.jpg)
កាំជណ្តើរឡើងភ្នំត្បែងមានជ័យនៅខេត្តព្រះវិហាររងការខូចខាតដែលត្រូវជួសជុល។រូប FN
ព្រះវិហារៈ កាំជណ្តើរឡើងភ្នំត្បែងមានជ័យជាង ២០០ កាំ ស្ថិតក្នុងភូមិក្រាំងដូង ឃុំព្រះឃ្លាំង ស្រុកត្បែងមានជ័យ ខេត្តព្រះវិហារដែលបានរងការបាក់ស្រុតខូចខាត ដោយសារជំនន់ទឹកភ្លៀងកាលពីរដូវវស្សាកន្លងមក កំពុងត្រូវបានអាជ្ញាធរខេត្តផ្តើមជួសជុល ដោយគម្រោងនេះនឹងចំណាយថវិកាជាង ១៤ ម៉ឺនដុល្លារ។
អាជ្ញាធរខេត្តព្រះវិហារបានរៀបចំពិធីសែនក្រុងពាលីសុំអ្នកតាម្ចាស់ទឹក ម្ចាស់ដី ព្រៃភ្នំ ដើម្បីសាងសង់ជាផ្លូវការកាលពីថ្ងៃទី ២៣ មករា ដែលមានវត្តមានលោកទេសរដ្ឋមន្ត្រី មាស សុភា ប្រធានក្រុមការងាររាជរដ្ឋាភិបាលចុះជួយមូលដ្ឋានខេត្តព្រះវិហារ លោក ឡុង សុវណ្ណ ប្រធានក្រុមប្រឹក្សាខេត្ត និងលោក ប្រាក់ សុវណ្ណ អភិបាលខេត្តព្រះវិហារ ព្រមទាំងថ្នាក់ដឹកនាំ មន្ត្រីរាជការជាច្រើនរូបទៀត។
លោក សំ លាងទ្រី ប្រធានមន្ទីរសាធារណការ និងដឹកជញ្ជូន ខេត្តព្រះវិហារ ដែលជាអ្នកទទួលការសាងសង់ថ្លែងពីម្សិលមិញថា កាំជណ្តើរឡើងលើភ្នំត្បែងមានជ័យសរុបមានចំនួន ១ ៨០០ កាំ ក្នុងនោះមានចំនួន ២០៣ កាំ បានរងការខូចខាតដោយសារជំនន់ទឹកភ្លៀងកាលពីរដូវវស្សាកន្លងទៅ។ ការខូចខាតនេះធ្វើឱ្យភ្ញៀវទេសចរ និងពលរដ្ឋជួបការលំបាកក្នុងការឡើងលើភ្នំជាខ្លាំង។
លោកបន្តថា រដ្ឋបាលខេត្តព្រះវិហារតាមរយៈមន្ទីរសាធារណការ និងដឹកជញ្ជូនខេត្តបានចាប់ផ្តើមសាងសង់ឡើងវិញដោយធ្វើអំពីដែក ហើយគ្រោងចំណាយថវិកាជាង ១៤ ម៉ឺនដុល្លារ។ ក្នុងនោះនៅមានសម្ភារមួយចំនួនទៀតដែលត្រូវប្រើប្រាស់ គឺមានការកុម្ម៉ង់ទិញពីប្រទេសចិន។
បើតាមលោក លាងទ្រី ដើម្បីសម្រួលដល់ការធ្វើដំណើរឡើងភ្នំរបស់ប្រជាពលរដ្ឋ និងភ្ញៀវទេសចរ ឱ្យមានភាពងាយស្រួល និងចៀសវាងពីគ្រោះថ្នាក់ផ្សេងៗនោះលោក ប្រាក់ សុវណ្ណ អភិបាលខេត្តព្រះវិហារបានដឹកនាំក្រុមការងារចុះទៅពិនិត្យផ្ទាល់ដល់ទីតាំង។ លោកបានណែនាំឱ្យរៀបចំផ្លូវវាងជាបណ្តោះអាសន្ន ដើម្បីសម្រួលដល់ការធ្វើដំណើរ។
លោកថ្លែងថា៖ «ថវិកាសម្រាប់សាងសង់កាំជណ្តើរឡើងភ្នំត្បែងមានជ័យនេះ គឺយើងបានមកពីការដង្ហែអង្គកឋិនទានសាមគ្គី ក្រោមគំនិតផ្តួចផ្តើមរបស់លោកទេសរដ្ឋមន្ត្រី មាស សុភា និងលោក ប្រាក់ សុវណ្ណ។ ថវិកានេះនៅមិនទាន់គ្រប់គ្រាន់សម្រាប់ការកសាង កាំជណ្តើរនោះទេ ប៉ុន្តែអាជ្ញាធរនឹងបន្តកៀរគរ រកថវិកាបន្ថែមទៀត ដើម្បីសាងសង់កាំជណ្តើរនេះឱ្យរួចរាល់ជាស្ថាពរ»។
លោក ប្រាក់ សុវណ្ណ អភិបាលខេត្តព្រះវិហារពីម្សិលមិញបានបដិសេធធ្វើអត្ថាធិប្បាយជុំវិញគម្រោងនេះដោយលោកបានបង្វែរសំណួរឱ្យទៅសួរនាយករដ្ឋបាលខេត្តជាអ្នកឆ្លើយវិញ។
លោក យ៉ុង គឹមហ៊ឺង នាយករដ្ឋបាលខេត្តព្រះវិហារថ្លែងពីម្សិលមិញថា ភ្នំត្បែងមានជ័យ គឺជាតំបន់ទេសចរណ៍ធម្មជាតិមួយនៅលើកំពូលភ្នំដែលមានភាពទាក់ទាញ ដោយសារនៅលើកំពូលភ្នំត្បែងមានវត្តថ្ម ៣ ដុំ វត្តដំបូកខ្មៅក្របៅជ្រុំ មានទឹកជ្រោះក៏ដូចជាតំបន់ជាច្រើនទៀតដែលមានទំនាក់ទំនង និងបារមីលោកតាសួង អ្នកសច្ចំភ្នំត្បែងដ៏ពូកែស័ក្តិសិទិ្ធរបស់ខ្មែរពីបុរាណកាល។
លោកថា៖ «យើងបានឃើញពីភាពលំបាករបស់ប្រជាពលរដ្ឋ និងភ្ញៀវទេសចរដែលបានទៅទស្សនានៅលើភ្នំនេះ ដូច្នេះយើងក៏ប្រញាប់ជួសជុលគឺធ្វើយ៉ាងណានឹងជំរុញឱ្យរួចរាល់មុនបុណ្យចូលឆ្នាំខ្មែរយើងនេះ។ ថវិកាទាំង ១៤ ម៉ឺនដុល្លារនេះមិនមែនជាថវិការដ្ឋទេ គឺយើងកៀរគរពីសប្បុរសជននានា ដើម្បីសាងសង់គម្រោងនេះ»។
តាមរបាយការណ៍របស់ក្រសួងបរិស្ថានភ្នំត្បែងមានជ័យត្រូវបានរដ្ឋាភិបាលកម្ពុជាតាមរយៈសំណើរបស់ក្រសួងបរិស្ថានដាក់បញ្ចូលតំបន់នេះចូលជាសម្បត្តិបេតិកភណ្ឌធម្មជាតិកាលពីខែកញ្ញា ឆ្នាំ ២០១៦ ដោយគ្របដណ្តប់លើផ្ទៃដីធម្មជាតិប្រមាណជាង ២៥ ០០០ ហិកតា។ តំបន់ភ្នំត្បែងមានជ័យមានកម្ពស់ជាង ៤០០ ម៉ែត្រ មានកាំជណ្តើរ ១ ៨០០ កាំ ដែលមានសម្រស់ធម្មជាតិស្អាតដាច់គេមានទឹកធ្លាក់ ៣ តង់តាម៉ា ទឹកធ្លាក់តាំងយូ ឬចាក់អង្រែ រូងប្រជៀវភ្នំត្បែង និងទីតាំងសក្ការៈថ្ម ៣ ដុំផងដែរ៕
