.jpg)
ទិដ្ឋភាពនៃដៃព្រែកក្បាលរមាសដែលត្រូវបានគេចាក់ដីរំលោភយកដោយខុសច្បាប់។ រូបថត FN
កំពតៈ លោក ជាវ តាយ អភិបាលខេត្តកំពតបានបញ្ជាឲ្យអាជ្ញាធរស្រាវជ្រាវរកអ្នកចាក់ដីរំលោភយកដៃព្រែកក្បាលរមាសដោយខុសច្បាប់ ដើម្បីយកមកទទួលខុសត្រូវចំពោះមុខច្បាប់ ជាមួយនឹងការព្រមានដល់អាជ្ញាធរមូលដ្ឋាន ឲ្យទទួលខុសត្រូវចំពោះមុខច្បាប់ បើបណ្តែតបណ្តោយឲ្យមានការរំលោភបំពានទ្រព្យសម្បត្តិរដ្ឋក្នុងដែនដីរបស់ខ្លួន។
លោក ជាវ តាយ បានចុះទៅពិនិត្យដល់ទីតាំងចាក់ដីលុបព្រែកផ្ទាល់កាលពីថ្ងៃពុធ និងបានបញ្ជាឲ្យមន្ត្រីជំនាញយកគ្រឿងចក្រទៅកាយយកអាចម៌ដីដែលបានចាក់ដីរំលោភជាប់ផ្លូវជាតិលេខ ៣៣ ស្ថិតក្នុងភូមិត្រពាំងធំ ឃុំជុំក្រៀល ស្រុកទឹកឈូ នោះចេញវិញ។
លោកថ្លែងប្រាប់ភ្នំពេញប៉ុស្តិ៍ពីម្សិលមិញថា៖ «ពិនិត្យឃើញថាមានការចាក់ទៅលើប្រឡាយដៃព្រែកអ៊ីចឹង យើងឲ្យកាយចេញ ហើយតាមនីតិវិធីយើងរកម្ចាស់យកមកណែនាំគាត់ឲ្យគោរពតាមនីតិវិធីច្បាប់។ ការងារនេះ គេកំពុងធ្វើ...យើងមិនអាចទុកឲ្យមានការរំលាភបំពានលើប្រឡាយរបស់រដ្ឋបែបនេះបានទេ»។
លោកបន្តថា ចំពោះជនប្រព្រឹត្តសកម្មភាពល្មើសនេះ បើសិនជាពិនិត្យឃើញមានការរំលោភបំពាន អាជ្ញាធរនឹងមានវិធានការតាមផ្លូវច្បាប់ ប៉ុន្តែលោកមិនបានបញ្ជាក់ទេថាតើជនចាក់ដីរំលោភបំពានព្រែកនេះជានរណា? ដោយគ្រាន់តែថ្លែងថា រង់ចាំការស្រាវជ្រាវចប់សព្វគ្រប់សិន។ «នេះគឺទើបតែចាក់ថ្មីៗនេះទេគ្រាន់តែឃើញមានការរំលោភ យើងសុំឲ្យឈប់ជាបន្ទាន់»។
លោក ជាវ តាយ បានណែនាំឲ្យអាជ្ញាធរនៅតាមបណ្តាក្រុង ស្រុក និងគ្រប់បណ្តាឃុំ សង្កាត់ទាំងអស់ត្រូវគោរពនូវអ្វីដែលជាគោលការណ៍ច្បាប់ ដើម្បីការពារនូវអ្វីដែលជាកម្មសិទ្ធិរបស់រដ្ឋ ដោយមិនត្រូវឲ្យមានការរំលោភបំពានណាមួយកើតឡើងនោះទេហើយបើបណ្តែតបណ្តាយឲ្យមានករណីបែបនេះកើតឡើង នោះអាជ្ញាធរនៅមូលដ្ឋានត្រូវតែទទួលខុសត្រូវចំពោះមុខច្បាប់។
បើតាមលោក សូ ប៊ុនធឿន អធិការរងស្រុកទឹកឈូបានឲ្យដឹងពីម្សិលមិញថា តាមការចុះផ្ទាល់របស់លោកទំហំនៃការចាក់ដីរំលាភចូលព្រែកក្បាលរមាស គឺមានចន្លោះពី ៤០ ទៅ ៥០ ម៉ែត្រ ខណៈដៃប្រឡាយទឹកចាស់មួយអែបថ្នល់ជាតិមានទំហំពី ៧ ទៅ ៨ ម៉ែត្រត្រូវបានចាក់លុបទាំងស្រុង។
លោកបន្តថា៖ «កិច្ចការហ្នឹង ខ្ញុំបានទទួលគ្រប់គ្រងគ្រឿងចក្រដែលចូលកាយហ្នឹង ប៉ុន្តែកាយបានប្រហែល ១៦ ឡានក៏ទទួលបានបញ្ជាពីថ្នាក់លើឲ្យផ្អាកវិញសិនយើងក៏ផ្អាកទៅ។ ប៉ុន្តែខ្ញុំមិនដឹងដែរ ថាមកពីមូលហេតុអ្វីបានមានការបញ្ជាឲ្យផ្អាកវិញហ្នឹង។ ខ្ញុំជាថ្នាក់ក្រោម ខ្ញុំដឹងតែការពារ និងធ្វើតាមបញ្ជាថ្នាក់លើអ្វីផ្សេងៗខ្ញុំមិនដឹងទេ»។
លោក ប៊ុនធឿន ក៏មិនអាចបញ្ជាក់ពីអត្តញ្ញាណរបស់ជនដែលបានចាក់ដីរំលោភព្រែករបស់រដ្ឋនេះដែរដោយគ្រាន់តែថ្លែងថា បុគ្គលនោះមិនមែនជាអ្នករស់នៅក្នុងខេត្តកំពតនោះទេ គឺជាអ្នករស់នៅភ្នំពេញ។
លោក អ៊ុប សុវណ្ណចាន់ថន មន្ត្រីអង្កេតនៃអង្គការសិទ្ធិមនុស្សលីកាដូ ប្រចាំខេត្តកំពត និងកែប ថ្លែងថាជនដែលហ៊ានចាក់ដីរំលោភយកព្រែករដ្ឋនេះអាចមានអ្នកមានអំណាចនៅពីក្រោយ។ លោកបារម្ភថា វិធានការទប់ស្កាត់ ឬកាយដីចេញពីព្រែកនេះវិញអាចនឹងមិនមានប្រសិទ្ធភាព បើមិនមានការតាមដាន ឬមិនមានឆន្ទៈ ព្រោះអាចធ្វើបានតែមួយរយៈក៏មានការបន្តចាក់ដីលុបបន្តទៀត នៅពេលដែលស្ថានភាពស្ងប់ស្ងាត់ទៅវិញ។
លោកបញ្ជាក់ថា៖ «ពាក់ព័ន្ធនឹងការរំលោភយកធនធានធម្មជាតិរបស់រដ្ឋនេះ វាផ្ទុយទៅនឹងច្បាប់រួចទៅហើយបើសិនបុគ្គលហ្នឹងគាត់ដឹងថា ការបំពានទៅលើធនធានធម្មជាតិរបស់រដ្ឋខុសច្បាប់ហើយនៅតែបន្តប្រព្រឹត្តទៀត យើងមានតែស្នើសុំដល់អាជ្ញាធរពាក់ព័ន្ធជាពិសេសតុលាការ មេត្តាចាត់វិធានការទៅលើបុគ្គលនោះឲ្យស្របទៅតាមច្បាប់។ យើងកុំទុកគំរូអាក្រក់ដល់អ្នកក្រោយទៀត ព្រោះអីការបំពានរំលោភចាក់ដីលុបព្រែកនេះ វាក៏ប៉ះពាល់ដល់ព្រៃកោងកាង ឬក៏ធនធានធម្មជាតិនានាផងដែរ»៕
