The Phnom Penh Post Search

Search form




Logo of Phnom Penh Post newspaper Phnom Penh Post - អាជ្ញាធរខេត្ត​កម្ពុជា​​ បង្ហាញ​ក្ដីបារម្ភ​បន្ទាប់ពី​ទាហាន​វៀតណាម​បោះជំរំ​មក​ជិត​ព្រំដែន




អាជ្ញាធរខេត្ត​កម្ពុជា​​ បង្ហាញ​ក្ដីបារម្ភ​បន្ទាប់ពី​ទាហាន​វៀតណាម​បោះជំរំ​មក​ជិត​ព្រំដែន

Content image - Phnom Penh Post
ទាហាន​វៀតណាម​បោះជំរំ​មក​ជិត​ព្រំដែន កាលពីពេលថ្មីៗនេះ។ រូបថត នគរបាល

អាជ្ញាធរខេត្ត​កម្ពុជា​​ បង្ហាញ​ក្ដីបារម្ភ​បន្ទាប់ពី​ទាហាន​វៀតណាម​បោះជំរំ​មក​ជិត​ព្រំដែន

តាកែវ/កណ្ដាល: អាជ្ញាធរ​ខេត្ត​នៅជាប់​ព្រំដែន​កម្ពុជា-វៀតណាម​ បានបង្ហាញ​ការ​ព្រួយបារម្ភ​ពី​ភាពមិនប្រក្រតី ក្រោយពី​សង្កេតឃើញ​អាជ្ញាធរ​វៀតណាម បាន​ពង្រាយ​កម្លាំង​ទាហាន​បោះជំរំ​ចំនួន ១១៤ ​ទីតាំង​ដែល​ស្ថិតនៅ​ចម្ងាយ​ប្រមាណ​ ៣០ ​ម៉ែត្រ​ពី​ព្រំដែន​នៃ​​ប្រទេស​ទាំង​ ២​។

លោក អ៊ូច ភា អភិបាលខេត្ត​តាកែវ​បាន​ប្រាប់​ភ្នំពេញ​ប៉ុស្ដិ៍​នៅ​ថ្ងៃទី​ ២៨ ខែឧសភា​ ​ថា ទាហាន​វៀតណាម​បាន​សាងសង់​ជំរំ​ចំនួន ៨៣ ​ទីតាំង​ នៅតាម​ខ្សែបន្ទាត់​ព្រំដែន​ខេត្តតាកែវ​នៅក្នុង​ទឹកដី​ភាគី​វៀតណាម ដែល​ស្ថិតនៅ​ចម្ងាយ​ប្រមាណ ៣០ ​ម៉ែត្រ​ពី​បង្គោល​ព្រំដែន​ដោយ​ភាគី​វៀតណាម​អះអាង​ថា វា​គ្រាន់តែ​ជា​វិធានការ​រឹតបន្តឹង​ការចេញ-ចូល​តាម​ច្រកព្រំដែន ដើម្បី​ទប់ស្កាត់​ការរីក​រាលដាល​ជំងឺ​កូវីដ​ ១៩​ ប៉ុណ្ណោះ​។

លោក ភា ថ្លែងថា​៖ «​រហូត​មក​ទល់​ពេលនេះ​អាជ្ញាធរខេត្ត​ជាប់​ព្រំដែន​យើង បាននិង​កំពុង​តាមដាន​លើ​បញ្ហា​នេះ ដើម្បី​កុំ​ឲ្យ​ភាគី​វៀតណាម​រំកិល​តង់​ណាមួយ​ចូលមក​ទឹកដី​កម្ពុជា​។ ខ្ញុំ​មិនទាន់​អាច​និយាយ​អ្វី​ច្រើនជាង​នេះ​ទេ ខ្ញុំ​ជាប់រវល់​ប្រជុំ​សិន​»​។

លោក ភា បាន​អះអាង​ថា​៖ «​ការបោះ​តង់​យោធា​របស់​វៀតណាម​នៅ​ចំណុច​នេះ​ស្ថិត​នៅក្នុង​ទឹកដី​វៀតណាម​ប៉ុណ្ណោះ មិន​បាន​ចូលមក​ដី​កម្ពុជា​ទេ ហើយ​ព្រំដែន​នៅ​ចំណុច​នេះ​​ក៏​មាន​ការឯកភាព​គ្នា​រួចហើយ​ដែរ​។ គោលដៅ​សំខាន់​នៃ​ការបោះតង់​យោធា​របស់​វៀតណាម​នេះ ដើម្បី​ទប់ស្កាត់​ការឆ្លងដែន​ខុសច្បាប់​»​។

ករណី​ដូចគ្នានេះ​ក៏​បាន​កើតឡើង​នៅ​ខេត្តកណ្ដាល​ដែរ ដែល​បញ្ហា​នេះ​លោក គង់ សោភ័ណ្ឌ អភិបាលខេត្ត​កណ្ដាល​បាន​អះអាង​កាលពី​ម្សិលមិញ​ក្នុង​សន្និសីទ​កាសែត​នៅ​ទីស្ដីការ​គណៈរដ្ឋមន្ត្រី​ថា វៀតណាម​បាន​បោះជំរំ ៣១ ​ទីតាំង​នៅតាម​បណ្ដោយ​ព្រំដែន ប៉ុន្តែ​ទើបបាន​រើចេញ​ទៅវិញ​ចំនួន​ ៩ ​ទីតាំង​ប៉ុណ្ណោះ ក្រោយពី​មាន​ការស្នើសុំ​ពី​សមត្ថកិច្ច​កម្ពុជា​។

លោក​បាន​ឲ្យ​ដឹងថា ទាហាន​វៀតណាម​បាន​បោះតង់​កៅស៊ូ ដោយ​ប្រើ​សសរឈើ ឫស្សី​ធំៗ និង​ចង​តង់​នោះ​ដែលមាន​ទំហំ​តូច​ល្មម​ប្រហែល​ ៣ ទៅ​ ៤ ​ម៉ែត្រការ៉េ​ព្រមទាំង​ដាក់​គ្រែ​ ១ ​សម្រាប់​​ឲ្យ​ទាហាន ២ ​ឬ​ ៣ ​នាក់​អង្គុយ ឬ​ដេក​នៅ​ក្នុងនោះ​។ ការបោះ​ជំរំ​នេះ​គឺ​ធ្វើ​ចាប់តាំងពី​ព្រំប្រទល់​ក្អម​សំណ រហូត​ដល់​ព្រំប្រទល់​ខេត្តតាកែវ​ដែល​មាន​សរុប​ចំនួន ៣១ ​ទីតាំង​។

លោក សោភ័ណ្ឌ ថ្លែងថា​៖ «​អាជ្ញាធរខេត្ត​អាន​យ៉ាង​របស់​ភាគី​វៀតណាម​បាន​ឆ្លើយតប​ថា ពួកគេ​យល់ព្រម​រុះរើ​ចេញ ប៉ុន្ដែ​ស្នើសុំ​ឲ្យ​ផុត​រដូវ​កាល​ជំងឺ​កូវីដ​១៩​សិន​។ យើង​នៅតែ​បន្ត​តាមដាន​មើល​សកម្មភាព​ទាហាន​វៀតណាម​ដែល​កំពុង​បោះតង់​តាម​ព្រំដែន​នេះ យើង​មិនអាច​ព្រងើយ​កន្តើយ​បានទេ ដោយ​ថ្នាក់ខេត្ត​យើង​បាន​រាយការណ៍​មក​ក្រសួង​ការបរទេស ក្រសួង​​មហាផ្ទៃ ក៏ដូចជា គណៈកម្មការ​កិច្ចការ​ព្រំដែន​រួចហើយ យើង​នឹងធ្វើ​កិច្ចការ​បច្ចេកទេស​បន្តបន្ទាប់​ទៀត​ជាមួយ​វៀតណាម​»​។

លោក​បន្តថា អាជ្ញាធរខេត្ត​កណ្ដាល​បាន​តម្រូវ​ឲ្យ​ភាគី​វៀតណាម​រុះរើ​ចេញ​បន្ទាន់​ទោះ​មុន​រដូវកាល​កូវីដ ឬ​ក្រោយ​កូវីដ​ក៏​​ដោយ គឺ​ត្រូវតែ​រុះ​រើចេញ​បន្ទាន់ មិនអាច​ទុក​ឲ្យ​មាន​តង់​នៅ​តំបន់​នោះ​ទៀត​ទេ ព្រោះ​ភាគី​ទាំង​ ២ ​មិន​បាន​និយាយ​ពី​កិច្ចការ​នៅក្នុង​តំបន់​នោះ ហើយ​វៀតណាម​ក៏​មិនគួរ​មក​បោះតង់​នៅ​តំបន់​នោះដែរ​។

លោក សុខ ទូច ប្រធាន​រាជបណ្ឌិត្យ​សភា​កម្ពុជា​ថ្លែង​ម្សិលមិញ​យ៉ាងខ្លី​ថា ពលរដ្ឋ​ប្រទេស​កម្ពុជា​មិន​បាន​ឆ្លងទៅ​ប្រទេស​វៀតណាម​ទេ គឺ​មាន​តែ​ភាគី​វៀតណាម​ឆ្លង​ចូលមក​ទឹកដី​ប្រទេស​កម្ពុជា ប៉ុន្ដែ​អ្វីដែល​គាត់​ព្រួយបារម្ភ​នោះ គឺ​វៀតណាម​ខ្លួនឯង​ទៅវិញ​ទេ​។

លោក​បាន​ថ្លែង ដោយ​បង្ហាញ​ការយល់​ឃើញ​ផ្ទាល់ខ្លួន​ថា អ្វីដែល​វៀតណាម​ធ្វើ​នេះ​គឺជា​លក្ខណៈ​ផ្គើន ឃើញ​កម្ពុជា​មាន​ទំនាក់ទំនង​គ្រប់​ជ្រុងជ្រោយ​​ជាមួយ​ចិន ហើយ​ចិន​កំពុង​​មាន​បញ្ហា​សមុទ្រ​ចិន​ខាងត្បូង កោះ​ស្ព្រាតលី និង​ប៉ារ៉ាសែល ដូច្នេះ​វៀតណាម​ចង់​បញ្ឈឺ​កន្លែង​ហ្នឹង​។

យោងតាម​លិខិត​របស់​លោក ង្វៀន ថាញ់ ប៊ិន ប្រធាន​គណៈកម្មាធិការ​ប្រជាជន​ខេត្ត​អានយ៉ាង​បាន​ឲ្យ​ដឹងថា ការបោះ​តង់​នោះ​ធ្វើឡើង​ជា​បណ្ដោះអាសន្ន ហើយ​ក៏​បាន​ជូនដំណឹង​ដល់​កងកម្លាំង​ការពារ​ព្រំដែន​ជាមួយ​ខេត្តកណ្ដាល​ហើយ​ដែរ​៕

អត្ថបទគួរចាប់អារម្មណ៍

  • ព្រះសីហនុៈ រដ្ឋបាលខេត្ត​ព្រះសីហនុ​កំពុង​ចាក់​ខ្សាច់​ថ្មី​បំពេញ​នៅតាម​កន្លែង​ជ្រលង​ទឹកហូរ​ដែលមាន​ខ្សាច់​ទាប និង​ខ្សាច់​ខ្មៅ​នៅ​ចំណុច​ឆ្នេរ​អូរឈើទាល​ក្នុង​សង្កាត់​លេខ​ ៤ ក្រុងព្រះសីហនុ ដើម្បី​កែលម្អ​សោភណភាព​ឆ្នេរ​ខ្សាច់ ក៏ប៉ុន្តែ​មន្ត្រីខេត្ត​នៅ​មិន​អាច​ប៉ាន់ប្រមាណ​ថា​នឹង​ត្រូវ​ប្រើ​ខ្សាច់​ប៉ុន្មាន​រថយន្ត​នោះទេ​។

  • ភ្នំពេញៈ ប្រទេស​ជប៉ុន​ ផ្តល់​ជំនួយ​ឥតសំណង​ដល់​កម្ពុជា​ចំនួន ១ ១៣២ ​លាន​យ៉េន​ (១០,៨ ​លាន​ដុល្លារ​) ​សម្រាប់​អនុវត្ត​គម្រោង​អភិវឌ្ឍន៍​ចរាចរណ៍​នាវា​នៅ​កំពង់ផែ​ស្វយ័ត​ក្រុងព្រះសីហនុ​ដើម្បី ​ធ្វើឱ្យ​ប្រសើរ​ឡើង​នូវ​សុវត្ថិភាព​ផ្លូវ​សមុទ្រ​។ នេះ​បើតាម​ស្ថានទូត​ជប៉ុន​ប្រចាំ​នៅ​កម្ពុជា​។

  • ភ្នំពេញ៖ កីឡាការិនី​កូន​ខ្មែរ​កាត់​បារាំង វ័យ ១៧ ឆ្នាំ ម៉ា រីយ៉ាន មាន​ចំណង់​ចំណូលចិត្ត​ខ្លាំង​ទៅ​លើ​ប្រភេទ​កីឡា​ប្រយុទ្ធ ពិសេស​ការ​ប្រណាំង​ម៉ូតូ​ហោះ ហើយ​កញ្ញា​បាន​អះអាង​ថា នឹង​មិន​បោះបង់​ចោល​ជំនាញ​នេះ​ឡើយ បើ​ទោះបី​ជា​ប្រភេទ​កីឡា​នេះ មាន​ផល​ប៉ះពាល់ និង​ធ្លាប់​ជួប​ឧបសគ្គ​គ្រោះ​ថ្នាក់​ធំ​​ក៏​ដោយ។

  • ភ្នំពេញៈ តម្លៃ​ពោត​ក្នុង​រដូវ​ប្រមូលផល​ឆ្នាំនេះ​បាន​ស្ទុះ​ឡើង ដោយសារ​តែ​ការកើនឡើង​នៃ​តម្រូវការ​សម្រាប់​ការផលិត​ចំណី​សត្វ​ក្នុងស្រុក​។ ការប្រមូលផល​ពោតក្រហម​នៅក្នុង​ខេត្ត​ត្បូងឃ្មុំ​ពេលនេះ​សម្រេច​បាន​ប្រមាណ ៥០ ​ភាគរយ​ហើយ​ដោយ​តម្លៃ​គ្រាប់ពោត​ស្ងួត​បាន​កើនឡើង​ជិត ២០ ​ភាគរយ​ បើ​ធៀប​នឹង​រយៈពេល​ដូចគ្នា​កាលពី​ឆ្នាំមុន

  • កោះកុងៈ ដី​គម្រប​ព្រៃឈើ​របស់​រដ្ឋ​រាប់ពាន់​ម៉ែត្រការ៉េ​ក្នុង​ទំហំ​ដី​បម្រុង​របស់​រដ្ឋ​ទំហំ​ប្រមាណ​ ១១ ​ហិកតា ស្ថិតនៅ​ភូមិ​កោះស្តេច ឃុំ​កោះ​ស្តេច ស្រុក​គិរីសាគរ ខេត្តកោះកុង​ត្រូវបាន​ជន​មិន​ស្គាល់​អត្តសញ្ញាណ​ចាប់ផ្ដើម​លួច​បោះបង្គោល​ថ្ម និង​ឈើ​ទន្ទ្រាន​យក​ដោយ​ខុសច្បាប់​។

  • កំពង់ស្ពឺៈ ពលរដ្ឋ​ជាង​ ៥០០ ​គ្រួសារ ​រស់នៅក្នុង​ឃុំ​ទួល​អម្ពិល​ស្រុក​បសេដ្ឋ ខេត្តកំពង់ស្ពឺ​បាន​បង្ហាញ​ក្ដីបារម្ភ​ពី​ការខ្វះ​ទឹក​សម្រាប់​ស្រោចស្រព​ស្រែចម្ការ និង​ដំណាំ​ផ្សេងៗ ខណៈ​បច្ចុប្បន្ន​មាន​ឈ្មួញ​យក​ម៉ាស៊ីន​ទៅ​បូមទឹក​ទាំងយប់​ទាំង​ថ្ងៃ​នៅក្នុង​ទំនប់​បុរាណ​ព្រៃពាយ​ដែល​ពួកគាត់​កំពុង​ប្រើប្រាស់​ជាប្រចាំ​។