កំពតៈ អភិបាលខេត្ដកំពត លោក ជាវ តាយ អះអាងថា ការបោះបង្គោលលើដីសមុទ្រទំហំជាង ១ ហិកតា ស្ថិតនៅសង្កាត់ត្រើយកោះ ក្រុង-ខេត្តកំពត ម្ចាស់ដីពិតជាមានប្លង់ត្រឹមត្រូវតាមច្បាប់ ហើយដីនេះត្រូវបានចេញឲ្យម្ចាស់ដី តាំងពីឆ្នាំ ២០០៨ ដែលសង្គមស៊ីវិលសង្ស័យថា មានអ្វីនៅពីក្រោយការរំលោភយកដីរដ្ឋនេះ។
ការប្រកាសរបស់លោក ជាវ តាយ បែបនេះ ធ្វើឡើងបន្ទាប់ពីក្រុមការងាររបស់រដ្ឋបាលខេត្តកំពត បានបិទបញ្ចប់ការស្រាវជ្រាវរបស់ខ្លួន និងធ្វើសន្និសីទពីម្សិលមិញ និងបានបង្ហាញឯកសារមួយចំនួន ដោយអះអាងថា ម្ចាស់ដីពិតជាបានគ្រប់គ្រងដីនេះ ស្របតាមច្បាប់ឯកសារច្បាប់ត្រឹមត្រូវមែន។
លោក ជាវ តាយ ប្រាប់ភ្នំពេញប៉ុស្តិ៍ពីម្សិលមិញថា៖ «ចង់និយាយថា ទីតាំងគេមានច្បាប់ទម្លាប់ ខ្ញុំមកកាន់ជាអភិបាលខេត្តតាំងពីថ្ងៃ ៥ ខែ ១ ឆ្នាំ ២០១៨ ហើយការងារ (ផ្តល់ឯកសារ) ហ្នឹងតាំងពីខែ ៨ ឆ្នាំ ២០០៨។ រួចឯកសារពាក់ព័ន្ធ គេមានរួចអ៊ីចឹង ចេញពីមន្ទីរជំនាញ។ ពី ២០០៨ ដល់ ២០១៩ ភូមិសាស្ត្រមានការប្រែប្រួល មិនដូចមុនទេ ព្រោះពីមុនវាមានព្រៃ មានដីអ៊ីចឹងទៅ វាប្រែប្រួល មានការមិនដូចស្ថានភាពដើមអ៊ីចឹង»។
ទោះយ៉ាងណាអភិបាលខេត្តនេះបានអះអាងថា លោកកំពុងតែស្វែងរកបុគ្គលដែលប្រកាសលក់ដី ឲ្យមកបំភ្លឺនៅរដ្ឋបាលខេត្ត ជុំវិញដីដែលប្រកាសលក់ ថាបានដីមកពីណា ស្របពេល លោកក៏បានណែនាំឲ្យមន្ត្រីធ្វើការបន្តទៀតថា គួរដកបង្គោលនោះចេញឬយ៉ាងណា ព្រោះតាមផ្លូវច្បាប់ មិនអាចមានកម្មសិទ្ធិនៅលើទឹកទេ។
លោកបញ្ជាក់ថា៖ «ខ្ញុំគ្រាន់តែធ្វើការងារឲ្យវាស្របច្បាប់ បើខុសច្បាប់ យើងចាត់វិធានការ មិនអាចទុកឲ្យអនាធិបតេយ្យ ក្រៅច្បាប់ទេ។ ខ្ញុំអនុវត្តច្បាប់បទដ្ឋានគតិយុត្ត បើអ្វីដែលមានតាមច្បាប់ពីលើមក ខ្ញុំគោរពតាមហ្នឹង។ វាមិនខុសច្បាប់អីទេ ព្រោះយោងទៅច្បាប់ លិខិតអី ព្រោះជំនាន់នោះ ខ្ញុំមិនទាន់មកគ្រប់គ្រងទេ»។
កាលពីអំឡុងពាក់កណ្តាលខែឧសភា មានក្រុមហ៊ុន ១ ឈ្មោះ BLUE STAR REAL ESTATE Co.,Ltd បានផ្សព្វផ្សាយ បង្ហោះលើបណ្តាញសង្គម ជុំវិញការលក់អចលនទ្រព្យ និងលក់ដីដែលបានបោះបង្គោលចូលសមុទ្រ ទំហំជាង ១ ហិកតា ស្ថិតនៅសង្កាត់ត្រើយកោះ ក្រុង-ខេត្តកំពត ដោយអះអាងថា ម្ចាស់ដីមានប្លង់ដីត្រឹមត្រូវ។
ការបង្ហោះរូបប៉ុន្មានសន្លឹក ដែលបង្ហាញពីបង្គោលសសរព្រោងព្រាត នៅក្នុងទឹកសមុទ្រដ៏ធំល្វឹងល្វើយផុតកន្ទុយភ្នែកនេះ ក៏ត្រូវបានអ្នកលេងបណ្តាញទំនាក់ទំនងសង្គម និងមជ្ឈដ្ឋានទូទៅ រិះគន់រហូតឈានដល់មានការបង្កើតក្រុមការងារចម្រុះខេត្ត ដើម្បីចុះស៊ើបអង្កេតជុំវិញបញ្ហានេះ។
ភ្នំពេញប៉ុស្តិ៍មិនអាចទាក់ទងបុគ្គលដែលអះអាងថា ជាម្ចាស់មានប្លង់រឹងត្រឹមត្រូវនោះបានទេ ពីម្សិលមិញ ព្រោះទូរស័ព្ទមិនមានអ្នកទទួល។ លោក យិន វុធ ប្រធានមន្ទីររៀបចំដែនដី នគរូបនីយកម្ម និងសំណង់ខេត្តកំពត សុំមិនធ្វើការអត្ថាធិប្បាយជុំវិញបញ្ហានេះ ដោយអះអាងថា រដ្ឋាបាលខេត្តកំពតបានធ្វើការបកស្រាយរួចហើយ។
លោកបញ្ជាក់ថា៖ «ចៅហ្វាយខេត្តបានបកស្រាយព្រឹកមិញអស់ហើយ»។
លោក ប៊ី វណ្ណី មន្ត្រីអង្កេតផ្នែកសិទ្ធិមនុស្សនៃសមាគមការពារសិទ្ធិមនុស្ស (អាដហុក) ប្រចាំខេត្តកំពត ដាក់ការសង្ស័យចំពោះការផ្តល់សិទ្ធិកាន់កាប់ពីស្ថាប័នពាក់ព័ន្ធ ជុំវិញការផ្តល់សិទ្ធិឲ្យមានការកាន់កាប់ដីក្នុងសមុទ្រ។ លោកបន្តថា តាមច្បាប់កម្ពុជា គ្មានបុគ្គលណាអាចគ្រប់គ្រង ឬជាម្ចាស់កម្មសិទ្ធិលើទឹកបានទេ បូករួមក្នុងសមុទ្រ។
លោកបញ្ជាក់ថា៖ «វាជាដីព្រៃ កោងកាង ជាកម្មសិទ្ធិរបស់ទ្រព្យសម្បត្តិរបស់រដ្ឋ ដែលត្រូវតែការពារដីរបស់រដ្ឋ បើសិនជាករណីនេះ គួរតែមានការស្រាវជ្រាវបញ្ជាក់ឲ្យច្បាស់ថា ការធ្វើសម្បទានកម្ម ឬក៏មានការស្នើសុំណាមួយ។ យ៉ាងណាខ្ញុំសូមសំណូមពរថា គួរតែមានការអភិរក្សកន្លែងនេះ ឲ្យមានធនធានចម្រុះសម្រាប់់ទេសចរកម្សាន្តអីវិញ ហើយគួរតែយកត្រឡប់មកវិញ»។
បើតាមលោក ណាក់ សុវណ្ណារី អតីតអភិបាលក្រុងកំពត ដែលបានផ្លាស់ចេញរយៈពេល៣ឆ្នាំហើយនោះ ធ្លាប់បានអះអាងថា នៅក្នុងការគ្រប់គ្រងរបស់ខ្លួន គឺមិនមានការបោះបង្គោលបែបនេះនោះទេ ខណៈលោកមិនធ្លាប់បានដឹងពីការមានប្លង់គ្រប់គ្រងដីក្នុងសមុទ្រក្នុងតំបន់នេះពីមុនមកទេ៕