ព្រះវិហារៈ អាជ្ញាធរខេត្តព្រះវិហារបានដាំកូនឈើគ្រញូង និងបេងជាង ៣ ០០០ ដើមនៅលើផ្ទៃដីជាង ៣១ ហិកតា ស្ថិតនៅចំណុចអូរទួលសុក្រម ក្នុងភូមិឆែបកើត ឃុំឆែបមួយ ស្រុកឆែប បន្ទាប់ពីដកហូតពីក្រុមជនល្មើសកាលពីពេលថ្មីៗនេះ។
លោក សុខ មុនីរិទ្ធ អភិបាលរងស្រុកឆែបបានប្រាប់ភ្នំពេញ-ប៉ុស្តិ៍កាលពីថ្ងៃអាទិត្យថា កាលពីថ្ងៃទី ១៣ ខែ កក្កដា ឆ្នាំ ២០២០ ក្រុមសមត្ថកិច្ចចម្រុះបានរកឃើញករណីឈូសឆាយដីព្រៃអចិន្រៃ្តយ៍របស់រដ្ឋក្នុងទំហំ ៣១,៨៤ ហិកតា ក្នុងតំបន់ខាងលើដោយក្រុមជនមិនស្គាល់មុខក្នុងគោលបំណងពង្រីកផ្ទៃដីកសិកម្ម និងទន្ទ្រានយកធ្វើជាកម្មសិទិ្ធឯកជនដោយខុសច្បាប់។
លោកបន្តថា ក្រោយពីរកឃើញករណីនេះ ក្រុមសមត្ថកិច្ចជំនាញផ្នែករដ្ឋបាលព្រៃឈើ និងអាជ្ញាធរស្រុកឆែបបានសម្រេចដកហូតដីដែលត្រូវបានឈូសឆាយនោះត្រឡប់មកវិញហើយធ្វើការស្រាវជ្រាវរកអត្តសញ្ញាណក្រុមជនប្រព្រឹត្តបទល្មើស ដើម្បីចំណាត់ការបន្តតាមនីតិវិធីច្បាប់។
លោក មុនីរិទ្ធ បានបញ្ជាក់ថា៖ «ដើម្បីស្ដារព្រៃឈើក្នុងតំបន់ដែលរងការឈូសឆាយពង្រីកផ្ទៃដីកសិកម្មដោយខុសច្បាប់ខាងលើនេះរដ្ឋបាលខេត្តព្រះវិហារតាមរយៈខណ្ឌរដ្ឋបាលព្រៃឈើខេត្តបានរៀបចំដាំកូនឈើគ្រញូង និងកូនឈើបេងឡើងវិញដែលក្នុងជំហានដំបូងនេះមានចំនួនជាង ៣ ០០០ ដើម»។
បើតាមលោក មុនីរិទ្ធ ពិធីដាំកូនឈើគ្រញូង និងបេង ទាំងនោះឡើងវិញ ត្រូវបានធ្វើឡើងកាលពីថ្ងៃទី ២៤ ខែកក្កដា ឆ្នាំ ២០២០ ដោយមានការចូលរួមពីប្រជាសហគមន៍ អាជ្ញាធរមូលដ្ឋាន និងមន្ត្រីជំនាញរដ្ឋបាលព្រៃឈើសរុប ១៥០ នាក់។
លោក ពឹង ទ្រីដា ប្រធានមន្ទីរកសិកម្ម រុក្ខាប្រមាញ់ និង នេសាទ ខេត្តព្រះវិហារបានថ្លែងថា ការដាំ ការថែទាំកូនឈើ និងការគ្រប់គ្រងធនធានព្រៃឈើឲ្យបានគង់វង្សសម្រាប់ជាប្រយោជន៍ដល់មនុស្សជំនាន់ក្រោយ លុះត្រាតែមានការចូលរួមពីគ្រប់ភាគីពាក់ព័ន្ធទាំងអស់។ លោក ទ្រីដា បញ្ជាក់ថា៖ «ការដាំដើមឈើនៅពេលនេះគឺដើម្បីស្តារព្រៃឈើឡើងវិញ និងជួយជាស្មារតីឲ្យមនុស្សយល់ដឹង ចេះចូលរួមថែរក្សាការពារ ប្រើប្រាស់ និងដាំដុះព្រៃឈើ»។
ជាមួយគ្នានេះលោកបានលើកទឹកចិត្តដល់មន្ត្រីរដ្ឋបាលព្រៃឈើដែលបានសហការយ៉ាងល្អជាមួយអង្គការដៃគូក្នុងខេត្តព្រមទាំងស្ថាប័នពាក់ព័ន្ធនានា និងអាជ្ញាធរមូលដ្ឋានក្នុងដំណើរការធ្វើនិយតកម្ម និងអភិវឌ្ឍន៍សហគមន៍ព្រៃឈើរហូតដល់ការចុះកិច្ចព្រមព្រៀងព្រៃសហគមន៍ ហើយបានខិតខំរកថវិកាក្នុងការដាំកូនឈើបញ្ចូលទៅក្នុងព្រៃធម្មជាតិនាពេលនេះ។
លោក ទ្រីដា បានថ្លែងថា ការចូលរួមផ្ដល់មូលនិធិរបស់អង្គការក្រៅរដ្ឋាភិបាល និងដៃគូអភិវឌ្ឍន៍នានាគឺមានសារៈសំខាន់ណាស់សម្រាប់គាំទ្រដល់ស្ថាប័នរដ្ឋបាលព្រៃឈើ ដែលជាសមត្ថកិច្ចជំនាញ និងអាជ្ញាធរមូលដ្ឋានដើម្បីជួយដល់សហគមន៍មូលដ្ឋានក្នុងការដាំដើមឈើឡើងវិញ និងការថែទាំ និងគ្រប់គ្រងធនធានព្រៃឈើឲ្យបានគង់វង្សសម្រាប់ជាប្រយោជន៍ទៅដល់មនុស្សជំនាន់ក្រោយ៕