ព្រះសីហនុៈ អភិបាលខេត្តព្រះសីហនុលោក គួច ចំរើន កាលពីម្សិលមិញបានដឹកនាំកម្លាំងខេត្តដោយផ្ទាល់ដើម្បីចុះស្រាវជ្រាវរកស្ដ្រីទេសចរជនជាតិអង់គ្លេសម្នាក់ដែលបានបាត់ខ្លួនតាំងពីថ្ងៃទី ២៤ ខែតុលានៅក្នុងសង្កាត់កោះរ៉ុងសន្លឹម ក្រុងកោះរ៉ុង។
កាលពីម្សិលមិញលោក ឃាង ភារម្យ អ្នកនាំពាក្យរដ្ឋបាលខេត្តព្រះសីហនុបានថ្លែងថាលោក គួច ចំរើន បានដឹកនាំកម្លាំងរុករកដោយផ្ទាល់ និងកំពុងបន្តស្រាវជ្រាវនៅកន្លែងសង្ស័យបាត់ខ្លួនរួមទាំងចុះប្រមូលទិន្នន័យដែលពាក់ព័ន្ធ។ លោកថា៖ «ឥឡូវអាជ្ញាធរកំពុងធ្វើការ និងប្រមូលទិន្នន័យដែលពាក់ព័ន្ធហើយនៅពេលប្រមូលបានទិន្នន័យគ្រប់ជ្រុងជ្រោយហើយ ខ្ញុំនឹងបញ្ជាក់ជូនឱ្យបានលម្អិត»។
ទំព័រហ្វេសប៊ុករបស់ក្រុមការងារថ្នាក់ជាតិចុះជួយខេត្តព្រះសីហនុបានបង្ហោះថា ក្រុមអ្នករុករកដែលមានទាំងក្រុមអ្នកមុជទឹកបានស្វែងរកស្ដ្រីបាត់ខ្លួននៅតាមដងព្រៃភ្នំ ដងព្រែក តាមឆ្នេរខ្សាច់ ឆ្នេរថ្ម ខណៈទីតាំងដែលបាត់ខ្លួន គឺមានកម្មករសំណង់រស់នៅច្រើន។
លោក ណុប បញ្ញា ស្នងការរងខេត្តព្រះសីហនុនិយាយថានារីបាត់ខ្លួន គឺមានមិត្តភក្ដិម្នាក់ជាជនជាតិហូឡង់ដែលស្គាល់គ្នានៅពេលមកលេងនៅកម្ពុជា និងមានឪពុកធ្វើការនៅក្នុងប្រទេស វៀតណាម។
ជាមួយគ្នានេះសារព័ត៌មាន Mail Online បានចុះផ្សាយថា ស្ដ្រីជនជាតិអង់គ្លេសដែលបាត់ខ្លួនគឺមានឈ្មោះ Amelia Bambridge អាយុ ២១ ឆ្នាំ មកពីទីក្រុង Worthing ដែលជាទីក្រុងស្ថិតនៅភាគខាងត្បូងនៃទីក្រុងឡុងដ៍ប្រទេស អង់គ្លេស និងបានធ្វើដំណើរជាលើកដំបូងតែម្នាក់ឯងមកកាន់កោះរ៉ុង។
នាងបានបាត់ខ្លួននៅម៉ោង ៣ ទៀបភ្លឺ ឈានចូលថ្ងៃទី ២៤ ខែតុលា នៅពេលធ្វើដំណើរតែម្នាក់ឯងចាកចេញពីពិធីជប់លៀងនៅក្នុងភោជនីយដ្ឋានឈ្មោះ Police Beach ត្រឡប់ទៅកាន់សណ្ឋាគារស្នាក់នៅវិញឈ្មោះ Nest Beach Club ដែលមានចម្ងាយពីគ្នាប្រហែល ១ គីឡូម៉ែត្រ។
តាមគម្រោង ស្ដ្រីទេសចររូបនេះត្រូវមកចុះឈ្មោះចាកចេញពីសណ្ឋាគារស្នាក់នៅវេលារសៀលថ្ងៃទី ២៤ និងធ្វើដំណើរចាកចេញពីកោះរ៉ុងនៅពេលល្ងាចជាមួយមិត្តភក្ដិម្នាក់ ប៉ុន្តែកាបូបដៃដែលខាងក្នុងមានកាបូបលុយ ទូរស័ព្ទ និងកាតធនាគារ ត្រូវបានគេរកឃើញនៅលើថ្មឆ្នេរសមុទ្រ ខណៈលិខិតឆ្លងដែនរបស់នាងស្ថិតនៅក្នុងសណ្ឋាគារ។
Amelia Bambridge ដែលជាអតីតនិស្សិតមហាវិទ្យាល័យបានធ្វើដំណើរចេញពីប្រទេស អង់គ្លេស កាលពីខែមុន បន្ទាប់ពីបញ្ចប់ការសិក្សាអំពីគ្រឿងម៉ាស៊ីន។
បុរសម្នាក់ឈ្មោះ Ryan Harris អាយុ ១៨ ឆ្នាំ ដែលអះអាងថា បានស្គាល់គ្នាជាមួយនារីបាត់ខ្លួនបានប្រាប់ថា ពួកគេទាំង ២ នាក់ បានជួបគ្នានៅទីក្រុងភ្នំពេញ និងបានធ្វើដំណើរតាមទូករួមគ្នាទៅលេងកោះរ៉ុង ហើយបាននៅជាមួយគ្នា ២-៣ ថ្ងៃ និងបានជួបជាមួយមនុស្ស ២-៣ នាក់ផ្សេងទៀត។
បុរសរូបនេះបន្តថា រូបគេបានធ្វើដំណើរទៅស្នាក់នៅកោះផ្សេងនៅជាប់គ្នាជាមួយកោះរ៉ុង ប៉ុន្តែ Amelia Bambridge បានស្នាក់នៅជាមួយក្មេងស្រីម្នាក់ ដែលបានស្គាល់នៅពេលធ្វើដំណើរតាមទូកជាមួយគ្នា។ បុរសម្នាក់នេះបន្តថា នៅពេលលោកចាកចេញពីសណ្ឋាគារត្រឡប់ទៅកោះរ៉ុងវិញ ក៏ស្រាប់តែមនុស្ស ២ នាក់ បានប្រាប់ថា Amelia Bambridge បានបាត់ខ្លួន។
ប្អូនស្រីរបស់ Amelia Bambridge ឈ្មោះ Georgie Bambridge បានថ្លែងប្រាប់សារព័ត៌មាន BBC ថា បងស្រីរបស់នាង គឺជាមនុស្សម្នាក់ដែលមានស្មារតីរឹងមាំ ហើយនាងតែងផ្ញើសារទៅគ្រួសារនៅពេលដែលមាន Wifi។
Georgie ក៏បានសរសេរបង្ហោះតាម Twitter ដោយបង្ហាញក្ដីព្រួយបារម្ភយ៉ាងខ្លាំងអំពីការបាត់ខ្លួនបងស្រីរបស់នាង និងបានអះអាងថា Amelia គឺមានស្នាមសាក់រូបសត្វគោនៅកំភួនដៃ និងមានស្នាមសាក់រូបសត្វឆ្មានៅលើជើង។
លោក ឈឺន ចន្ថា ចៅសង្កាត់កោះរ៉ុងសន្លឹមបានថ្លែងកាលពីរសៀលថ្ងៃម្សិលមិញថា ក្រុមរុករកបានបែងចែកជា ២ ក្រុមធំៗ គឺក្រុមរុករកនៅក្នុងព្រៃ និងក្រុមរុករកនៅលើទឹក។
លោកបន្តថា អាជ្ញាធរបានសង្ស័យអំពីការបាត់ខ្លួនអ្នកទេសចរអង់គ្លេសរូបនេះ គឺអាចដោយសារការលង់ទឹក ព្រោះនាឡិកា និងកាបូបដៃគឺត្រូវបានរកឃើញនៅលើថ្មមាត់ទឹក៕