អាជីវករជាង ២០ នាក់ តំណាងឲ្យអាជីវករ ដែលជួលតូបលក់នៅផ្សារបុរីកីឡាប្រមាណ ៧០ នាក់ នៅថ្ងៃទី ១១ ខែឧសភានេះ បានដាក់ញត្តិទៅអាជ្ញាធរខណ្ឌ ៧ មករា ជំនួសឲ្យការប្រមូលផ្តុំគ្នាតវ៉ាដែលបានគ្រោងទុក ដើម្បីទាមទារឲ្យម្ចាស់ផ្សារ បញ្ចុះតម្លៃជួលតូប ៥០ ភាគរយយៈពេល ៦ខែ នាអំឡុងរងផលប៉ះពាល់ដោយសារជំងឺកូវីដ ១៩។
អាជីវករម្នាក់ដែលប្រាប់ឈ្មោះត្រឹម ជាង រឿន បាននិយាយថា តាមគម្រោងក្រុមអាជីវករទាំងអស់ គ្រោងនឹងប្រមូលផ្តុំគ្នានៅមុខផ្សារបុរីកីឡា ដើម្បីធ្វើបាតុកម្មទាមទារឲ្យម្ចាស់ផ្សារ បញ្ចុះតម្លៃ ៥០ ភាគរយ។ ប៉ុន្តែលោកថា ការប្រមូលផ្តុំគ្នា ត្រូវបានលុបចោល ដោយគ្រាន់តែនាំគ្នាប្រមូលស្នាមមេដៃ ពីអាជីវករទាំងអស់ ដើម្បីដាក់ញត្តិទៅអាជ្ញាធរខណ្ឌ ៧ មករា តាមការទាមទាររបស់អាជ្ញាធរវិញ ដោយអះអាងថា នឹងបន្តសម្របសម្រួលដល់អាជីវករ។
លោក រឿន ដែលចំណាយថ្លៃជួលតូបក្នុងមួយខែជាង ៣០០ ដុល្លារ សម្រាប់ប្រកបរបរលក់ និងជួសជុលម៉ូតូនោះ បានបន្ថែមថា ការដែលអាជីវករ ទាមទារយ៉ាងដូច្នេះ ព្រោះតែគ្មានលទ្ធភាព បន្តបង់ថ្លៃតូប ដែលមានតម្លៃថ្លៃ ខណៈគ្មានអតិថិជនទិញ និងប្រើប្រាស់សេវារបស់ខ្លួន ហើយម្យ៉ាងទៀតខាងប្រធានផ្សារ បានកំណត់យ៉ាងដាច់អហង្កាថា មិនព្រមបញ្ចុះតម្លៃ និងគ្មានការលើកលែងឡើយ បើគ្មានសមត្ថភាពផ្តល់ថ្លៃជួល គឺត្រូវរើចេញទៅ។
លោកបញ្ជាក់ថា៖ «ក្រុមអាជីវករ ពិតជាមិនចង់គេចវេស មិនបង់ថ្លៃតូបនោះទេ ប៉ុន្តែរយៈពេល២ ខែក្នុងអំឡុងផ្ទុះជំងឺកូវីដ ១៩ មកនេះ ក្រុមអាជីវករ មិនមានចំណូចច្រើននោះទេ ហើយបានចំណាយប្រាក់ដែលសន្សំបង់ថ្លៃតូបអស់ហើយ។ នៅខែ ៤ និងខែ៥ នេះគឺពិតជាគ្មានលទ្ធភាពគ្រប់គ្រាន់ធ្វើការបង់នោះទេ។ យើងសុំបញ្ចុះតម្លៃនេះ តែមួយរយៈជំងឺនេះប៉ុណ្ណោះ បើស្ថានភាពធូស្រាលពេលណា យើងបង់ឲ្យគាត់ គ្រប់ចំនួនវិញ»។
ចំណែកអាជីវករម្នាក់ទៀត លោក ជា វុត្ថា ជាជាងជួសជុលម៉ូតូដែលបានជួលតូបក្នុងផ្សារនេះប្រមាណ ១០ ឆ្នាំមកហើយនោះ បានប្រាប់ភ្នំពេញប៉ុស្តិ៍ដែរថា បច្ចុប្បន្នចំណូលដែលបានមកពីសមាជិកគ្រួសារទាំងអស់ ត្រូវបានកាត់បន្ថយជាងពាក់កណ្តាល ព្រោះមានសមាជិកខ្លះ បានបាត់បង់ការងារ និងខ្លះទៀត ក៏ត្រូវបានកាត់បន្ថយប្រាក់ខែពាក់កណ្តាល ខណៈលោក ក៏រកមិនបានទៀត ទើបធ្វើឲ្យការរ៉ាប់រងថ្លៃជួលតូបជួបបញ្ហាប្រឈម។
លោកបន្ថែមថា៖ «យើងសុំនេះ ក៏មិនចង់បាន ៥០ ភាគរយទេ គ្រានតែចង់ឲ្យម្ចាស់ផ្សារនេះ មានមនោសញ្ចេតនាចុះឲ្យយើងខ្លះ ព្រោះដូចជាកូន ជាម៉ែឪអ៊ីចឹង។ បើមិនបាន ៥០ ភាគរយ ឧទាហរណ៍ ១០០ ដុល្លាអី ចុះ ២០ ដុល្លាអីទៅ ទម្រាំសេដ្ឋកិច្ចរស់ឡើងវិញ យើងបង់ធម្មតាឡើងវិញទៅ មិនមែនមានន័យថា គាបសង្កត់គាត់ឯណា គ្រាន់តែក្នុងពេលនេះយើងរកមិនបាន»។
ប្រធានផ្សារបុរីកីឡា ដែលក្រុមអាជីវករស្គាល់ត្រឹមឈ្មោះ តាខឿន នោះ មិនអាចសុំការអត្ថាធិប្បាយបានទេកាលពីថ្ងៃចន្ទ ដោយសារទូរស័ព្ទរបស់លោកមិនអាចទាក់ទងបាន។
លោក ម៉ប់ សារ៉េត នាយករដ្ឋបាលខណ្ឌ ៧ មករា បានប្រាប់ភ្នំពេញប៉ុស្តិ៍នៅថ្ងៃទី ១១ ខែឧសភានេះថា ចំពោះករណីនេះ អាជ្ញាធរខណ្ឌ នឹងព្យាយាមសម្របសម្រួលឲ្យបានលឿនបំផុត តាមដែលអាចធ្វើទៅបាន ប៉ុន្តែមានលទ្ធផលយ៉ាងណានោះ លោកមិនអាចបញ្ជាក់បានទេ ព្រោះការទាមទារនេះ អាជ្ញាធរខណ្ឌមិនអាចសម្រេចតែម្នាក់ឯងបានទេ គឺអាស្រ័យទៅលើការសម្របសម្រួលដែលអាចទទួលយកបានទាំងសងខាង។
លោកបញ្ជាក់ថា៖ «ខ្ញុំទទួលហើយចុះលេខចូលឯកសារ ដែលគាត់ដាក់មក។ ខ្ញុំកំពុងធ្វើការស្នើទៅអភិបាលខណ្ឌ ដើម្បីរៀបចំអញ្ជើញខាងផ្សារ និងតំណាងអាជីវករ ដើម្បីមកសម្របសម្រួលព្រោះនេះជានីតិវិធីនៃការដោះស្រាយ។ យើងព្យាយាមធ្វើរឿងនេះ ឲ្យលឿនជាទីបំផុត ដើម្បីឲ្យពួកគាត់បានជួបគ្នាទៅតាមនីតិវិធីរបស់ខណ្ឌ»។
បើតាមក្រុមអាជីវករ បើក្នុងករណីដែលការចរចាក្នុងពេលខាងមុខមិនមានដំណោះស្រាយទេនោះ ពួកគេនឹងប្រមូលផ្តុំគ្នាធ្វើការតវ៉ាជាលក្ខណៈទ្រង់ទ្រាយធំ ដើម្បីឲ្យមានការបញ្ចុះតម្លៃតាមការទាមទារ ឬបញ្ចុះតម្លៃក្នុងកម្រិតណាមួយដែលអាចជួយសម្រួលដល់ការលំបាករបស់អាជីវករ៕