.jpg)
សកម្មភាពដាំកូនឈើឡើងវិញពីថ្ងៃទី ១៤ ឧសភា។ រូបថត រដ្ឋបាលខេត្ត
កោះកុងៈ អភិបាលខេត្ដកោះកុងលោកស្រី មិថុនា ភូថង បានចាប់ផ្ដើមដាំកូនឈើប្រណីតៗក្នុងតំបន់ដែលត្រូវជនខិលខូចកាប់ទន្ទ្រាននាពេលកន្លងមកដើម្បីរំឭកដល់ពលរដ្ឋ និងសាធារណជនឱ្យបញ្ឈប់សកម្មភាពល្មើសយកដីព្រៃដីអភិរក្សរបស់រដ្ឋធ្វើជាកម្មសិទ្ធិបន្តទៀត ខណៈកម្ពុជាកំពុងថែរក្សាព្រៃឈើដែលសេសសល់សម្រាប់កូនចៅជំនាន់ក្រោយ។ នេះបើតាមអ្នកនាំពាក្យរដ្ឋបាលខេត្ដកោះកុង។
លោក សុខ សុទ្ធី អភិបាលរង និងជាអ្នកនាំពាក្យរដ្ឋបាលខេត្ដកោះកុងបានឱ្យដឹងថា កាលពីថ្ងៃទី ១៤ ខែឧសភាថា លោកស្រី មិថុនា ភូថង បានដឹកនាំមន្ដ្រីរដ្ឋបាលខេត្ដចុះដាំកូនឈើបាន ២១០ ដើម នៅតំបន់ការពារអភិរក្សភូមិត្រពាំងឈើត្រាវ ឃុំឫស្សីជ្រំ ស្រុកថ្មបាំង លើផ្ទៃដីជិត ២ ហិកតា ក្នុងចំណោមទំហំផ្ទៃដីរងផលប៉ះពាល់ជាង ២០ ហិកតាដោយការកាប់ទន្ទ្រានពីជនខិលខូចនាពេលកន្លងមក។
លោកថ្លែងថា៖ «យើងដាំដើមឈើនេះគឺជាសារមួយផ្ញើដល់ពលរដ្ឋ និងសាធារណជនឱ្យបញ្ឈប់ការរុករានយកដីព្រៃការពារធម្មជាតិបន្តទៅទៀត ព្រោះថា ព្រៃឈើផ្តល់អត្ថប្រយោជន៍ជាច្រើនដល់មនុស្សលោកហើយក៏ត្រូវឱ្យមនុស្សការពារព្រៃឈើវិញដែរ»។
បើតាមលោក សុខ សុទ្ធី រដ្ឋបាលខេត្ដកោះកុងមានផែនការបណ្ដុះកូនឈើប្រណីតជាច្រើនទៀតសម្រាប់យកទៅដាំនៅទីតាំងដីដែលរងការកាប់រាននាពេលកន្លងមកតាមបណ្ដាស្រុកផ្សេងទៀតក្នុងខេត្ដកោះកុង។ បច្ចុប្បន្នរដ្ឋបាលខេត្ដកំពុងបោះបង្គោលកំណត់ព្រំប្រទល់តំបន់ការពារធនធានធម្មជាតិ និងតំបន់អភិរក្សក្នុងខេត្ដ ដើម្បីងាយស្រួលគ្រប់គ្រង។
លោកស្រី អភិបាលខេត្ដកោះកុងថ្លែងក្នុងពេលចុះដាំកូនឈើនេះថា រដ្ឋបាលខេត្ត និងមន្ទីរជំនាញបានវាស់វែងធ្វើទិន្នន័យជាក់លាក់រួចរាល់ពីតំបន់អភិរក្ស និងតំបន់ការពារធម្មជាតិ ដែលពលរដ្ឋរស់នៅអាស្រ័យផលជាក់ស្តែងដើម្បីកាត់ឆ្វៀលជូនពលរដ្ឋ។ «ដូច្នេះយើងសុំចិត្តបងប្អូនពលរដ្ឋមួយចំនួនតូចកុំបន្តកាប់ទន្ទ្រានព្រៃខុសច្បាប់»។
លោក ហ៊ុន ម៉ារ៉ាឌី ប្រធានមន្ទីរបរិស្ថានខេត្តកោះកុងបានឱ្យដឹងពីម្សិលមិញថា កូនឈើដែលបានដាំស្តារឡើងវិញនេះ ជាប្រភេទ ឈើប្រណីតមាន គ្រញូង ផ្ចិក នាងនួន កកោះ ជាដើម ។
លោកថា៖ «ការដាំដើមឈើនេះ គឺដើម្បីឱ្យមានគម្របព្រៃឈើឡើងវិញ ដែលបានផ្តួចផ្ដើមរៀបចំឡើងដោយលោកជំទាវអភិបាលខេត្ដ។ ក្រុមការងារមន្ទីរបរិស្ថាន និងមន្ទីរកសិកម្ម រុក្ខាប្រមាញ់ និងនេសាទខេត្ដយើង ក៏មានផែនការបណ្ដុះកូនឈើបន្ថែមសម្រាប់ដាំនៅតំបន់ដែលរងការកាប់រានផ្សេងទៀតដែរ»។
លោក ម៉ារ៉ាឌី បានឱ្យដឹងថា បច្ចុប្បន្ននេះសកម្មភាពទន្ទ្រានដីព្រៃក្នុងតំបន់ការពារ និងតំបន់អភិរក្សគឺមិនមានទ្រង់ទ្រាយធំទេ ប៉ុន្ដែនៅមានជាលក្ខណៈគ្រួសារ។
លោក ថោង ច័ន្ទដារ៉ា មន្ដ្រីសម្របសម្រួលសមាគមសិទ្ធិមនុស្ស អាដហុកប្រចាំខេត្តកោះកុងលើកឡើងថា សកម្មភាពដាំកូនឈើឡើងវិញនៅលើដីដែលជនល្មើសកាប់រាននេះ គឺជាការល្អ ប៉ុន្ដែគ្រាន់តែជាការបង្ហាញសកម្មភាពរយៈពេលខ្លីមិនអាចឱ្យជនល្មើសបញ្ឈប់សកម្មភាពបានទេ។
លោកថា៖ «តាមរយៈព័ត៌មានទទួលបានពីពលរដ្ឋនៅមូលដ្ឋានផង និងខ្ញុំឃើញដោយផ្ទាល់ផង សកម្មភាពការកាប់រានទន្ទ្រានដីព្រៃរបស់រដ្ឋយកធ្វើជាកម្មសិទ្ធិគឺកើតមានច្រើនក្នុងខេត្ដកោះកុង។ សកម្មភាពភាគច្រើនគឺមានការឃុបឃិតគ្នាជាប្រព័ន្ធចាប់ពីមន្ដ្រីមូលដ្ឋានឡើងទៅ»។
រដ្ឋមន្ដ្រីក្រសួងបរិស្ថាន លោក សាយ សំអាល់ កាលពីថ្ងៃទី ១០ ខែឧសភាថ្មីៗនេះធ្លាប់បានរំឭកដល់អភិបាលរាជធានី-ខេត្ដ ពិសេសខេត្ដចំនួន ២១ ដែលមានផ្ទៃដីក្នុងតំបន់ការពារធម្មជាតិទំហំ ៧,៣ លានហិកតាឱ្យមោឃភាពឯកសារកាន់កាប់ និងការផ្ទេរសិទ្ធិលើដីធ្លីដែលចុះហត្ថលេខាដោយរដ្ឋបាលឃុំ-សង្កាត់ និងត្រូវអនុវត្ដវិធានការច្បាប់ បន្ទាប់ពីក្រសួងរកឃើញមានករណីបែបនេះ កើតឡើងនាពេលថ្មីៗ៕
