.jpg)
ជនមិនស្គាល់មុខចាក់ដីលុបឆ្នេរសមុទ្រនៅពយជិនទុង ស្រុកស្រែអំបិល ខេត្តកោះកុង។ ហេង ជីវ័ន
កោះកុងៈ លោក សុខ សុទ្ធី អភិបាលរង និងជាអ្នកនាំពាក្យខេត្ដកោះកុងបានឲ្យដឹងកាល ពីម្សិលមិញថា ក្រុមការងារចម្រុះខេត្តគ្រោងនឹងចុះទៅពិនិត្យតំបន់មួយកន្លែងដែលមានការចាក់ដីលុបសមុទ្រជាច្រើនហិកតាត្រង់ចំណុច ពយជិនទុង ស្ថិតក្នុងភូមិជ្រោយស្វាយ ឃុំជ្រោយស្វាយ ស្រុកស្រែអំបិល ខេត្តកោះកុង។
លោក សុខ សុទ្ធី បានថ្លែងកាលពីម្សិលមិញថា៖ «រឿងនេះ មិនមែនទើបតែកើតថ្ងៃនេះទេ វាកើតតាំងពីអាណត្ដិមុនមកប៉ុន្ដែយើងមិនបន្ទោសអ្នកណាទាំងអស់។ ឥឡូវហ្នឹងលោកជំទាវ (អភិបាលខេត្ដកោះកុង) បានចាត់ក្រុមការងារមួយប៉ុន្ដែដោយសារតែសមាសភាពក្រុមការងារទាំងអស់គាត់រវល់ទាល់តែសប្ដាហ៍ក្រោយនឹងមានការចុះទៅមើលថាយ៉ាងម៉េច»។
ទោះជាយ៉ាងណា លោក សុទ្ធី មិនអាចប្រាប់ពីជនខិលខូចដែលចាក់ដីលុបសមុទ្រនោះបានទេ មុនពេលដែលចុះទៅពិនិត្យមើលថា ជាអ្នកណា ការចាក់ដីលុបនោះមានទំហំប៉ុន្មានជាដើម។
លោក មាន ព្រហ្មមុនី មន្រ្តីសម្របសម្រួលសិទ្ធិមនុស្សសមាគមអាដហុក ប្រចាំខេត្តកោះកុង បានថ្លែងពីម្សិលមិញថា ពិតជាមានករណីចាក់ដីលុបសមុទ្រមែន ប៉ុន្ដែមិនទាន់ដឹងថាជារបស់អ្នកណាច្បាស់លាស់នៅឡើយទេ ព្រោះមន្រ្ដីមូលដ្ឋានមិនអាចបកស្រាយករណីនេះបាន។
លោកបានថ្លែងថា៖ «ខ្ញុំធ្វើដំណើរកាត់តាមនោះខ្ញុំឃើញ ការចាក់ដីលុបសមុទ្រនេះ ឃើញលុបនៅដៃសមុទ្រត្រង់ចំណុចព្រៃកោងកាងនៅជ្រោយស្វាយហ្នឹង»។
លោក ព្រហ្មមុនី បានអះអាងថា អាជ្ញាធរខេត្ដកោះកុងមិនដែលចាប់បានជនខិលខូចនោះមកដាក់ទោសទណ្ឌតាមច្បាប់ទេ។
លោក ព្រហ្មមុនី បានបញ្ជាក់ថា ៖ «កន្លងមក យើងអត់ទាន់ឃើញយកអ្នកដែលឃុបឃិតគ្នា យកដីរដ្ឋចែកគ្នានោះមកផ្ដន្ទាទោសតាមច្បាប់ទេ។ ច្បាប់មានជាធរមានហើយ មិនដែលអនុវត្ដទេ។ យើងចង់ឱ្យអាជ្ញាធរខេត្ដកោះកុង អនុវត្ដច្បាប់ឱ្យបានត្រឹមត្រូវឱ្យមានតម្លាភាព»។
លោក ម៉ន ផល្លា ប្រធានមន្ទីរបរិស្ថានខេត្ដកោះកុង បានបញ្ជាក់បន្ថែមថា ម្ចាស់ទីតាំងចាក់ដីលុបសមុទ្រមានប្លង់ដីត្រឹមត្រូវ។
លោកបន្តថា៖ «ខ្ញុំមិនទាន់អាចបញ្ជាក់បានថាដីទីតាំងនោះជារបស់អ្នកណាទេ គ្រាន់តែដឹងថា គេមានប្លង់»។
លោក ទិត សុធា ប្រជាពលរដ្ឋមួយរូបរស់នៅក្នុងភូមិនៃទីតាំងចាក់ដីលុបសមុទ្រនេះ បានឱ្យដឹងថា ការចាក់ដីលុបសមុទ្រនេះ បានកើតឡើងតាំងពីជំនាន់អភិបាលខេត្ដមុនអំឡុងឆ្នាំ ២០១៣ រហូតមកដល់បច្ចុប្បន្ន ហើយក្នុងនាមប្រជាពលរដ្ឋនៅក្នុងសហគមន៍ផ្ទាល់ក៏បានសាកសួរជុំវិញករណីចាក់ដីលុបសមុទ្រនេះដែរ ប៉ុន្ដែមិនមានការឆ្លើយតបណាមួយនោះទេ។
លោកបានឱ្យដឹងថា ផ្ទៃដីដែលចាក់លុបសមុទ្រនោះទំហំប្រមាណ ១០ ហិកតា ចាក់ចូលតាមបណ្តោយឆ្នេរសមុទ្រ ដោយឈ្មោះ ហួរ ហាប់ មានតួនាទីជាមន្ត្រីជាន់ខ្ពស់មួយរូបក្នុងខេត្ដកោះកុង។
លោកថ្លែងថា កន្លងមកតំបន់នេះ គឺជាកន្លែងប្រជាពលរដ្ឋតែងតែចេញចូលរកនេសាទប្រចាំថ្ងៃ តែបច្ចុប្បន្នបានក្លាយជាទីតាំង ត្រូវគេហាមមិនឲ្យប្រជាពលរដ្ឋឆ្លងកាត់ទៀតទេ ដោយគេបានដាក់មនុស្សយាមប្រចាំការប្រមាណជិត ១០ នាក់៕
