.jpg)
អាជ្ញាធរខេត្តកំពង់ស្ពឺសម្រេចផ្អាកការប្រារព្ធពិធីអាពាហ៍ពិពាហ៍ និងពិធីជប់លៀង ដើម្បីទប់ស្កាត់កូវីដ ១៩។ រូបថត សហការី
កំពង់ស្ពឺៈ អភិបាលខេត្តកំពង់ស្ពឺលោក វ៉ី សំណាង បានសម្រេចផ្អាកជាបណ្តោះអាសន្ននូវការប្រារព្ធកម្មវិធីអាពាហ៍ពិពាហ៍ ពិធីជប់លៀង និងពិធីជួបជុំផ្សេងៗទៀតដោយយោងលើស្ថានភាពចាំបាច់ខណៈកំពុងមានការរាតត្បាតជំងឺកូវីដ ១៩ ចាប់ពីថ្ងៃទី ១០ ខែ មីនា ឆ្នាំ ២០២១ នេះ រហូតមានការជូនដំណឹងជាថ្មី។
លោក វ៉ី សំណាង បានលើកឡើងក្នុងលិខិតដែលបានផ្ញើទៅកាន់អភិបាលក្រុង និងស្រុកទាំង ៧ ក្នុងខេត្តកំពង់ស្ពឺទាំងអស់នៅថ្ងៃពុធនេះថា ដោយសារស្ថានភាពបច្ចុប្បន្នជំងឺកូវីដ ១៩ ពាក់ព័ន្ធនឹងព្រឹត្តិការសហគមន៍ ២០ កុម្ភៈ បាននិងកំពុងរីករាលដាលក្នុងសហគមន៍គួរឱ្យព្រួយបារម្ភ។
លោកបានបន្ថែមថា៖ «ដើម្បីបង្ការការពារ ការឆ្លងរីករាលដាលនៃជំងឺកូវីដ ១៩ នេះ សូមលោកអភិបាលក្រុង និងស្រុកធ្វើការផ្សព្វផ្សាយណែនាំដល់ប្រជាពលរដ្ឋនៅតាមបណ្តាភូមិ ឃុំ សង្កាត់ ឱ្យផ្អាកជាបណ្តោះអាសន្ននូវកម្មវិធីអាពាហ៍ពិពាហ៍ ពិធីជប់លៀង និងពិធីជួបជុំផ្សេងៗទៀតដែលមានមនុស្សចូលរួមច្រើន»។
លោក វ៉ី សំណាង បានអំពាវនាវទៅដល់ប្រជាពលរដ្ឋទាំងអស់ក្នុងមូលដ្ឋានត្រូវបង្កើនការប្រុងប្រយ័ត្នខ្ពស់ ហើយត្រូវអនុវត្តតាមការណែនាំរបស់រាជរដ្ឋាភិបាលនិងតាមវិធានរបស់ក្រសួងសុខាភិបាល ជាពិសេសវិធានការ «៣ ការពារ និង ៣ កុំ»៕
