តាកែវៈ អភិបាលខេត្តតាកែវបានប្រាប់មន្ត្រីជំនាញ និងអាជ្ញាធរស្រុកក្នុងមូលដ្ឋានខេត្តនេះឱ្យដោះស្រាយលើបញ្ហាពលរដ្ឋយក ចិញ្ចើមផ្លូវជាតិធ្វើអាជីវកម្មដាក់លក់ទំនិញផ្សេងៗ និងដោះស្រាយ ផលប៉ះពាល់ផ្សេងៗ ដើម្បីធ្វើយ៉ាងណាឱ្យមានសណ្តាប់ធ្នាប់ និងរបៀបរៀបរយល្អ។
លោក អ៊ួច ភា អភិបាលខេត្តតាកែវប្រាប់ ភ្នំពេញ ប៉ុស្តិ៍ កាលពីថ្ងៃទី ៧ ខែមីនា ថា រដ្ឋបាលខេត្តបាននិងកំពុងសហការជាមួយនឹងអាជ្ញាធរមូលដ្ឋានដែលស្ថិតនៅតាមបណ្តោយផ្លូវនានាក្នុងទីប្រជុំជន។ ជាពិសេសផ្លូវជាតិលេខ ២ និងលេខ ៣ រៀបចំសណ្តាប់ធ្នាប់ឱ្យបានល្អ ព្រោះមានប្រជាពលរដ្ឋមួយចំនួនបានយកចំណីផ្លូវធ្វើអាជីវកម្ម ឬលក់ដូរនូវទំនិញផ្សេងៗ។
លោក អ៊ួច ភា ថ្លែងថា ប្រជាពលរដ្ឋមានការលក់ដូរ ឬសាងសង់រោងនៅលើចំណីផ្លូវជាតិ ព្រោះវាប៉ះពាល់ដល់សណ្តាប់ធ្នាប់សាធារណៈ និងគ្រោះថ្នាក់ចរាចរណ៍នានា។ ប៉ុន្តែអាជ្ញាធរបានហាមឃាត់ និងអប់រំបានតែក្នុងរយៈពេលខ្លីប៉ុណ្ណោះ ហើយនៅពេលមន្ត្រីចេញបាត់ គឺពួកគេត្រឡប់មកវិញដដែល។
ទោះបីជាយ៉ាងណាលោកអភិបាលខេត្តបញ្ជាក់ថា ក្នុងនាមរដ្ឋបាលខេត្តនឹងខិតខំដោះស្រាយក៏ដូចជាព្យាយាមពន្យល់ អប់រំប្រជាពលរដ្ឋដើម្បីឱ្យពួកគេចូលរួមសហការជាមួយអាជ្ញាធរ ហើយឈប់លក់នៅលើដីចំណីផ្លូវក៏ដូចជាហាមឃាត់មិនឲ្យមានការសាងសង់រោងនៅលើគម្របលូតាមបណ្តោយផ្លូវជាតិនេះតទៅទៀត។
លោក អ៊ួច ភា ថ្លែងថា៖ «យើងកំពុងពិនិត្យ និងដោះស្រាយជាបន្តបន្ទាប់នៅទីប្រជុំជន ជាពិសេសនៅតាមដងផ្លូវ ព្រោះអានេះជាការព្រួយបារម្ភ។ យើង ដឹងហើយ ប្រជាពលរដ្ឋរបស់យើងចូលចិត្តលក់នៅតាមចិញ្ចើមថ្នល់ អ៊ីចឹងបានយើងឱ្យអាជ្ញាធរចុះពិនិត្យ ដើម្បីធ្វើយ៉ាងម៉េចរៀបចំឱ្យមានសណ្តាប់ធ្នាប់»។
លោក អ៊ុំ អ៊ួក សមាជិកក្រុមប្រឹក្សាខេត្តតាកែវថ្លែងក្នុងកិច្ចប្រជុំក្រុមប្រឹក្សាខេត្តលើកទី២១ អាណត្តិទី៣ កាលពីថ្ងៃទី ៤ មីនា ថា ពលរដ្ឋដែលរស់នៅតាមបណ្តោយផ្លូវជាតិលេខ ៣ និងលេខ ២ បានយកចិញ្ចើមផ្លូវសម្រាប់ដាក់លក់អីវ៉ាន់ផ្សេងៗ ដូចជាធុងទឹកកក ឬ ធុងទឹកអំពៅជាដើម។ នេះអាចបង្កឱ្យមានផលប៉ះពាល់ដល់សណ្តាប់ធ្នាប់សាធារណៈ និងគ្រោះថ្នាក់ចរាចរណ៍កើតឡើងជាយថាហេតុ។
លោកថ្លែងថា ផ្លូវជាតិលេខ ៣ គ្រោងនឹងបញ្ចប់គម្រោងសាងសង់រួចរាល់ស្ថាពរនៅខែកញ្ញា ឆ្នាំ ២០២១ និងជាផ្លូវល្បឿនលឿនទាមទារឱ្យមានការរៀបចំសណ្តាប់ធ្នាប់នៅតាមដងផ្លូវ ដើម្បីធានាបាននូវសុវត្ថិភាពជូនពលរដ្ឋ ដែលធ្វើដំណើរ និងឆ្លងកាត់។ ក្នុងនោះខេត្តតាកែវគ្រប់គ្រងផ្លូវជាតិលេខ ៣ ចំនួន ៣០ គីឡូម៉ែត្រ ប៉ុន្តែប្រជាពលរដ្ឋដែលរស់នៅតាមដងផ្លូវ គឺពួកគេលក់នៅលើចិញ្ចើមផ្លូវ និងដាក់អីវ៉ាន់ផ្សេងៗ។
លោក អ៊ុំ អ៊ួក ថ្លែងថា៖ «វាជាបញ្ហាមួយដែលទាមទារឱ្យគណៈអភិបាលខេត្ត និងស្រុកជាប់ដងផ្លូវជាតិនេះរៀបចំសណ្តាប់ធ្នាប់ និងហាមឃាត់ពួកគាត់មិនឱ្យលក់នៅតាមដងផ្លូវយ៉ាងអនាធិបតេយ្យបន្តទៀត។ ពីព្រោះវាអាចបង្កទៅជាបញ្ហាធំទៅថ្ងៃខាងមុខទាក់ទងនឹងការរំលោភដីចំណីផ្លូវនេះ»។
តាមសមាជិកក្រុមប្រឹក្សារូបនេះផ្លូវជាតិលេខ ២ គ្រោងនឹងបញ្ចប់នៅឆ្នាំ ២០២២ ក្នុងខែមេសា។ ប៉ុន្តែផ្លូវនេះមិនមានស្លាកសញ្ញាការដ្ឋានគ្រប់គ្រាន់។ ម្យ៉ាងទៀតការស្រោចទឹករបស់ក្រុមហ៊ុនក៏មិនទាន់ស្រោចបានពេញលេញ ដែលនេះក៏ត្រូវទាមទារការដោះស្រាយឱ្យបានលឿនផងដែរ។
លោក ខន សុខា អ្នកដំណើរឆ្លងកាត់ផ្លូវជាតិលេខ ៣ ថ្លែងថា ការយកចិញ្ចើមផ្លូវដាក់លក់ទំនិញផ្សេងៗរបស់ពលរដ្ឋដែលរស់នៅតាមផ្លូវនេះ មិនមែនមានតែនៅមូលដ្ឋានខេត្តតាកែវទេ គឺស្ទើរតែមានគ្រប់ទីកន្លែងក្នុងប្រទេស ប៉ុន្តែអាជ្ញាធរមិនសូវជាអើពើទេ។
ទោះជាយ៉ាងណាលោក ខន សុខា គាំទ្រអាជ្ញាធរខេត្តតាកែវដែលបានយកចិត្តទុកដាក់ដោះស្រាយលើការយកចិញ្ចើមផ្លូវដាក់លក់ទំនិញនេះ។ លោកជំរុញឱ្យខេត្តផ្សេងៗមានវិធានការដែរ ព្រោះបើមិនណែនាំ ឬអប់រំពលរដ្ឋកុំឱ្យដាក់លក់ទំនិញទេ វានឹងអាចប៉ះពារបង្កឱ្យមានគ្រោះថ្នាក់ចរាចរណ៍ និងបាត់បង់សណ្តាប់ធ្នាប់នៅលើដងផ្លូវ៕