The Phnom Penh Post Search

Search form

Logo of Phnom Penh Post newspaper Phnom Penh Post - អាជីវករ​អូរត្រេះ​គ្រោង​ដាក់​ញតិ្ត​សុំ​អន្តរាគមន៍​ថ្ងៃ​នេះ




អាជីវករ​អូរត្រេះ​គ្រោង​ដាក់​ញតិ្ត​សុំ​អន្តរាគមន៍​ថ្ងៃ​នេះ

អាជីវករ​តវ៉ា​នៅ​មុខ​សាលា​ខេត្ត​ព្រះសីហនុ​កាលពី​ថ្ងៃ​ចន្ទ។
អាជីវករ​តវ៉ា​នៅ​មុខ​សាលា​ខេត្ត​ព្រះសីហនុ​កាលពី​ថ្ងៃ​ចន្ទ។ រូបថត សហការី

អាជីវករ​អូរត្រេះ​គ្រោង​ដាក់​ញតិ្ត​សុំ​អន្តរាគមន៍​ថ្ងៃ​នេះ

ព្រះសីហនុៈ អាជីវករ​ ៦០ នាក់​នៅ​​ឆ្នេរ​អូរត្រេះ​កំពុង​ធ្វើ​ដំណើរ​មក​កាន់​រាជធានី​ភ្នំពេញ​ដើម្បី​ដាក់​ញតិ្ត​ជូន​​លោក​នាយក​រដ្ឋមន្រ្តី ហ៊ុន សែន រដ្ឋសភា និង​​ក្រសួង​រៀបចំ​ដែនដី​នគរូបនីយកម្ម និង​សំណង់​នៅ​ថ្ងៃ​ព្រហស្បតិ៍​នេះ​ដើម្បី​ស្នើសុំ​អន្តរាគមន៍​កុំ​ឲ្យ​រុះរើ​តូប​របស់​ពួកគាត់​។

ក្នុង​លិខិត​មួយ​ផ្ញើ​ជូន​លោក​នាយក​រដ្ឋមន្រ្តី ហ៊ុន សែន អ្នកស្រី លេវ គឹមអេង អាយុ ៣៤ ឆ្នាំ​ជា​តំណាង​អាជីវករ ៦២ នាក់​នៅ​ឆ្នេរ​អូរត្រេះ​ស្ថិត​នៅ​សង្កាត់​លេខ ៤ បាន​សរសេរ​ថា «​ដោយ​ភ័យ​ខ្លាច​បាត់បង់​របរ​ចិញ្ចឹម​ជីវិត​យើង​​សូម​ស្នើ​សម្តេច​នាយក​រដ្ឋមន្រ្តី និង​សម្តេច​គតិបណ្ឌិត​មេត្តា​ធ្វើ​អន្តរាគមន៍​ហើយ​អនុញ្ញាត​ឲ្យ​តូប​ទាំង ៦២ របស់​យើង​បន្ត​ធ្វើ​អាជីវកម្ម​នៅ​ឆ្នេរ​អូរត្រេះ។ យើង​ពឹង​ផ្អែក​លើ​មុខរបរ​នេះ​ដើម្បី​ចិញ្ចឹម​ជីវិត»។

អ្នកស្រី​បាន​សរសេរ​ទៀត​ថា​នៅ​ថ្ងៃ​ទី​ ១២ ខែ​កុម្ភៈ​អាជ្ញាធរ​ខេត្ត​ព្រះសីហនុ​បាន​ចេញ​សេចក្តី​ជូន​ដំណឹង​ទៅ​អាជីវករ​ឲ្យ​រុះរើ​តូប​​ចេញ​ពី​ឆ្នេរ​ដោយ​ទុក​រយៈពេល​ជូន​​ដំណឹង ១ ខែ​រហូត​ដល់​ថ្ងៃ​ទី ១៣ ខែ​មីនា។

លិខិត​របស់​អាជីវករ​បាន​សរសេរ​ទៀត​ថា៖ «​ព័ត៌មាន​នេះ​ធ្វើ​ឲ្យ​យើង​ភ័យ​ខ្លាច​បាត់បង់​មុខរបរ​ចិញ្ចឹម​ជីវិត​។ យើង​អាជីវករ ៦២ នាក់​បន្ត​គាំទ្រ​សម្តេច និង​បោះឆ្នោត​ជូន​សម្តេច​នៅ​អាណតិ្ត​ក្រោយៗ។ យើង​​សូម​ស្នើ​អាជ្ញាធរ​ខេត្ត​ចេញ​ដីឡូតិ៍​ជា​ស្តង់ដារ​មួយ (​សម្រាប់​តូប) ដើម្បី​យើង​អាច​សាងសង់​តូប​នៅ​ទីតាំង​នេះ​»​។

នៅ​ពេល​សួរ​កាលពី​ម្សិលមិញ​អ្នកស្រី ងិន គាថា អាយុ ២៣ ឆ្នាំ ជា​អាជីវករ​នៅ​ទី​នោះ​បាន​ថ្លែង​ថា​ពួកគេ​គ្រោង​ទៅ​រដ្ឋសភា​មុន​គេ​នៅ​ម៉ោង ៩ ព្រឹក​ថ្ងៃ​ព្រហស្បតិ៍​។

អ្នកស្រី​ថា ​អាជីវករ​ភាគច្រើន​ដែល​ពឹង​ផ្អែក​លើ​មុខរបរ​នៅ​ទី​នោះ​ដើម្បី​ចិញ្ចឹម​ជីវិត​ភ័យខ្លាច​គ្មាន​កន្លែង​ត្រូវ​ទៅ។ អ្នកស្រី​បាន​បន្ថែម​ថា​គ្រួសារ​អ្នកស្រី​បាន​ផ្លាស់​លំនៅ​មក​ប្រកប​របរ​នេះ​តាំងពី​ឆ្នាំ ២០០០ មក​នៅ​ពេល​ «​វា​ជា​ព្រៃ​ហើយ​យើង​ឈូសឆាយ​ដើម្បី​ឲ្យ​អាជ្ញាធរ​អនុញ្ញាត​​ឲ្យ​យើង​រកស៊ី​ចិញ្ចឹម​ជីវិត​នៅ​ទី​នោះ។ យើង​ដឹង​ថា​វា​ជា​ដី​រដ្ឋ​ប៉ុន្តែ​យើង​គ្រាន់តែ​សុំ​ចិញ្ចឹម​ជីវិត​ប៉ុណ្ណោះ»។

អ្នកស្រី​បាន​បន្ត​ថា​ក្រុមហ៊ុន​អភិវឌ្ឍ​មួយ​ចំនួន​ជា​ម្ចាស់​ឆ្នេរ​ហើយ​សួរ​ថា​តើ​ហេតុ​អ្វី​រដ្ឋាភិបាល​មិន​បាន​​ដោះ​ស្រាយ​ជាមួយ​នឹង​ពួកគេ​។ «​យើង​មិន​តវ៉ា​ប្រឆាំង​នឹង​ការ​អភិវឌ្ឍ​លើ​ដី​រដ្ឋ​ទេ​ប៉ុន្តែ​គេ​គួរ​ចាប់​ផ្តើម​ជាមួយ​នឹង​ការ​អភិវឌ្ឍ​ឯកជន​ជា​មុន​សិន»។

អ្នកស្រី​បាន​បន្ត​ថា៖ «​យើង​ចេញ​ឲ្យ​ពួកគេ​ចេញ​ផែនការ​មេ​សម្រាប់​តូប​នីមួយៗ​ដើម្បី​យើង​អាច​សាង​សង់​តូប​តាម​របៀប​តែ​មួយ​គោរព​តាម​ស្តង់ដារ​របស់​រដ្ឋាភិបាល​»។

ឆ្នេរ​អូរត្រេះ​ល្បី​ឈ្មោះ​ក្នុង​ចំណោម​ភ្ញៀវ​ទេសចរ​បរទេស​ដូច្នេះ​អាជីវកម្ម​ភាគច្រើន​មាន​អតិថិជន​បរទេស​ហើយ​មិន​ត្រឹម​តែ​ប៉ះពាល់​ដល់​ប្រជាជន​ទាំង ៦២ គ្រួសារ​ទេ​អ្នក​បើក​​ម៉ូតូ​កង់បី និង​អាជីវកម្ម​ដទៃ​ទៀត​ជុំ​វិញ​ដែល​ទទួល​បាន​អត្ថប្រយោជន៍​ពី​ភ្ញៀវបរទេស​ក៏​រង​ផល​ប៉ះ​ពាល់​​ផង​​ដែរ​។

អ្នកស្រី​បាន​បន្ថែម​ថា៖ «​តូប​ខ្លះ​ទើប​តែ​ពង្រីក​ហើយ​អាជីវករ​ខ្លះ​ខ្ចី​ប្រាក់​ពី​ធនាគារ​រាប់​ពាន់​ដុល្លារ​ដើម្បី​កែ​លម្អ​តូប​របស់​ខ្លួន»។

លោក យន្ត មីន អភិបាល​ខេត្ត​ព្រះសីហនុ​ថ្លែង​ថា៖ «​យើង​គ្មាន​ដំណោះ​ស្រាយ​សម្រាប់​ពួកគេ​ទេ​ព្រោះ​ឆ្នេរ​នេះ​យើង​បាន​ហាមឃាត់​មិន​ឲ្យ​ធ្វើ​អាជីវកម្ម​យូរ​មក​ហើយ​ប៉ុន្តែ​គេ​នៅ​តែ​មិន​គោរព​តាម​វា​ជា​ដី​រដ្ឋ​​»​។

លោក​បាន​បន្ថែម​ថា៖ «​តាម​ច្បាប់​គេ​ត្រូវ​រើ​ចេញ​។ យើង​ដឹង​ថា​មាន​ផលប៉ះពាល់​ខ្លះ​លើ​ពួកគេ​»។

នៅពេល​សួរ​ថា​តើ​ហេតុ​អ្វី​មិន​ឲ្យ​ពួកគេ​រើ ៥០ ម៉ែត្រ​ពី​ខ្សែ​បន្ទាត់​ឆ្នេរ? លោក​បាន​បញ្ជាក់​ថា៖ «​បើ​ ៥០ ម៉ែត្រ​ពី​ខ្សែ​បន្ទាត់​ឆ្នេរ​វា​ជា​ទ្រព្យ​ឯកជន និង​ផ្លូវ​។ ឆ្នេរ​នេះ​មាន​ប្រវែង​ខ្លី»៕

អត្ថបទគួរចាប់អារម្មណ៍