ពោធិ៍សាត់៖ អាជ្ញាធរខេត្តពោធិ៍សាត់ និងក្រុមហ៊ុន SPHP (Steung Pursat Hydro Power) បានសម្រេចបង្កើតក្រុមការងារបច្ចេកទេស និងលេខាធិការដ្ឋានរួមគ្នាមួយ ដើម្បីអនុវត្តការផ្ដល់សំណង ចំពោះការតាំងទីលំនៅថ្មី ជូនប្រជាពលរដ្ឋ និងការស្ថាបនាហេដ្ឋារចនាសម្ព័ន្ធសាធារណៈ សម្រាប់ប្រជាពលរដ្ឋដែលរងផលប៉ះពាល់ពីគម្រោងវារីអគ្គិនីស្ទឹងពោធិ៍សាត់ ១ ដែលមានទីតាំងក្នុងស្រុកវាលវែង។
លោក ឃុត ឧសុភា នាយករដ្ឋបាលសាលាខេត្តពោធិ៍សាត់ បានប្រាប់ភ្នំពេញប៉ុស្តិ៍នៅថ្ងៃទី ១ ខែតុលា ថា យោងតាមស្មារតីនៃកិច្ចប្រជុំកាលពីថ្ងៃទី ៣០ ខែកញ្ញា ដំណើរការចុះអនុវត្ត ការទូទាត់សំណង ការតាំងទីលំនៅថ្មី ជូនប្រជាពលរដ្ឋ និងការសាងសង់ហេដ្ឋារចនាសម្ព័ន្ធសាធារណៈនៅកន្លែងតាំងទីលំនៅថ្មីសម្រាប់ប្រជាពលរដ្ឋដែលរងផលប៉ះពាល់ពីគម្រោងវារីអគ្គិនីនេះ នឹងចាប់ផ្ដើមនៅក្នុងខែវិច្ឆិកា ខាងមុខ។
តាមការបង្ហាញរបស់លោក KIM MYUNG IL អគ្គនាយកក្រុមហ៊ុន SPHP ការវិនិយោគទៅលើគម្រោងនេះ មានទំហំ ទឹកប្រាក់ជាង ២៣២ លានដុល្លារ ដោយរំពឹងថា នឹងផលិតថាមពលអគ្គិសនីបាន ៨០ មេហ្គាវ៉ាត់បន្ថែមទៀត ដើម្បីផ្គត់ផ្គង់តម្រូវការរបស់អ្នកប្រើប្រាស់។ ជាមួយគ្នានេះក្រុមហ៊ុនក៏បានគិតគូរអំពីថវិកាសម្រាប់ការអនុវត្តវិធានការការពារ បរិស្ថានចំនួន ៨ ៦៨៩ លានដុល្លារ ក្នុងនោះមានមូលនិធិបរិស្ថាននិងសង្គម ៨២៦ ៤៨០ ដុល្លារ សម្រាប់រយៈពេល ៣៥ ឆ្នាំ នៃប្រតិបត្តិការបស់ខ្លួនផងដែរ ។
លោក ឧសុភា បញ្ជាក់ថា៖ «នៅពេលនេះ ក្រុមការងារថ្នាក់ខេត្តយើង កំពុងរៀបចំចុះធ្វើបច្ចុប្បន្នភាពស្ថិតិពលរដ្ឋ ដែលរងផលប៉ះពាល់នៃគម្រោងវារីអគ្គិសនីនេះ និងសិក្សាស្វែងរកទីតាំងដីដែលមានលក្ខណៈអំណោយផលសម្រាប់ការធ្វើកសិកម្មដាំដុះជូនគ្រួសារពលរដ្ឋដែលត្រូវផ្លាស់ទីលំនៅថ្មី ដើម្បីរស់នៅប្រកបដោយភាពសុខដុមនីយកម្ម»។
យោងតាមរបាយការណ៍នៃការសិក្សាវាយតម្លៃផលប៉ះពាល់បរិស្ថាន និងសង្គមរបស់ក្រុមហ៊ុន SAWAC Consultants for Development ដែលបានធ្វើឡើងកាលពីឆ្នាំ ២០១៨ បានរកឃើញថា ការសាងសង់របស់គម្រោងនេះ នឹងធ្វើឲ្យប៉ះពាល់ផ្ទៃដីព្រៃឈើសរុប ជាង ៦០០៧ ហិកតា ក្នុងនោះផ្ទៃដីព្រៃស្រោងសរុបជាង ៨៦៥ ហិកតា ព្រៃពាក់កណ្ដាលស្រោងជាង ៨៥០ ហិកតា និងព្រៃរបោះសរុបជាង ៤ ២៩១ ហិកតា។ ជាមួយគ្នានេះ ក៏មានផលប៉ះពាល់លើដីកសិកម្មរបស់ប្រជាពលរដ្ឋដែលកំពុងអាស្រ័យផលចំនួនជាង ៩៣២ ហិកតា ដីបុស្សជាង ១ ០៦៨ ហិកតា និងដីលំនៅឋានជាង ៣៨ ហិកតា របស់ប្រជាពលរដ្ឋ ៣៤៧ គ្រួសារផងដែរ ។
លោក សេង សុភាណា អភិបាលស្រុកវាលវែងបានប្រាប់ភ្នំពេញប៉ុស្តិ៍នៅថ្ងៃទី ១ ខែតុលា ថា ក្នុងចំណោមប្រជាពលរដ្ឋ ៣៤៧ គ្រួសារ ដែលរងផលប៉ះពាល់ពីគម្រោងវារីអគ្គិសនីស្ទឹងពោធិ៍សាត់ ១ នេះ មានប្រជាពលរដ្ឋប្រមាណជាង ១២០ គ្រួសារប៉ុណ្ណោះ ដែលអាចប្រឈមការផ្លាស់ទីលំនៅថ្មី ដោយដីស្រែចំការ និងដីលំនៅឋានរបស់ពួកគេទាំងអស់ស្ថិតក្នុងតំបន់អនុវត្តគម្រោងសាងសង់វារីអគ្គិសនី ។
លោក សុភាណា ថ្លែងថា៖ «នៅចំពោះមុខអាជ្ញាធរយើងកំពុងស្វះស្វែងរកមើលទីតាំងថ្មីសម្រាប់ផ្ដល់ជូនគ្រួសារដែលរងផលប៉ះពាល់ទាំងស្រុងនៃគម្រោងនេះ»។
បើតាមលោក សុភាណា អ្នកភូមិដែលរងផលប៉ះពាល់ពីគម្រោង បានចាប់អារម្មណ៍ទីតាំងដីសង្គមកិច្ចមួយកន្លែងស្ថិតក្នុងឃុំប្រម៉ោយ ដែលទីនោះងាយស្រួលក្នុងការរៀបចំអភិវឌ្ឍប្រព័ន្ធហេដ្ឋារចនាសម្ព័ន្ធផ្លូវ ទឹក ភ្លើង ហើយវាស្ថិតនៅក្នុងតំបន់ទីប្រជុំជននៃស្រុកវាលវែងផងដែរ។
យ៉ាងណាក៏ដោយ ក្រុមហ៊ុន SAWAC Consultants for Development បានធ្វើការប៉ាន់ប្រមាណតម្លៃនៃសំណងនិងការទូទាត់ផ្សេងៗ ដល់ប្រជាពលរដ្ឋចំនួន៣៤៧គ្រួសារដែលរងប៉ះពាល់ពីគម្រោងនេះសរុបមានទឹកប្រាក់ចំនួនជាង ៦,៨ លានដុល្លារ រួមទាំងការបង្កើតកន្លែងតាំងលំនៅថ្មីសម្រាប់ពលរដ្ឋ ១២៨ គ្រួសារ ផងដែរ ។
គម្រោងសាងសាង់ទំនប់វារីអគ្គិសនីស្ទឹងពោធិ៍សាត់ ១ មានអនុភាពផលិតចរន្តអគ្គិសនីបាន ៨០ មេហ្គាវ៉ាត់ ស្ថិតក្នុងឃុំប្រម៉ោយ ស្រុកវាលវែង។ មកដល់ពេលនេះ ប្រទេសកម្ពុជា មានវារីអគ្គិសនីចំនួន ៧ កន្លែងហើយ រួមមាន វារីអគ្គិសនីស្ទឹងអាតៃ វារីអគ្គិសនីស្ទឹងឫស្សីជ្រុំក្រោម វារីអគ្គិសនីកំចាយ វារីអគ្គិសនីគិរីរម្យ ១ វារីអគ្គិសនីគិរីរម្យ ៣ វារីអគ្គិសនីតាតៃ និងវារីអគ្គិសនីសេសានក្រោម ២ ៕