.jpg)
សេចក្ដីសម្រេចរបស់រដ្ឋបាលខេត្តកំពង់ចាម ស្ដីពីការបិទខ្ទប់ភូមិអកទៀង ស្ថិតនៅក្នុងឃុំតាំងក្រាំង ស្រុកបាធាយ។ រូបថត រដ្ឋបាលខេត្តកំពង់ចាម
កំពង់ចាម៖ អាជ្ញាធរខេត្តកំពង់ចាមនៅថ្ងៃទី ១០ ខែឧសភានេះ បានសម្រេចបិទខ្ទប់ភូមិអកទៀង ស្ថិតនៅក្នុងឃុំតាំងក្រាំង ស្រុកបាធាយ និងផ្អាករោងចក្រមួយកន្លែង រយៈពេល ១៤ ថ្ងៃ បន្ទាប់ពីរកឃើញប្រជាពលរដ្ឋឆ្លងជំងឺកូវីដ ១៩ ចំនួន ៧ នាក់បន្ថែមទៀត។
ក្នុងអំឡុងពេលបិទខ្ទប់នេះ រដ្ឋបាលខេត្តកំពង់ចាមបានណែនាំឱ្យសមត្ថកិច្ចត្រូវរៀបចំកងកម្លាំងការពារ ដើម្បីការពារកុំឱ្យមានការចេញ-ចូល ឱ្យបានសមស្របទៅតាមទំហំការងារ និងរៀបចំឱ្យមានការលក់ដូរម្ហូបអាហារចល័តក្នុងឃុំ ដែលត្រូវបិទខ្ទប់ ១ ថ្ងៃ ១ លើក គឺពីម៉ោង ៨:៣០ ព្រឹក ដល់ម៉ោង ១០ ព្រឹក ឬរៀបចំឱ្យមានការលក់ដូរម្ហូបអាហារនៅតាមព្រំប្រទល់បិទខ្ទប់។
សេចក្តីសម្រេចដែលចុះថ្ងៃទី ១០ ខែឧសភា បញ្ជាក់ថា៖ «សមត្ថកិច្ចត្រូវចាត់មន្ត្រីពាក់ព័ន្ធតាមដានពីសុខភាពប្រជាពលរដ្ឋក្នុងតំបន់បិទខ្ទប់ជាប្រចាំ។ មន្ត្រីមន្ទីរការងារ និងបណ្តុះបណ្តាលវិជ្ជាជីវៈត្រូវស្រាវជ្រាវរកកម្មករ កម្មការិនី ដែលបានប៉ះពាល់ផ្ទាល់ និងប្រយោលជាមួយអ្នកជំងឺកូវីដ ១៩»។
សមត្ថកិច្ចត្រូវត្រួតពិនិត្យគ្រប់គ្រងទីកន្លែងលក់ម្ហូបអាហារ និងកន្លែងលក់ដូរផ្សេងៗ ក្នុងតំបន់បិទខ្ទប់នេះ និងត្រូវរក្សាអនាម័យតាមវិធានការសុខាភិបាល។
រដ្ឋបាលខេត្តបញ្ជាក់ទៀតថា ប្រជាពលរដ្ឋក្នុងមួយគ្រួសារអនុញ្ញាតឱ្យចេញមកទិញម្ហូបអាហារ និងសម្ភារប្រើប្រាស់ផ្សេងៗបានតែម្នាក់ក្នុងមួយសប្តាហ៍ ៣ ដង និងមិនត្រូវអនុញ្ញាតឱ្យលក់ដូរទំនិញ ឬសកម្មភាពអាជីវកម្មគ្រប់ប្រភេទនៅក្នុងតំបន់បិទខ្ទប់ឡើយ។
នៅថ្ងៃទី ១០ ខែឧសភានេះផងដែរ អាជ្ញាធរខេត្តកំពង់ចាមបានសម្រេចផ្អាកសកម្មភាពផលិតកម្មរោងចក្រ លី ឈាងខប ស្ថិតនៅភូមិបាធាយ ឃុំបាធាយ ស្រុកបាធាយ រយៈពេល ១៤ ថ្ងៃ បន្ទាប់ពីរកឃើញកម្មករ-កម្មការិនីមានវិជ្ជមានជំងឺកូវីដ ១៩ ចំនួន ៧ នាក់ ដែលជាប្រជាពលរដ្ឋនៃភូមិអកទៀង ចាប់ពីថ្ងៃទី ១០ ដល់ថ្ងៃទី ២៣ ខែឧសភា។
លោក ឃន ប្រុស អ្នកនាំពាក្យសាលាខេត្តកំពង់ចាមបានប្រាប់ ភ្នំពេញ ប៉ុស្តិ៍ នៅថ្ងៃទី ១០ ខែឧសភានេះថា រដ្ឋបាលខេត្តបានដាក់កម្លាំងការពារនៅតំបន់ដែលមានការឆ្លងជំងឺនេះហើយ ដើម្បីហាមឃាត់ប្រជាពលរដ្ឋមិនឱ្យប្រាស្រ័យទាក់ទងគ្នាពីគ្រួសារមួយទៅគ្រួសារមួយ។
លោកថ្លែងថា៖ «យើងដាក់កម្លាំងបិទខ្ទប់នៅទីនោះ ការពារសន្តិសុខ ហើយយើងផ្សព្វផ្សាយវិធានការអនាម័យឱ្យគាត់មួយថ្ងៃបីដងទៀត ដើម្បីឱ្យគាត់ចូលរួម»។
បើតាមលោក ប្រុស មនុស្សជាង ២០០ នាក់ ដែលបានប៉ះពាល់ជាមួយអ្នកវិជ្ជមានកូវីដ ១៩ ដែលទើបរកឃើញទាំង ៧ នាក់នេះ កំពុងត្រូវបានយកសំណាក។
លោកបន្តថា រោងចក្រ លី ឈាងខប មានកម្មករ-កម្មការិនីចំនួនជាង ១ ០០០ នាក់។
នៅថ្ងៃទី ១០ ខែឧសភានេះផងដែរ រដ្ឋបាលខេត្តកំពង់ចាមបានប្រកាសរកឃើញករណីវិជ្ជមានជំងឺកូវីដ ១៩ ថ្មីចំនួន ១៦ នាក់ បន្ទាប់ពីធ្វើតេស្តយកសំណាកលើមនុស្ស ៦១៨ នាក់។
រដ្ឋបាលខេត្តកំពង់ចាមបានចាត់ឱ្យមន្ទីរសុខាភិបាលបញ្ជូនអ្នកជំងឺទៅសម្រាកព្យាបាលនៅមន្ទីរពេទ្យមេគង្គកំពង់ចាម និងបន្តស្រាវជ្រាវរកអ្នកដែលប៉ះពាល់ដោយផ្ទាល់ និងដោយប្រយោលករណីនេះបន្ថែមទៀត៕
