.jpg)
សមត្ថកិច្ចបានចាប់ឃាត់ខ្លួនពលរដ្ឋខ្មែរ ១ ក្រុម នៅចំណុចប៉ុស្តិ៍ត្រួតពិនិត្យយាយម៉ៅពេជ្រនិល ខណៈពួកគេកំពុងធ្វើដំណើរតាមផ្លូវល្បឿនលឿនដែលកំពុងសាងសង់។ រូបថត ប៉ូលិស
កំពង់ស្ពឺ៖ ជនជាតិចិន ១៨ នាក់ និង ពលរដ្ឋខ្មែរ ១០ នាក់ ត្រូវបានកម្លាំងសមត្ថកិច្ចនគរបាលខេត្តកំពង់ស្ពឺចាប់ឃាត់ខ្លួន ក្នុងបទល្មើសបំពានលើបម្រាមរបស់អាជ្ញាធរក្នុងការអនុវត្តវិធានការបិទខ្ទប់ការរីករាលដាលនៃជំងឺកូវីដ ១៩។ នេះបើតាមប្រសាសន៍លោក សម សាមួន ស្នងការនគរបាលខេត្តកំពង់ស្ពឺ បានប្រាប់ ភ្នំពេញ ប៉ុស្តិ៍ នៅរសៀលថ្ងៃទី ២៤ ខែមេសានេះ។
លោកថ្លែងថា ករណីឃាត់ខ្លួនក្រុមជនជាតិចិន និងកម្ពុជាសរុប ២៨ នាក់ខាងលើនេះ បានធ្វើឡើងនៅថ្ងៃទី ២៣ ខែ មេសា ឆ្នាំ ២០២១ ក្នុងភូមិសាស្ត្រស្រុកចំនួន ២ គឺស្រុកឧត្តុង្គ និងស្រុកភ្នំស្រួច។ ករណីនៅស្រុកឧត្តុង្គកម្លាំងសមត្ថកិច្ច បានចាប់ឃាត់ខ្លួនមនុស្ស ២០ នាក់ ក្នុងនោះមានជនជាតិចិន ១៨ នាក់ (ប្រុស ១៧ នាក់ និងស្រី ១ នាក់) និងអ្នកបើកបរជនជាតិខ្មែរ ២ នាក់ នៅចំណុចភូមិពោធិ៍កោង ឃុំព្រះស្រែ ខណៈពួកគេបានព្យាយាមធ្វើដំណើរតាមរថយន្តក្រុងរត់គេចពីតំបន់ក្រហមក្នុងសង្កាត់ស្ទឹងមានជ័យ ២ នៃរាជធានីភ្នំពេញ ដែលត្រូវបានបិទខ្ទប់មិនឲ្យធ្វើដំណើរចេញ-ចូល ឬឆ្លងកាត់។
ចំណែកករណីនៅស្រុកភ្នំស្រួច សមត្ថកិច្ចបានចាប់ឃាត់ខ្លួនពលរដ្ឋខ្មែរ ៨ នាក់ នៅចំណុចប៉ុស្តិ៍ត្រួតពិនិត្យយាយម៉ៅពេជ្រនិល ខណៈពួកគេកំពុងធ្វើដំណើរតាមម៉ូតូចំនួន ៣ គ្រឿង គេចចេញពីក្រុងព្រះសីហនុតាមផ្លូវល្បឿនលឿន។
លោកបានបញ្ជាក់ថា៖ «នៅពេលនេះ ក្រុមសមត្ថកិច្ចបានសម្រេចចាប់បញ្ជូនពួកគេទៅកាន់មជ្ឈមណ្ឌលអភិវឌ្ឍន៍ជនបទកម្ពុជា-កូរ៉េ នៅក្រុងច្បារមន ដើម្បីឲ្យគណៈបញ្ជាការឯកភាពរដ្ឋបាលខេត្ដកំពង់ស្ពឺអនុវត្តវិធានការផាកពិន័យអន្ដរការណ៍ទៅតាមនីតិវិធីច្បាប់»។
លោកបានបន្ថែមថា បច្ចុប្បន្នជនជាតិចិនទាំង ១៨ នាក់ ត្រូវបានក្រុមការងាររបស់រដ្ឋបាលខេត្ដកំពង់ស្ពឺ ធ្វើការផាកពិន័យអន្ដរការណ៍ ហើយត្រូវបានប្រគល់ឲ្យទៅក្រុមហ៊ុនរបស់ពួកគេជាអ្នកគ្រប់គ្រង និងអប់រំណែនាំបន្ត។ រីឯអ្នកពាក់ព័ន្ធផ្ដល់មធ្យោបាយ និងសម្រួលក្នុងការប្រព្រឹត្ដល្មើសវិធានការរដ្ឋបាល Lockdown កសាងសំណុំរឿងបញ្ជូនទៅកាន់តុលាការ ដើម្បីចាត់ការបន្តតាមនីតិវិធីច្បាប់។
យោងតាមសេចក្ដីសម្រេចរបស់សាលារាជធានីភ្នំពេញ អ្នកដែលរស់នៅក្នុងតំបន់ក្រហម មិនអនុញ្ញាតឲ្យធ្វើដំណើរចាកចេញពីផ្ទះឡើយ អ្នកបំពាននូវបម្រាម និងវិធានការបិទខ្ទប់នេះ នឹងត្រូវប្រឈមការផាកពិន័យអន្តរកាលពី ១ ទៅ ៥ លានរៀល និងប្រឈមការផ្ដន្ទាទោសជាប់ពន្ធនាគារពី ៦ ខែ ដល់ ១ ឆ្នាំ៕
