.jpg)
មន្ត្រីពេលចុះកំណត់ក្បាលដីនៅឧទ្យានជាតិកែបពីឆ្នាំមុន។ រូបថត រដ្ឋបាលខេត្ត
កែបៈ រដ្ឋបាលខេត្តកែប និងក្រសួងបរិស្ថានបានកំណត់អត្តសញ្ញាណក្បាលដីចំនួន ២៧៥ ក្បាលដី ស្មើនឹង ១៧៦ ហិកតា ដើម្បីរៀបចំកាត់ឆ្វៀលចែកជូនពលរដ្ឋដែលកំពុងរស់នៅអាស្រ័យផលលើដីជាក់ស្តែងក្នុងភូមិសាស្ត្រ ឧទ្យានជាតិខេត្តកែប ស្ថិតក្នុងក្រុងកែប ខេត្តកែប។
លោក សោម ពិសិដ្ឋ អភិបាលខេត្តកែបបានប្រាប់ ភ្នំពេញ ប៉ុស្តិ៍ ពីម្សិលមិញថា លទ្ធផលបឋមដែលរដ្ឋបាលខេត្ត និងក្រសួងបរិស្ថានបានចុះទៅពិនិត្យមើលពាក្យស្នើសុំ និងកាន់កាប់ដីជាក់ស្តែងមានទាំងដំណាំ និងសំណង់មានចំនួន ១៧៦ ហិកតា ស្មើនឹងក្បាលដីសរុប ២៧៥ ក្បាលដីលើពាក្យស្នើសុំជាង ៤០០ ក្បាលដី។
លោក សោម ពិសិដ្ឋ បន្តថាក្រសួងបរិស្ថាន និងរដ្ឋបាលខេត្តបានសហការគ្នាចុះធ្វើការងារនេះយ៉ាងលម្អិត ដោយបានចុះទៅពិនិត្យផ្ទាល់ មិនក្រោម ១០ ដងទេ ហើយធ្វើតាមបទដ្ឋានគតិយុត្តចាប់ពីខែកក្កដា ឆ្នាំមុនរហូតមកទល់បច្ចុប្បន្ន។
លោកពន្យល់ថា វិធីសាស្ត្រដោះស្រាយគឺបានជួបប្រជុំជាមួយមន្ត្រីខេត្ត និងមន្ត្រីបរិស្ថានដើម្បីពិនិត្យឯកសារ អត្តសញ្ញាណកម្មក្បាលដីពីអ្នកស្នើសុំ និងការកត់ទិន្នន័យលើអត្តសញ្ញាណកម្មដោយប្រើប្រាស់ GPS និង Drone ថតពីលើអាកាស។
ទោះជាយ៉ាងណាក្នុងចំណោមក្បាលដីដែលបានកំណត់រួចគឺមិនត្រូវបានកាត់ឆ្វៀលជូនពលរដ្ឋទាំងអស់ទេ ដោយសារដីខ្លះ មានចំណោតខ្លាំងពេក និងខ្លះប៉ះពាល់ដល់ឧទ្យានខេត្តកែប។
តាមការពិនិត្យជាក់ស្តែងមានកាត់ឆ្វៀលទាំងស្រុងមានកាត់ផ្នែកខ្លះ និងផ្តល់ជូនខ្លះ។
លោកបញ្ជាក់ថា៖ «មានឱ្យ ១០០ ភាគរយមានឱ្យខ្លះ និងមានឱ្យតាមភាពជាក់ស្តែងដែលមានដំណាំចម្ការ សំណង់តាំងពីឆ្នាំ ១៩៩៤-១៩៩៥ ដែលគាត់មានបណ្ណស្លាបមាន់ដែលមានមុនមានច្បាប់ការពារកើតឡើង»។ បើតាមលោក សោម ពិសិដ្ឋ របាយការណ៍នេះនឹងត្រូវផ្ញើជូនប្រមុខរាជរដ្ឋាភិបាលដើម្បីពិនិត្យ និងសម្រេចបន្តទៀត។
អ្នកសម្របសម្រួលសមាគមអាដហុក (Adhoc) ប្រចាំនៅខេត្តកែបកំពតលោក យន់ ផល្លី បានឱ្យដឹងដែរថា លោកមិនទាន់បានទទួលព័ត៌មានជុំវិញពីការចុះទៅពិនិត្យ និងកាត់ឆ្វៀលដីអាស្រ័យផលជាក់ស្តែងក្នុងភូមិសាស្ត្រឧទ្យានខេត្តកែបនេះទេ។ ប៉ុន្តែជាធម្មតា ប្រសិនបើការវាស់វែង ឬឆ្វៀលដីប៉ះពាល់ដំណាំរបស់ពលរដ្ឋអាចនឹងមានការតវ៉ាកើតឡើងហើយ។
យ៉ាងណាក្ដីលោកថ្លែងថា លោកនឹងចុះទៅស្វែងរកព័ត៌មានលម្អិតជុំវិញការកាត់ឆ្វៀលដីជូនពលរដ្ឋដែលអាស្រ័យផលជាក់ស្តែងនេះ ថាតើមានផលប៉ះពាល់យ៉ាងណា ឬក៏មិនមានផលប៉ះពាល់លើការកាន់កាប់ជាក់ស្តែងរបស់ពលរដ្ឋ។
ឧទ្យានជាតិកែបមានផ្ទៃដី ៥ ០០០ ហិកតា ត្រូវបានសម្រេច និងប្រកាសដាក់ឧទ្យានជាតិកែបដោយព្រះរាជក្រឹត្យឡាយព្រះហស្តលេខាដោយសម្តេចព្រះបរមរតនកោដ្ឋ ព្រះបាទសម្តេចព្រះនរោត្តមសីហនុពីថ្ងៃទី ១ ខែ វិច្ឆិកា ឆ្នាំ ១៩៩៣ ដែលមានព្រំប្រទល់ខាងជើងជាប់នឹងផ្លូវជាតិលេខ ១៦ ខាងត្បូងជាប់នឹងឆ្នេរសមុទ្រខាងកើត និងខាងលិចជាប់នឹងផ្លូវជាតិលេខ ១៦២៕
