.jpg)
លោក ជាម ច័ន្ទសោភ័ណ អភិបាលខេត្តត្បូងឃ្មុំ ថ្លែងនាពេលកន្លងមក។ រូបថត រដ្ឋបាលខេត្តត្បួងឃ្មុំ
ត្បូងឃ្មុំ៖ រដ្ឋបាលខេត្តត្បូងឃ្មុំ សម្រេចបន្តពង្រឹងការអនុវត្តវិធានការបិទខ្ទប់ ដើម្បីទប់ស្កាត់ការឆ្លងរាលដាលជំងឺកូវីដ ១៩ រយៈពេល៨ ថ្ងៃថែមទៀត ដោយផ្អាកការលក់គ្រឿងស្រវឹង និងតម្រូវឲ្យភោជនីយដ្ឋាន និងកន្លែងលក់របស់ទទួលទានទាំងអស់ក្នុងមូលដ្ឋានខេត្តត្បូងឃ្មុំ ត្រូវផ្អាកទទួលភ្ញៀវចូល តែអាចលក់ជាលក្ខណៈវេចខ្ចប់បាន។
បើតាមអភិបាលខេត្តត្បូងឃ្មុំ លោក ជាម ច័ន្ទសោភ័ណ មានបងប្អូនប្រជាពលរដ្ឋ និងម្ចាស់អាជីវកម្មមួយចំនួននៅតែបន្តបំពានគោលការណ៍ណែនាំ ហេតុនេះទើបរដ្ឋបាលខេត្តត្រូវបន្តការពង្រឹងអនុវត្តវិធានការទប់ស្កាត់ការឆ្លងរីករាលដាលជំងឺកូវីដ ១៩ បន្ថែមទៀត។
លោកថ្លែងថា៖ «ពលរដ្ឋមួយចំនួនតូចនៅតែមិនអនុវត្តកាតព្វកិច្ចរក្សាគម្លាត។ លួចលាក់ប្រមូលផ្តុំ កំបាំងភ្នែកសមត្ថកិច្ច និងណាត់គ្នាជួបជុំ ទទួលទានគ្រឿងស្រវឹងនាំឲ្យបាត់បង់ស្មារតីភ្លេចការការពារខ្លួន និងធ្វេសប្រហែសមិនអនុវត្តវិធានការការពារការឆ្លងរាលដាលជំងឺកូវីដ ១៩ ដែលនេះ គឺជាហានិភ័យយ៉ាងធ្ងន់ធ្ងរសម្រាប់ក្រុមគ្រួសារ និងសង្គមជាតិទាំងមូល»។
តាមរយៈសេចក្តីណែនាំ ស្តីពីការបន្តពង្រឹងអនុវត្តវិធានការទប់ស្កាត់ការឆ្លងរីករាលដាលនៃជំងឺកូវីដ ១៩ អភិបាលខេត្តត្បូងឃ្មុំបញ្ជាក់ថា គ្រប់ផ្សាររដ្ឋ និងផ្សារឯកជន ផ្សារម៉ាត ភោជនីយដ្ឋាន អាហារដ្ឋាន តូបអាហារ ហាងកាហ្វេ ហាងភេសជ្ជៈ និងអាជីវកម្មផ្នែកអាហារ ភេសជ្ជៈ គ្រប់ប្រភេទ ត្រូវផ្អាកបណ្តោះអាសន្ននូវការលក់គ្រឿងស្រវឹងគ្រប់ប្រភេទ ដោយបន្តរយៈពេល ៨ ថ្ងៃបន្ថែមទៀត ចាប់ពីថ្ងៃទី ២៨ ខែមេសា ដល់ថ្ងៃទី ៥ ខែ ឧសភា ឆ្នាំ ២០២១។
លោកថ្លែងថា៖ «ប៉ុន្តែអាចប្រកបអាជីវកម្មលក់ដូរជាលក្ខណៈវេចខ្ចប់បាន»។
លោកអភិបាលខេត្ត បានប្រាប់ទៅប្រធានមន្ទីរពាណិជ្ជកម្មខេត្ត មន្ទីរទេសចរណ៍ខេត្ត និងអាជ្ញាធរមូលដ្ឋានគ្រប់លំដាប់ថ្នាក់ ត្រូវសហការចុះពិនិត្យតាមបណ្តាគោលដៅផ្សាររដ្ឋ និងផ្សារឯកជន ផ្សារម៉ាត ភោជនីយដ្ឋាន អាហារដ្ឋាន តូបអាហារ ហាងកាហ្វេ ហាងភេសជ្ជៈ និងអាជីវកម្មផ្នែកអាហារ ភេសជ្ជៈគ្រប់ប្រភេទ ដើម្បីអនុវត្តតាមខ្លឹមសារនៃសេចក្តីណែនាំបន្ថែមនេះ។
លោកបញ្ជាក់ថា៖ «ក្នុងករណីរកឃើញថា គណៈគ្រប់គ្រងផ្សារ ឬម្ចាស់អាជីវកម្មដ្ឋានណាមួយ មិនព្រមអនុវត្តត្រូវធ្វើកិច្ចសន្យាណែនាំលើកទី១ ហើយប្រសិនបើនៅតែបន្តបំពាន ត្រូវអនុវត្តវិធានការរដ្ឋបាល និងវិធានការច្បាប់ ដោយគ្មានការលើកលែងឡើយ»។
លោក ជាម ច័ន្ទសោភ័ណ ក៏បានបញ្ជាឲ្យគណៈបញ្ជាការឯកភាពរដ្ឋបាលក្រុង ស្រុក មន្ទីរអង្គភាពជុំវិញខេត្ត រដ្ឋបាលឃុំ សង្កាត់ ត្រូវបន្តអនុវត្តឲ្យបានម៉ឺងម៉ាត់ នូវវិធានការរដ្ឋបាល ដែលរដ្ឋបាលខេត្តបានដាក់ចេញក្នុងករណីបិទខ្ទប់ទីតាំង ឬភូមិសាស្ត្រ ដែលរកឃើញវិជ្ជមានកូវីដ ១៩។
ជាមួយគ្នានោះ ក៏ត្រូវបន្តការត្រួតពិនិត្យចំពោះប្រជាពលរដ្ឋដែលវិលត្រឡប់ពីបណ្តាប្រទេស ឬតំបន់ហានិភ័យខ្ពស់ចូលមូលដ្ឋានវិញ ដោយត្រូវអនុវត្តវិធានការរបស់ក្រសួងសុខាភិបាលធ្វើចត្តាឡីស័ក ១៤ ថ្ងៃដាច់ខាត៕
