ព្រះវិហារៈ អាជ្ញាធរខេត្តព្រះវិហារបានសម្រេចផ្តល់ដីទំហំ ១០ ហិកតា ដល់ប្រជាពលរដ្ឋចំនួន ៣១ គ្រួសារ ដើម្បីតាំងលំនៅឋានថ្មីជាថ្នូនឹងការរើលំនៅឋានចេញពីតំបន់ឧទ្យានរាជបណ្ឌិត្យសភាកម្ពុជា តេជោសែន ឫស្សីត្រឹប ដើម្បីកុំឱ្យពួកគាត់បន្តកាប់បំផ្លាញព្រៃឈើក្នុងឧទ្យាននេះទៀត។
លោក ជា សម្បតិ្ត អនុប្រធានឧទ្យានរាជបណ្ឌិត្យសភាកម្ពុជា តេជោសែន ឫស្សីត្រឹប ប្រាប់ ភ្នំពេញ ប៉ុស្តិ៍ ពីម្សិលមិញថា បន្ទាប់ពីមានការស្នើពីរាជបណ្ឌិត្យសភាកម្ពុជា អាជ្ញាធរខេត្តកំពុងតែរៀបចំនិតិវិធីក្នុងការផ្ទេរពលរដ្ឋទាំង ៣១ គ្រួសារនេះចេញពីឧទ្យានក្នុងគោលបំណងកុំឱ្យពួកគាត់កាប់បំផ្លាញព្រៃឈើនៅក្នុងឧទ្យាន ព្រោះកន្លងមកនេះពួកគាត់បានកាប់ឈើធ្វើអាជីវកម្ម។
លោកថ្លែងថា៖ «រដ្ឋបាលខេត្តព្រះវិហារបានសហការជាមួយនឹងស្រុកឆែប ដើម្បីធ្វើកិច្ចការនេះឱ្យបានលឿន ប៉ុន្តែការដោះស្រាយហាក់មានស្ថានភាពយឺតយ៉ាវ»។ ថ្នាក់ស្រុកកំពុងរៀបចំនីតិវិធីក្នុងការសុំយោបល់ពីថ្នាក់ខេត្តក្នុងការដោះស្រាយ ហើយដីដែលរាជបណ្ឌិត្យសភាកម្ពុជាបានស្នើសុំផ្តល់ឱ្យពលរដ្ឋនេះមានទំហំ ១០ ហិកតាដោយក្នុង ១ គ្រួសារនឹងទទួលបានដីទំហំ ៣០ x ៥០ ម៉ែត្រ និងមានការរៀបចំផ្លូវ និងអណ្តូងទឹក សម្រាប់ប្រើប្រាស់ និងមានដាំកូនឈើជាច្រើននៅដីនោះ។ «ទីតាំងនេះរៀបចំរួចរាល់អស់ហើយ នៅតែពួកគាត់រើលំនៅឋានទៅកាន់ទីនោះប៉ុណ្ណោះ។ ប៉ុន្តែមានពលរដ្ឋមួយចំនួនស្ម័គ្រចិត្តរុះរើ និងមួយចំនួនទៀតមិនទាន់ទេ ចាំមើលថ្នាក់ខេត្តដោះស្រាយ »។ លោកបន្តថា៖ «បើទុកឲ្យគាត់បន្តរស់នៅទីនេះ (ឧទ្យានជាតិឫស្សីត្រឹប) ពួកគាត់នឹងកាប់បំផ្លាញព្រៃឈើអស់ពីឧទ្យានជាតិមិនខាន»។
លោក ហ៊ឹម យ៉ាន មេឃុំឆែប ២ ថ្លែងថា លោកបានទៅចូលរួមប្រជុំជាច្រើនលើកជាមួយនឹងលោកអភិបាលរងស្រុកឆែប និងមន្ត្រីពាក់ព័ន្ធដើម្បីស្វែងរកនីតិវិធីក្នុងការរើលំនៅឋានរបស់ពលរដ្ឋទាំង ៣១ គ្រួសារនេះ។ លោកបន្តថា នៅក្នុងការដោះស្រាយនេះមានពលរដ្ឋមួយចំនួនបានស្ម័គ្រចិត្តក្នុងការរុះរើលំនៅឋានចេញទៅកាន់ទីតាំងថ្មីដោយគ្មានសំណង ប៉ុន្តែមានពលរដ្ឋចំនួន ១២ គ្រួសារទៀត ទាមទារសំណងផ្សេងៗ។ គ្រួសារមួយចំនួនតូចទៀតហាក់មិនសូវអើពើក្នុងការចូលរួមប្រជុំដោះស្រាយ ប៉ុន្តែកិច្ចការនេះ ឃុំកំពុងដោះស្រាយ។
មូលហេតុដែលពលរដ្ឋមិនចង់រើផ្ទះហើយស្នើសុំសំណង ដោយសារពួកគាត់យល់ឃើញថា នៅពេលរើលំនៅឋាននឹងធ្វើឱ្យមានការបែកបាក់ និងខូចខាតលំនៅឋានរបស់ពួកគាត់ ពីព្រោះផ្ទះពួកគាត់មានទំហំធំដោយផ្ទះខ្លះមានទំហំ ២ ខ្នង និងខ្លះទៀត ៣ ខ្នង។ «ផ្ទះនៅនេះ មិនមែនតូចៗទេ ហើយប្រើប្រាស់ដែកសុទ្ធសឹងតែមានតម្លៃខ្ពស់។ គាត់ស្តាយផ្ទះរបស់គាត់ដែរ ទើបពួកគាត់ស្នើសុំសំណង ហើយកិច្ចការនេះត្រូវបានធ្វើរបាយការណ៍រួចរាល់អស់ជាមួយថ្នាក់ស្រុក ដើម្បីដាក់ទៅកាន់ថ្នាក់ជាតិឱ្យជួយដោះស្រាយ មុននឹងពួកគាត់រុះរើ ប៉ុន្តែលទ្ធផលយ៉ាងណាមិនទាន់ដឹងនោះទេ»។
រដ្ឋបាលខេត្តព្រះវិហារបានបង្កើតក្រុមការងារចម្រុះមួយ ដើម្បីដោះស្រាយបញ្ហាជូនដល់ប្រជាពលរដ្ឋទាំង ៣១ គ្រួសារនេះ ដោយគណៈកម្មការចម្រុះនេះបានសម្រេចផ្ដល់ជូនពលរដ្ឋនូវដីដែលមានទទឹងប្រវែង ៣០ ម៉ែត្រ បណ្ដោយប្រវែង ៥០ ម៉ែត្រក្នុង ១ គ្រួសារ។ ទីតាំងថ្មីនេះ នៅខាងជើងក្បែរវត្តផ្លឹតមានចម្ងាយកន្លះគីឡូម៉ែត្រពីទីតាំងចាស់ ដោយមានហេដ្ឋារចនាសម្ព័ន្ធគ្រប់គ្រាន់ដូចជា សាលារៀន វត្តអារាម ភូមិ និងអណ្ដូងទឹក។
លោក សុខ ទូច ប្រធានរាជបណ្ឌិត្យសភាកម្ពុជាពីថ្ងៃទី ៨ ខែ ធ្នូ ឆ្នាំ ២០២០ បានដឹកនាំក្រុមការងារឧទ្យាន ចុះល្បាតជ្រុងម្ខាងនៃឧទ្យានរាជបណ្ឌិត្យសភាកម្ពុជា តេជោសែន ឫស្សីត្រឹប និងបានប្រទះឃើញឈើប្រណីតចំនួន ៣០០ ដើមត្រូវបានគេកាប់បំផ្លាញ។ លោកថ្លែងថា៖ «បទល្មើសព្រៃឈើទាំងនេះភាគច្រើនកាប់ដោយប្រជាពលរដ្ឋដែលតាំងលំនៅឋានក្នុងឧទ្យានជាតិ»។
បើតាមលោក សុខ ទូច ក្រុមការងារបានចុះទៅត្រួតពិនិត្យផ្ទះរបស់ពលរដ្ឋទាំង ៣១ គ្រួសារ ដែលរស់នៅក្នុងឧទ្យាននេះ និងបានរកឃើញក្នុងផ្ទះទាំង ១៥ ខ្នងនេះសុទ្ធសឹងតែមានឈើដែលត្រូវបានកាប់បំផ្លាញពីឧទ្យាន។
មន្ត្រីសម្របសម្រួលសមាគមអាដហុកខេត្តព្រះវិហារ លោក ឡោ ចាន់ ឱ្យដឹងថា បើអាជ្ញាធរ ឬខាងឧទ្យានជាតិឲ្យពលរដ្ឋចេញក្នុងន័យផ្តល់ផលប្រយោជន៍ដល់រដ្ឋពិតប្រាកដ និងរៀបចំទីតាំងដោះដូរឲ្យពលរដ្ឋរស់នៅបានសមរម្យមិនជាបញ្ហានោះទេ ប៉ុន្តែ បើឱ្យពលរដ្ឋចេញដើម្បីផលប្រយោជន៍បុគ្គលមិនល្អនោះទេ ព្រោះកន្លងមកមានករណីបែបនេះកើតឡើងច្រើនក្នុងខេត្តព្រះវិហារ។
លោក ឡោ ចាន់ ថ្លែងថា៖ «យើងឃើញថា តំបន់មួយចំនួននៅក្នុងខេត្តព្រះវិហារ អាជ្ញាធរតែងតែយកកន្លែងនេះ កន្លែងនោះ ហើយឱ្យពលរដ្ឋចេញពីទីតាំងនោះ ប៉ុន្តែលទ្ធផលចុងក្រោយទីតាំងដីដែលប្រជាពលរដ្ឋរស់នៅបែរជាធ្លាក់ចូលទៅក្នុងដៃរបស់បុគ្គលមានអំណាច និងវិស័យឯកជនទៅវិញ»។
លោកបន្តថា៖ «ដូច្នេះបើធ្វើដើម្បីផលប្រយោជន៍សាធារណៈពិតប្រាកដ ប្រជាពលរដ្ឋដែលត្រូវបានឱ្យចេញហ្នឹង គួរតែសម្របសម្រួលក្នុងការចេញទៅរស់នៅក្នុងទីតាំងណា ដែលគេរៀបចំឲ្យនោះប្រសើរជាងបង្កជម្លោះដាក់គ្នា»៕