ភ្នំពេញ៖ អាជ្ញាធរខណ្ឌពោធិ៍សែនជ័យបានឃាត់រថយន្តតួរីសចំនួន ៤២ គ្រឿង រួមជាមួយនឹងអ្នកបើកបរ និងព្រូឡានចំនួន ៥៥ នាក់ ដែលបម្រុងដឹកកម្មករ-កម្មការិនីចេញពីតំបន់ក្រហម ស្ថិតនៅក្នុងសង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ។
លោក ម៉ន វុធី អធិការនគរបាលខណ្ឌពោធិ៍សែនជ័យប្រាប់ ភ្នំពេញ ប៉ុស្តិ៍ នៅថ្ងៃទី ៨ ខែ ឧសភា ឆ្នាំ ២០២១ នេះថា រថយន្តតួរីសទាំង ៤២ គ្រឿងនេះ បានមកដឹកកម្មករ-កម្មការិនីចេញពីតំបន់ក្រហម ដោយក្នុងនោះមានកម្មករ-កម្មការិនីសល់នៅក្នុងរថយន្តចំនួន ៤៩ នាក់ ខណៈអ្នកផ្សេងទៀត ត្រូវបានដេញឱ្យទៅកន្លែងដើមវិញ។
លោក ម៉ន វុធី បន្តថា នៅក្នុងចំណោមរថយន្តទាំង ៤២ គ្រឿងនេះ មានតៃកុងឡាន (អ្នកបើកបរ) និងព្រូឡានចំនួន ៥៥ នាក់។ ទោះជាណា លោក ម៉ន វុធី មិនដឹងថា អ្នកទាំងនេះនឹងត្រូវបញ្ជូនទៅធ្វើចត្តាឡីស័ក ឬយ៉ាងណានោះទេ អាស្រ័យលើលោក ហែម ដារិទ្ធ ជាអភិបាលខណ្ឌពោធិ៍សែនជ័យជាអ្នកសម្រេច។
បើតាម លោក ម៉ន វុធី រថយន្តតួរីសទាំងនេះ ចេញមកពីបណ្តាខេត្តផ្សេងៗមកសម្រុកដឹកកម្មករ-កម្មការិនី ដើម្បីឱ្យពួកគេត្រឡប់ទៅភូមិកំណើតវិញ ស្របពេលដែលរាជធានីភ្នំពេញកំពុងបិទខ្ទប់ជាតំបន់ក្រហម។ បច្ចុប្បន្ននេះ ទាំងអ្នកបើករថយន្ត ព្រូឡាន និងកម្មករ-កម្មការិនី បាននិងកំពុងស្ថិតនៅសាលារៀន នៅក្នុងសង្កាត់គោកកញ្ជាន់នៃខណ្ឌបពោធិ៍សែនជ័យ។
ភ្នំពេញ ប៉ុស្តិ៍ មិនអាចទាក់ទងទៅ លោក ហែម ដារិទ្ធ អភិបាលខណ្ឌពោធិ៍សែនជ័យ ដើម្បីសុំធ្វើអត្ថាធិប្បាយបានទេ នៅថ្ងៃទី ៨ ខែ ឧសភា ឆ្នាំ ២០២១ នេះ៕