ព្រះវិហារៈ អាជ្ញាធរបានរកឃើញគ្លីនិកឯកជនមិនមានច្បាប់អនុញ្ញាតប្រមាណជាង ២០ កន្លែង កំពុងដំណើរការក្នុងស្រុកជាំក្សាន្ត ខេត្តព្រះវិហារ កាលពីថ្ងៃទី ១៦ ខែ កក្កដា ហើយក៏បានបិទមួយចំនួនជាបន្តបន្ទាប់ ក្រោយពីចុះពិនិត្យរកឃើញភ័ស្តុតាងជាក់ស្តែងអំពីផលិតផលឱសថហួសសុពលភាព ដែលបាននិងកំពុងដាក់លក់ក្នុងគ្លីនិកខុសច្បាប់នោះ។
អភិបាលស្រុកជាំក្សាន្ត លោក ជា គឹមសេង បានប្រាប់ភ្នំពេញប៉ុស្តិ៍ ពីម្សិលមិញ ថា នៅទូទាំងស្រុកជាំក្សាន្ដទាំងមូលមានគ្លីនិកឯកជនគ្មានច្បាប់ជាង ២០ កន្លែង ប៉ុន្ដែរហូតមកដល់ថ្ងៃពុធម្សិលមិញ ក្រោយចុះពិនិត្យរកឃើញភ័ស្ថុតាងជាក់ស្ដែងអំពីផលិតផលឱសថហួសសុពលភាព និងបើកគ្លីនិកគ្មានច្បាប់ ទើបសមត្ថកិច្ចសម្រេចបិទគ្លីនិកចំនួន ៦ ទីតាំង ដោយបញ្ឈប់លែងឲ្យបន្តការលក់ថ្នាំតែម្ដង។
លោកបានថ្លែងថា៖ «កិច្ចការងារចុះបង្ក្រាបទីតាំងគ្លីនិកឯកជនលក់ឱសថ និងព្យាបាលមិនស្របច្បាប់នេះ អាជ្ញាធរបានចុះទៅណែនាំដល់ម្ចាស់គ្លីនិកជាបន្ដបន្ទាប់ឲ្យបញ្ឈប់សកម្មភាពមុននឹងយើងសម្រេចអនុវត្ដវិធានការក្ដៅចុះបញ្ឈប់សកម្មភាព ព្រោះអាចបង្កគ្រោះថ្នាក់ដល់ប្រជាពលរដ្ឋ ប៉ុន្ដែគាត់មិនព្រមស្ដាប់យើង»។
លោកឲ្យដឹងថា គ្លីនិកបើកព្យាបាល និងលក់ឱសថមិនមានច្បាប់ និងហួសសុពលភាព ដែលអាជ្ញាធរអនុវត្ដវិធានការក្ដៅបិទលែងឲ្យដំណើរការតែម្ដងទាំង ៦ ទីតាំងនោះ គឺស្ថិតនៅ ឃុំកន្តួត និងឃុំស្រអែម នៃស្រុកជាំក្សាន្ត។
លោក គឹមសេង បន្ថែមថា ក្នុងប្រតិបត្ដិការ ចុះបិទគ្លីនិកឯកជននេះ បានដកហូតឱសថហួសសុពលភាពប្រើប្រាស់ បានចំនួន ៤៦ មុខ ដោយយកមករក្សាទុក នៅមន្ទីរពេទ្យបង្អែកស្រុកជាំក្សាន្ត។ ជាងនេះទៀត សមត្ថកិច្ច កំពុងបន្តប្រតិបត្ដិការចុះត្រួតពិនិត្យគ្លីនិកប្រមាណជាង ២០ កន្លែងផ្សេងទៀត ដែលមិនមានច្បាប់ក្នុងស្រុកជាំក្សាន្តដើម្បីអនុវត្ដតាមច្បាប់។
លោកបន្ដថា៖ «ពេលចុះត្រួតពិនិត្យ យើងពិនិត្យឃើញថ្នាំភាគច្រើនដែលពួកគាត់យកមកប្រើប្រាស់ ភាគច្រើនហួសសុពលភាពកំណត់ឲ្យប្រើប្រាស់។ បច្ចុប្បន្នយើងមិនទាន់មានវិធានការទៅដល់ការផាកពិន័យដល់ពួកគាត់ទេ មានតែឲ្យពួកគាត់ធ្វើកិច្ចសន្យាបញ្ចប់លែងឲ្យមានការបើកគ្លីនិកនេះបន្តទៀត។ ប៉ុន្ដែបើសិនជាពួកគាត់តវ៉ា យើងនឹងរៀបចំនីតិវិធីដាក់ទៅតុលាការ ដើម្បីអនុវត្ដតាមច្បាប់»។
លោក គួង ឡូ ប្រធានមន្ទីរសុខាភិបាលខេត្ដព្រះវិហារ បានឲ្យដឹងថា កន្លងមកមន្ទីរសុខាភិបាលខេត្ដព្រះវិហារបានចុះបិទគ្លីនិកដែលគ្មានច្បាប់ជាបន្តបន្ទាប់ ហើយថ្មីៗនេះអាជ្ញាធរស្រុកជាំក្សាន្ត សហការជាមួយមន្រ្ដីសុខាភិបាល បានចុះបិទគ្លីនិកឯកជនគ្មានច្បាប់ចំនួន ៦ កន្លែងថែមទៀត។
លោកថ្លែងថា៖ «យើងនឹងចុះត្រួតពិនិត្យគ្លីនិកឯកជនជាបន្ដបន្ទាប់ទៀតនៅតាមគ្រប់ស្រុកទាំងអស់ ហើយទីតាំងគ្លីនិកលក់ព្យាបាល ឬលក់ឱសថដែលអត់មានច្បាប់អនុញ្ញាត យើងនឹងបិទបញ្ឈប់លែងឲ្យលក់បន្តទៀត»។
បើតាមលោក គួង ឡូ អំឡុងពេលចុះត្រួតពិនិត្យ និងផ្សព្វផ្សាយដល់បណ្ដាគ្លីនិកតាមស្រុក អាជ្ញាធរក៏បានប្រាប់ថា បើសិនជាគ្លីនិកដែលគ្មានច្បាប់ មិនព្រមអនុវត្ដតាមការណែនាំរបស់សមត្ថកិច្ច អាជ្ញាធរនឹងអនុវត្ដវិធានការក្ដៅ ដោយកសាងសំណុំរឿងបញ្ជូនទៅតុលាការ ដើម្បីចាត់ការតាមច្បាប់។
ទាក់ទងនឹងចំនួនគ្លីនិកសរុបក្នុងខេត្ដព្រះវិហារ និងចំនួនគ្លីនិកដែលអាជ្ញាធរបានបិទលែងឲ្យដំណើរការបន្តនេះ លោក គួង ឡូ មិនទាន់អាចប្រាប់បានពីចំនួនច្បាស់លាស់នោះទេ។
លោកបានឲ្យដឹងថា៖ «យើងមានទិន្នន័យនេះនៅឯមន្ទីរយើង។ ប៉ុន្ដែពេលនេះខ្ញុំនៅតាមផ្លូវក្រែងប្រាប់ទៅខុស។ ប៉ុន្ដែខ្ញុំអាចប្រាប់បានថា យើងបានបិទគ្លីនិកអត់ច្បាប់បែបនេះនៅក្នុងស្រុកមួយចំនួនរួចមកហើយ ដូចជាស្រុកជាំក្សាន្ដ ស្រុក សង្គមថ្មី ក៏ធ្លាប់បានបិទ និងធ្លាប់មានខ្លះប្ដឹងយើងឡើងដល់តុលាការថែមទៀត នៅក្រុងព្រះវិហារ និងស្រុក គូលែន ក៏យើងធ្លាប់បានបិទ ដែលស្រុកទាំងនេះមានគ្លីនិកឯកជនច្រើន»។
លោក ឡោ ចាន់ មន្រ្ដីសម្របសម្រួលសមាគមអាដហុកខេត្តព្រះវិហារថ្លែងថា ការចុះបិទគ្លីនិកឯកជនដែលព្យាបាល និងលក់ឱសថគ្មានច្បាប់នេះ គឺជាការអនុវត្ដត្រឹមត្រូវតាមច្បាប់របស់សមត្ថកិច្ច ប៉ុន្ដែវាក៏បង្កឲ្យមានគុណវិបត្ដិមួយចំនួននៅក្នុងមូលដ្ឋានភូមិ ឃុំផងដែរ។
លោកបានថ្លែងថា៖ «សមត្ថកិច្ចបញ្ឈប់គ្លីនិកបែបនេះ ដោយសារតែវាអាចបង្កផលប៉ះពាល់ដល់សុខភាពប្រជាពលរដ្ឋ ដោយប្រើប្រាស់ថ្នាំហួសសុពលភាពជាដើមគឺត្រឹមត្រូវហើយ។ ប៉ុន្ដែគ្លីនិកឯកជនទាំងនោះ វាជាផ្នែកមួយក្នុងការជួយប្រជាពលរដ្ឋនៅមូលដ្ឋានពេលមានជំងឺផ្សេងៗក្នុងការសង្គ្រោះបឋមទម្រាំពួកគាត់ទៅដល់មណ្ឌលសុខភាព»។
នៅពេលភ្នំពេញប៉ុស្តិ៍ព្យាយាមសួររកតួលេខពីគ្លីនិកខុសច្បាប់នៅទូទាំងប្រទេសពីម្សិលមិញ និងតួលេខដែល បង្ក្រាបបាននោះ លោក ឡូ វាសនាគិរី ប្រធាននាយកដ្ឋានផែនការ និងព័ត៌មាន នៃក្រសួងសុខាភិបាល បដិសេធធ្វើការបកស្រាយជុំវិញករណីត្រួតពិនិត្យគ្លីនិកឯកជនតាមបណ្ដាខេត្ដនេះ ដោយបញ្ជាក់ថាមិនបានទទួលការងារនេះ។ ដោយឡែក លោកស្រី យក់ សម្បត្ដិ និងលោកស្រី ឱ វណ្ណឌីន អ្នកនាំពាក្យក្រសួងសុខាភិបាលមិនអាចសុំការបកស្រាយបានទេដោយខលចូលមិនមានអ្នកទទួលពីម្សិលមិញ៕