់ជាស្ថាពរនៅក្នុងខែកញ្ញាខាងមុខនេះជាមួយការស្ថាបនានូវសំណង់សិល្បការ និងទ្វារទឹកចំនួន ៣ ព្រមទាំងរៀបចំខ្នងទំនប់ដែលមានប្រវែង ៤ គីឡូម៉ែត្រឲ្យក្លាយជាផ្លូវសម្រាប់សម្រួលដល់ការដឹកជញ្ជូនកសិផលរបស់ប្រជាកសិករក្នុងតំបន់នោះ។
លោក អ៊ុន ចាន់ដា អភិបាលខេត្តកំពង់ចាមបានឲ្យដឹងនៅពេលទំនប់អាងស្ទាក់ទឹកតំបន់នេះត្រូវបានជីកស្ដារ និងជួសជុលរួចរាល់ជាស្ថាពរហើយនោះ វាមិនគ្រាន់តែលើកកម្ពស់ជីវភាពរស់នៅរបស់ប្រជាពលរដ្ឋក្នុងតំបន់ខាងលើនេះ តាមរយៈការធ្វើកសិកម្មដាំដុះដំណាំស្រូវ និងបន្លែបង្ការប៉ុណ្ណោះទេ ថែមទាំងជួយកាត់បន្ថយនូវការចំណាយថវិកាលើការដឹកជញ្ជូនកសិផលផងដែរ។
លោកថ្លែងថា៖ «រដ្ឋបាលខេត្តយើងមានគម្រោងប្រែក្លាយទំនប់អាងស្ទាក់ទឹកតំបន់ទៅជាកន្លែងកម្សាន្តសប្បាយរបស់ប្រជាពលរដ្ឋក្នុងខេត្តកំពង់ចាមផងដែរនៅពេលទំនប់អាងស្ទាក់ទឹកនេះត្រូវបានស្ដារ និងជួសជុលរួច។ អ៊ីចឹងទេ វាមិនគ្រាន់តែផ្ដល់ផលប្រយោជន៍ចំពោះតែវិស័យកសិកម្មទេ ថែមទាំងវិស័យទេសចរណ៍នឹងដឹកជញ្ជូនផងដែរ ព្រោះខ្នងទំនប់ទាំងសងខាងគឺជាផ្លូវដែលអាចចរាចរណ៍ដឹកកសិផល»។ កម្ពុជាមានប្រជាពលរដ្ឋប្រមាណជិត ៨០ ភាគរយជាកសិករ៕
