កោះកុងៈ អាជ្ញាធរខេត្តកោះកុងបានអះអាងថា ដីដែលចាក់ចូលសមុទ្រនៅសង្កាត់ស្មាច់មានជ័យ ក្រុងខេមរភូមិន្ទ ពីសំណាក់មន្ត្រីយោធាផ្កាយ ២ ត្រូវបានកាយចេញឲ្យមានសភាពដូចដើមវិញហើយខណៈដែលតុលាការកំពុងបន្តនីតិវិធីតាមផ្លូវច្បាប់ ចំពោះបុគ្គលល្មើសរូបនេះ។
លោក សុខ សុទ្ធី អ្នកនាំពាក្យសាលាខេត្តកោះកុងបានប្រាប់ភ្នំពេញប៉ុស្តិ៍កាលពីថ្ងៃទី ២ ខែមករាថា ដីដែលចាក់លុបសមុទ្រដែលមានទទឹង ៣ ម៉ែត្រ និងបណ្តាយ ៤៣ ម៉ែត្រចូលមាត់ព្រែកកោះប៉ោត្រូវបានកាយចេញអស់តាំងពីចុងខែមុន បន្ទាប់ពីបានចុះប្រតិបត្តិការកាលពីថ្ងៃទី ២៣ ខែធ្នូ គឺបានចំណាយពេល ៣ ថ្ងៃ។
លោកបន្តថាជាគោលការណ៍ចំពោះការរំលោភបំពានទាំងនេះគឺត្រូវតែអនុវត្តទៅតាមច្បាប់ ដោយមិនមានបែងចែក ឬលើកលែងនោះទេ។ លោកបញ្ជាក់ថា៖ «ឲ្យតែផ្ទុយនឹងច្បាប់យើងមានចំណាត់ការទាំងអស់។ ក៏គ្មានកន្លែងណាដែលថា យើងមិនមានចំណាត់ការនោះទេ ចំពោះលោក ទុន ដៀត នេះមិនធ្វើអី? គឺឥឡូវហ្នឹង ធំបំផុត យើងចាត់ការតាមច្បាប់អ្នកណាមានទោសអី គឺអនុវត្តទោសតាមច្បាប់»។
លោក អ៊ុន សុវណ្ណធានី អ្នកនាំពាក្យអយ្យការអមសាលាដំបូងខេត្តកោះកុង បានបញ្ជាក់យ៉ាងខ្លីថា សំណុំរឿងចាក់ដីចូលសមុទ្រគឺកំពុងស្ថិតនៅក្នុងដំណាក់កាលនីតិវិធីរបស់តុលាការនៅឡើយ ប៉ុន្តែលោកមិនបានប្រាប់ទេថា តើនឹងមានការកោះហៅបុគ្គល ឈ្មោះ ទុន ដៀតនោះទៅសាកសួរឬយ៉ាងណានោះទេ។
កាលពីថ្ងៃទី ២៣ ខែធ្នូ លោក រស់ សារាំ ព្រះរាជអាជ្ញានៃអយ្យការអមសាលាដំបូងខេត្តកោះកុងបានដឹកនាំអាជ្ញាធរពាក់ព័ន្ធ និងមន្ត្រីជំនាញចុះពិនិត្យទីតាំងខាងលើ ក្រោយពីមានបទបញ្ជាពីលោកនាយករដ្ឋមន្ត្រី ហ៊ុន សែន ដោយក្នុងនោះបានសម្រេចផ្អាកសកម្មភាពបណ្ដោះអាសន្នទៅលើអាជីវកម្មរបស់លោក ទុន ដៀត ជាមន្ត្រីយោធាថ្នាក់ឧត្តមសេនីយ៍ទោ (ផ្កាយ ២) និងតម្រូវឲ្យកាយដីដែលបានចាក់លុបសមុទ្រនៅសង្កាត់ស្មាច់មានជ័យ ក្នុងក្រុងខេមរភូមិន្ទ ខេត្តកោះកុងចេញវិញ។
លោក ទុន ដៀត ត្រូវបានលោក ពេជ្រ ស្រស់ ប្រធានគណបក្សយុវជនកម្ពុជា និងជាសមាជិកឧត្តមក្រុមប្រឹក្សាពិគ្រោះ និងផ្តល់យោបល់ប្តឹងទៅថា្នក់ដឹកនាំដើម្បីឲ្យចាត់វិធានការ ករណីដែលលោកបានចាក់លុបសមុទ្រក្នុងបំណងទន្ទ្រានយកដី។ មិនមានប្រភពទាក់ទងលោក ទុន ដៀត ដើម្បីសុំការបញ្ជាក់ជុំវិញបញ្ហានេះបានឡើយ។
កាលពីថ្ងៃទី ២២ ខែធ្នូលោកនាយករដ្ឋមន្ត្រី ហ៊ុន សែន បានបញ្ជាទៅលោក ជា សុផារ៉ា រដ្ឋមន្ត្រីក្រសួងរៀបចំដែនដី និងអភិបាលខេត្តកោះកុងចាត់វិធានការនាយទាហានផ្កាយ ២ រូបនេះ និងព្រមានដកចេញពីតំណែងផងដែរ បើរកឃើញថា ពិតជាបានចាក់ដីរំលោភយកសមុទ្រមែននោះ។
លោក ប៊ី វ៉ាន់នី មន្ត្រីសម្របសម្រួលសមាគមការពារសិទ្ធិមនុស្ស (Adhoc) ប្រចាំខេត្តកោះកុងបានសាទរចំពោះចំណាត់ការបស់អាជ្ញាធរក្នុងការរំដោះយកតំបន់ឆ្នេរនេះមកវិញ ប៉ុន្តែលោកថាចំពោះបុគ្គលដែលប្រព្រឹត្តសកម្មភាពល្មើសច្បាប់នេះមិនទាន់ត្រូវបានទទួលទោសតាមច្បាប់នោះទេ ក្រៅតែពីការអះអាងថានឹងចាត់វិធានការ។
លោក វ៉ាន់នី ចង់ឃើញរាល់ការបំពានរំលោភយកតំបន់ឆ្នេរ និងរំលោភយកដីសាធារណៈរបស់រដ្ឋទាំងអស់ត្រូវបានចាត់វិធានការ និងយកជនល្មើសមកទទួលទោសតាមច្បាប់ជាពិសេសចំពោះបទល្មើស ដែលធ្វើឡើងដោយមន្ត្រីសាធារណៈរបស់រដ្ឋ។
លោកបន្ថែមថា៖ «យើងចង់ឲ្យអនុវត្តច្បាប់នៅកន្លែងផ្សេងទៀតដែលមានការរំលោភឆ្នេរ និងរំលោភដីរដ្ឋបែបនេះដែរ ហើយយើងចង់ឲ្យមានការស្រាវជ្រាវពីរដ្ឋបាលខេត្តដោយប្រើអំណាចរបស់ខ្លួន ដើម្បីត្រួតពិនិត្យ និងការពារដីរដ្ឋផ្សេងទៀត ដែលនៅមាននៅក្នុងខេត្តកោះកុង។ យើងចង់ឲ្យមានយុត្តិធម៌នៅក្នុងសង្គម ហើយបង្ហាញឲ្យមានភាពស្មើគ្នាមិនចំពោះប្រជាពលរដ្ឋ ឬអ្នកមានអំណាចទេ»។
យោងតាមច្បាប់ភូមិបាលឆ្នាំ ២០០១ ចាប់ពីមាត្រា ១៧ ដល់មាត្រា ១៩ បានចែងបទប្បញ្ញត្តិពីនីតិវិធី និងការការពារទ្រព្យសម្បត្តិរបស់រដ្ឋ ខណៈដែលមាត្រា ២៥៩ នៃច្បាប់នេះបានចែងពីការដាក់ទោសទណ្ឌ ដោយធ្វើការផាកពិន័យជាប្រាក់ចាប់ពី ៥ លាន ដល់ ៥០ លានរៀល និងត្រូវផ្តន្ទាទោសដាក់ពន្ធនាគារពី ១ ឆ្នាំដល់ ៥ ឆ្នាំរាល់បុគ្គលទាំងឡាយណាដែលរំលោភបំពានដីសាធារណៈរបស់រដ្ឋ៕