ភ្នំពេញៈ រដ្ឋបាលខេត្ដត្បូងឃ្មុំ ផ្ដល់ឥណទានដល់ពលរដ្ឋចំនួន ៩៦ គ្រួសារ នៅភូមិស្រែលើសែនជ័យ ឃុំជាំក្រវៀន ស្រុកមេមត់ តាមរយៈគម្រោងបែងចែកដីសង្គមកិច្ច និងការអភិវឌ្ឍសេដ្ឋកិច្ច (LASED II) ដែលគាំទ្រមូលនិធិ ពីធនាគារពិភពលោក និងរាជរដ្ឋាភិបាលកម្ពុជា។
លោក ពាង ណារិទ្ធ អភិបាលរងខេត្តត្បូងឃ្មុំប្រាប់ ភ្នំពេញ ប៉ុស្ដិ៍ នៅថ្ងៃទី ៦ ខែឧសភានេះថា តាមរយៈការអនុវត្ដគម្រោងបែងចែកដី ដើម្បីសង្គមកិច្ច និងការអភិវឌ្ឍសេដ្ឋកិច្ច (LASED II) របស់ខេត្តត្បូងឃ្មុំ លោកបានចុះចែកផ្តល់ឥណទានរបស់គម្រោងដល់សមាជិកក្រុមទុនបង្វិល (ឥណទានផ្ដល់ដល់ពលរដ្ឋនៅក្នុងគម្រោង) លើកទី ១ ចំនួន ៦ ក្រុមស្មើនឹង ៩៦ គ្រួសារដែលជាសម្បទានិកស្ថិតនៅក្នុងភូមិស្រែលើសែនជ័យ ឃុំជាំក្រវៀន ស្រុកមេមត់ ខេត្តត្បូងឃ្មុំ។
លោកថ្លែងថា៖ «ការផ្ដល់ឥណទានដល់ប្រជាពលរដ្ឋដែលទទួលបានដី ដើម្បីសង្គមកិច្ច និងការអភិវឌ្ឍសេដ្ឋកិច្ចនេះ គឺទទួលបានការគាំទ្រមូលនិធិពីធនាគារពិភពលោក និងរាជរដ្ឋាភិបាលកម្ពុជា។ ការផ្ដល់ឥណទាននេះ ក្រុមគ្រួសារពលរដ្ឋគោលដៅនៅក្នុងគម្រោងនឹងទទួលបានឥណទានចំនួន ៤០ ម៉ឺនរៀល ឬ ១០០ ដុល្លារសម្រាប់ជាទុនក្នុងការធ្វើកសិកម្ម ដាំបន្លែ និងចិញ្ចឹមសត្វជាដើម»។
ការផ្ដល់ឥណទាននេះ គឺជាការជួយដល់ប្រជាពលរដ្ឋបន្ថែមទៀតក្រៅពីការផ្ដល់ដី ដើម្បីសង្គមកិច្ច និងការអភិវឌ្ឍសេដ្ឋកិច្ច ចំពោះប្រជាពលរដ្ឋក្រីក្រ ក្នុងការទ្រទ្រង់ជីវភាពនៅក្នុងគ្រួសារ និងកាត់បន្ថយការធ្វើចំណាកស្រុក។
លោកបានថ្លែងថា៖ «យើងមានមន្ដ្រីរបស់យើងនៅក្នុងមូលដ្ឋាន ភូមិ ឃុំ ដែលបានផ្ដល់ឥណទាននេះ ដើម្បីតាមដានចំពោះប្រជាពលរដ្ឋដែលទទួលបានឥណទានថាតើគាត់ទទួលបានឥណទានហើយបានយកទៅអនុវត្ដត្រឹមត្រូវតាមការស្នើសុំដែរឬយ៉ាងណា»។
បើតាមលោកអភិបាលរងខេត្តត្បូងឃ្មុំ គម្រោងបែងចែកដីដើម្បីសង្គមកិច្ច និងការអភិវឌ្ឍសេដ្ឋកិច្ចនេះ រដ្ឋបាលខេត្ដបានបែងចែកដីសម្រាប់សង់លំនៅឋាន និងដីកសិកម្មដល់ប្រជាពលរដ្ឋក្រីក្រដែលគ្មានដីពិតប្រាកដ។ ក្រៅពីបែងចែកដី LASED II បានរៀបចំហេដ្ឋារចនាសម្ព័ន្ធ ផ្លូវថ្នល់ សាលារៀន និងបណ្ដុះបណ្ដាលការធ្វើកសិកម្មដល់ប្រជាពលរដ្ឋថែមទៀត៕
