កែបៈ អាជ្ញាធរខេត្តកែបកំពុងចុះសិក្សាបន្ថែមទៀតលើករណីសាងសង់សំណង់ ១ កន្លែង ដែលគ្រោងអភិវឌ្ឍជាបាងហ្គាឡូ ខណៈអភិបាលខេត្តអះអាងថា ប្រសិនបើគម្រោងនេះប៉ះពាល់ដីសហគមន៍ព្រៃឈើ និងសង់ខុសពីទម្រង់ដើមនោះនឹងមានវិធានការតាមច្បាប់។
កាលពីខែកញ្ញាឆ្នាំនេះ រដ្ឋបាលព្រៃឈើកែបបានចេញសេចក្តីប្រកាសជាលើកទី៣ ដោយព្រមានចាត់វិធានការតាមច្បាប់ចំពោះលោក តោ សុវុឌ្ឍី អាយុ ៥៨ ឆ្នាំ និងជាអាណិកជនខ្មែរមកពីអាមេរិកមានលំនៅក្នុងភូមិក្តីចាស់ សង្កាត់បាក់ខែង ខណ្ឌជ្រោយចង្វារ រាជធានីភ្នំពេញ ដែលបានសាងសង់បាងហ្គាឡូក្នុងដែនដីព្រៃសហគមន៍អ្នកតាឈរ ក្នុងភូមិចម្ការ៣ ឃុំពងទឹក ស្រុកដំណាក់ចង្អើរ ខេត្តកែប។
លោក សោម ពិសិដ្ឋិ អភិបាលខេត្តកែបបានប្រាប់ ភ្នំពេញ ប៉ុស្តិ៍ ថា តាមការសិក្សា ករណីនេះឃើញថា ការសាងសង់សំណង់នេះមួយផ្នែកគឺសង់លើដីកម្មសិទ្ធិស្របច្បាប់របស់លោក តោ សុវុឌ្ឍី តាមប្លង់លេខ ០១ ចេញដោយក្រសួងកសិកម្ម។ ប៉ុន្តែដោយសារម្ចាស់សំណង់រំលោភចូលដីសហគមន៍ព្រៃឈើទើបអាជ្ញាធរផ្អាកសកម្មភាពជាបណ្តោះអាសន្ន។
លោកបញ្ជាក់ថា៖ «យើងកំពុងចុះទៅសិក្សាបន្ថែមទៀតចំពោះករណីនេះថា រឿងនេះ វាយ៉ាងម៉េច? យើងបានឲ្យផ្អាកសកម្មភាពសាងសង់សិន តែបើគាត់នៅតែវាតទីបន្ថែម យើងនឹងមានវិធានការតាមផ្លូវច្បាប់។ អាជ្ញាធរខេត្តកំពុងពិចារណាលើជម្រើស ២ ថា ឲ្យគាត់វាយកម្ទេចចោលលើសំណង់ដែលបានសាងសង់រួច ឬក៏ណែនាំឲ្យគាត់វិនិយោគបន្ត ហើយបំពេញនីតិវិធីបង់ពន្ធចូលរដ្ឋ»។
លោក ថឹង បូរិន ប្រធានមន្ទីរកសិកម្មខេត្តកែបបានប្រាប់ ភ្នំពេញ ប៉ុស្តិ៍ ថា សំណង់នេះ គឺគ្មានច្បាប់អនុញ្ញាតទេ។
បរិវេណដីនោះ ចំណុចខ្លះជាដីមានប្លង់លេខ ០១ ឯចំណុចខ្លះទៀតជាដីសហគមន៍ព្រៃឈើ ហើយការសាងសង់នោះកន្លែងខ្លះចូលដីសហគមន៍ព្រៃឈើ។
លោកថ្លែងថា៖ «អាជ្ញាធរគាំទ្រឲ្យមានការវិនិយោគ និងអភិវឌ្ឍ ប៉ុន្តែត្រូវសុំច្បាប់ជាមុនសិន ពិសេសតំបន់នោះវាពាក់ព័ន្ធទៅនឹងប្រភេទដីដែលគួរអនុវត្តតាមគោលការណ៍របស់ជំនាញ។ យើងនឹងស្នើឲ្យជំនាញមកពិនិត្យលើគម្រោងរបស់គាត់។ យើងឃើញមានការដឹកសម្ភារចូល ហើយយើងនឹងចុះឃ្លាំមើលថាមានការសាងសង់អ្វីបន្ថែមទៀត»។
លោក តោ សុវុឌ្ឍី មិនអាចសុំការអត្ថាធិប្បាយបានទេ ព្រោះទូរស័ព្ទចូលមិនមានអ្នកទទួល។
ប៉ុន្តែបើតាមការបកស្រាយនៅក្នុងកំណត់ហេតុកាលពីខែសីហាលោក តោ សុវុឌ្ឍី បានអះអាងថា នៅពេលទិញដីនេះភ្លាម លោកបានស្នើដូរប្រភេទដីដើម្បីអាចយកមកអភិវឌ្ឍជាតំបន់ទេសចរណ៍ធម្មតា ប៉ុន្តែសំណើនេះក៏ត្រូវបានអូសបន្លាយពេល។ ទន្ទឹមនឹងនេះលោកក៏មិនដឹងថាដីនេះមានបង្គោលរបងរបស់ម្ចាស់មុនត្រឹមណាដែរ ខណៈលោកបន្តប្រើប្រាស់ដីទៅតាមបង្គោលដែលបានបោះទុកមុន។
លោកថា៖ «មុនពេលឈូសឆាយឥតបានទៅជួបជាមួយមន្ត្រីវាស់វែងដីលក្ខណៈជាប្រព័ន្ធនៅភូមិអន្ទង់សឲ្យគាត់ជួយផ្ទៀងផ្ទាត់ព្រំដីទេ។ តែមន្ត្រីវាស់ដីលក្ខណៈជាប្រព័ន្ធបានឆ្លើយថាដី ០១ មិនបាច់វាស់វែងទៀតទេ ម្ចាស់ដីអាចប្រើប្រាស់តាមព្រំដែនបានបោះរួច មិនមានបញ្ហាទេ ដូច្នេះខ្ញុំក៏ចាប់ផ្តើមប្រើប្រាស់សាងសង់ក្យូស ១ និងផ្ទះលម្អែ ៦ ខ្នង ដើម្បីស្នាក់នៅ និងកែលម្អដី»។
លោកស្រី គឹម ចន្នី អភិបាលស្រុកដំណាក់ចង្អើរបានប្រាប់ភ្នំពេញប៉ុស្តិ៍ដែរថា លោក តោ សុវុឌ្ឍី បានទិញដីទំហំជិត ៤ ហិកតាពីលោកស្រី ប៊ុក យ៉ាន កាលពីខែមិថុនា ឆ្នាំ ២០១៩។ ក្រោយមកលោក តោ សុវុឌ្ឍី បានឈូសឆាយដីសហគមន៍ប្រមាណជាង ១ ម៉ឺនម៉ែត្រការ៉េបន្ថែមទៀត ដើម្បីសាងសង់ជាសំណង់រឹងមាំ។
លោកស្រីយល់ថា៖ «ការចុះវាយតម្លៃបន្ថែមទៀតពីក្រុមជំនាញគឺជារឿងប្រសើរ ដើម្បីបានឃើញពីស្ថានភាពជាក់ស្តែងហើយខាងខ្ញុំ ក៏បានរាយការណ៍ទៅថ្នាក់ខេត្តដែរ ហើយបើបានថ្នាក់ខេត្តចុះមកគឺជាការល្អដើម្បីវាយតម្លៃថា ឲ្យគាត់វាយកម្ទេចចោល ឬក៏ឲ្យគាត់ដាក់វិនិយោគជួលពីរដ្ឋមកធ្វើអ៊ីចឹងវិញ។
យើងរកដំណោះស្រាយណាល្អៗទាំងអស់គ្នាទៅ ព្រោះអីបើស្តាប់តាមស្ថានភាពគឺសង់ឡើងដោយអចេតនាទេ»៕