បន្ទាយមានជ័យ: អាជ្ញាធរខេត្តបន្ទាយមានជ័យបានដាក់ឲ្យដំណើរការរថយន្តក្រុងសាធារណៈចំនួន ១៥ គ្រឿង សម្រាប់ដឹកអ្នកដំណើរទៅមករវាងក្រុងប៉ោយប៉ែត និងស្រុកម៉ាឡៃដែលជាអតីតតំបន់ខ្មែរក្រហមដោយអាជ្ញាធរសង្ឃឹមថា ការដាក់ឲ្យដំណើរការរថយន្តក្រុងនេះនឹងជួយសម្រួលដល់ការធ្វើដំណើររបស់ប្រជាពលរដ្ឋ និងថែមទាំងអាចជួយកាត់បន្ថយគ្រោះថ្នាក់ចរាចរណ៍តាមដងផ្លូវផងដែរ។
លោក ឈឿន ក្រៃយ៉ុង នាយករដ្ឋបាលសាលាខេត្តបន្ទាយមានជ័យបានថ្លែងថា អាជ្ញាធរខេត្តបន្ទាយមានជ័យបានដាក់រថយន្តក្រុងសាធារណៈចំនួន ៩ គ្រឿង ដោយចាប់ដំណើរការពីថ្ងៃទី ២២ ខែកុម្ភៈ មក។ ការដាក់ឲ្យដំណើរការរថយន្តក្រុងនេះផ្ដល់សេវាដឹកជញ្ជូនទៅមកក្នុងរយៈចម្ងាយ ៤០ គីឡូម៉ែត្ររវាងស្រុកម៉ាឡៃ និងក្រុងប៉ោយប៉ែតនឹងផ្លាស់គ្នាដឹកជញ្ជូនប្រជាពលរដ្ឋក្នុងរយៈពេល ២០ នាទីម្ដងដោយក្នុង ១ គីឡូម៉ែតមានចំណតមួយ។
លោកបន្តថា ប្រជាពលរដ្ឋអាចធ្វើដំណើរតាមរថយន្តក្រុងសាធារណៈនេះដោយឥតគិតថ្លៃក្នុងរយៈពេល ៣ ខែដំបូង ប៉ុន្ដែបន្ទាប់ពីនោះរថយន្តក្រុងសាធារណៈទៅមករវាងស្រុកម៉ាឡៃ និងក្រុងប៉ោយប៉ែតនេះនឹងចាប់ផ្ដើមគិតថ្លៃ ២ ពាន់រៀលក្នុងអ្នកដំណើរម្នាក់។ ប្រសិនបើដំណើរការនេះទទួលបានជោគជ័យអាជ្ញាធរខេត្តនឹងពិចារណាដាក់ឲ្យដំណើរការរថយន្តក្រុងសាធារណៈជំហានបន្ទាប់ទៀតរវាងក្រុងប៉ោយប៉ែត និងក្រុងសិរីសោភ័ណ។
លោក ក្រៃយ៉ុង បញ្ជាក់ថា៖ «យើងសង្ឃឹមថា សេវារថយន្តក្រុងសាធារណៈនេះនឹងជួយសម្រួលដល់ការធ្វើដំណើររបស់ប្រជាពលរដ្ឋទូទៅកាត់បន្ថយចំណាយ និងកាត់បន្ថយគ្រោះថ្នាក់ចរាចរណ៍តាមដងផ្លូវនៅខេត្តបន្ទាយមានជ័យ។ ខ្ញុំសូមអំពាវនាវឲ្យប្រជាពលរដ្ឋចូលរួមប្រើប្រាស់សេវារថយន្តក្រុងនេះទាំងអស់គ្នា នៅពេលត្រូវធ្វើដំណើរទៅមករវាងក្រុងប៉ោយប៉ែត និងស្រុកម៉ាឡៃ»។
លោកបន្ថែមថា រថយន្តក្រុងសាធារណៈទាំង ៩ គ្រឿងនេះជាការឧបត្ថម្ភរបស់ក្រុមហ៊ុន Galaxy Navatra Group របស់លោក ឡេង ណាវ៉ាត្រា ដែលជាអ្នកជំនួញខាងវិស័យអចលនទ្រព្យ។ បច្ចុប្បន្នស្រុកម៉ាឡៃមានក្រុមហ៊ុនធំ ២ ដែលកំពុងវិនិយោគគឺក្រុមហ៊ុន Galaxy Navatra Group និងក្រុមហ៊ុនវិនិយោគរោងចក្រអគ្គិសនីដើរដោយពន្លឺព្រះអាទិត្យ (សូឡា)។
លោក អ៊ុំ រាត្រី អភិបាលខេត្តបន្ទាយមានជ័យបានបដិសេធធ្វើអត្ថាធិប្បាយកាលពីម្សិលមិញដោយថ្លែងថា កំពុងជាប់រវល់ប្រជុំ។ ប៉ុន្ដែលោកបានថ្លែងក្នុងពិធីសម្ពោធដាក់ដំណើររថយន្តក្រុងកាលពីថ្ងៃទី ២២ ខែកុម្ភៈថា លោកគាំទ្រនិងកោតសរសើរចំពោះទឹកចិត្តរបស់ក្រុមហ៊ុនដែលបានចូលរួមចំណែកជួយឲ្យមានសេវារថយន្តក្រុងបែបនេះនៅខេត្តបន្ទាយមានជ័យ ហើយប្រជាពលរដ្ឋក៏ដូចជាអាជ្ញាធរពិតជាសប្បាយចិត្តខ្លាំងណាស់។
លោកលើកឡើងថា នៅស្រុកម៉ាឡៃ ដំបូងឡើយជាទីតាំងសមរភូមិក្ដៅមួយក្នុងរបបខ្មែរក្រហមដែលមនុស្សមួយចំនួនខ្លាចមិនហ៊ានមកឡើយ ប៉ុន្តែបន្ទាប់ពីប្រទេសមានសន្តិភាព ទីនេះបានក្លាយជាទីប្រជុំជនដែលស្ថិតក្នុងក្រសែភ្នែកវិនិយោគិនជាច្រើនទាំងជាតិ និងអន្តរជាតិ។
លោក ឡេង ណាវ៉ាត្រា នាយកក្រុមហ៊ុន Galaxy Navatra Group មិនអាចទាក់ទងសុំការអត្ថាធិប្បាយបានទេកាលពីម្សិលមិញ។ ប៉ុន្ដែលោកបានសរសេរសារលើហ្វេសប៊ុកផ្លូវការរបស់លោកកាលពីថ្ងៃទី ២២ ខែកុម្ភៈថា៖ «កាន់តែមានភាពងាយស្រួលក្នុងការធ្វើដំណើរទៅមកសម្រាប់បងប្អូននៅស្រុកម៉ាឡៃ និងប៉ោយប៉ែតជាមួយរថយន្តក្រុងចល័តរាល់ ១៥ នាទីម្តងរបស់ទីក្រុងរណប Poipet Satellite City ដែលជាបុត្រសម្ព័នក្រុមហ៊ុន Galaxy Navatra Group របស់ខ្ញុំបាទ។ ដោយរយៈពេល ៣ ខែដំបូងបងប្អូនធ្វើដំណើរគឺពុំបង់ប្រាក់ឡើយ ហើយខ្ញុំពិតជារីករាយណាស់ដែលបានចូលរួមចំណែកក្នុងការអភិវឌ្ឍជាតិ»។
បន្ទាយមានជ័យគឺជាខេត្តដំបូងបង្អស់ដែលមានផ្ដល់សេវារថយន្តក្រុងសាធារណៈ បន្ទាប់ពីរាជធានីភ្នំពេញ។ រាជធានីភ្នំពេញសេវារថយន្តក្រុងសាធារណៈចាប់ផ្ដើមដំណើរការកាលពីខែកញ្ញា ឆ្នាំ ២០១៤ ហើយសាលារាជធានីបានពង្រីកសេវាកម្ម និងបន្ថែមខ្សែរត់ជាបន្តបន្ទាប់។ បើគិតត្រឹមឆ្នាំនេះរថយន្តក្រុងនៅភ្នំពេញមានចំនួន ២៣៥ គ្រឿង រត់លើផ្លូវសរុបចំនួន ១៣ ខ្សែដោយមានអ្នកដំណើរធ្វើដំណើរតាមរថយន្តសាធារណៈនេះ ចន្លោះប្រមាណពីជាង ២ ម៉ឺន ទៅ ៣ ម៉ឺននាក់ក្នុង ១ ថ្ងៃ៕