.jpg)
អាជ្ញាធរខេត្តព្រះសីហនុកំណត់ឱសានវាទឲ្យពលរដ្ឋ ២៩ គ្រួសារ រុះរើសំណង់ ដែលបានរំលោភទៅលើកន្លែងសាធារណៈរបស់រដ្ឋ។ រូបថត ហ្វេសប៊ុក
ព្រះសីហនុៈ រដ្ឋបាលខេត្តព្រះសីហនុបានកំណត់ឱសានវាទដល់ពលរដ្ឋ ២៩ គ្រួសារត្រូវរុះរើសំណង់ដោយស្ម័គ្រចិត្តឲ្យបាននៅថ្ងៃទី ២៣ ខែមករានេះ ដោយហេតុសំណង់ទាំងនោះបានរំលោភទៅលើកន្លែងសាធារណៈរបស់រដ្ឋ ដូចជា ចំណីអូរ និងចំណីផ្លូវ ស្ថិតនៅផ្លូវលេខ ១៨៨៨ ក្រុម ២៨ ភូមិ ៥ សង្កាត់លេខ ៤ ក្រុងព្រះសីហនុ។
រដ្ឋបាលខេត្ដព្រះសីហនុបានថ្លែង ឲ្យដឹងថាផ្ទះសំបែងរបស់បងប្អូនប្រជាពលរដ្ឋដែលកំពុងរស់នៅគឺបានធ្វើឱ្យប៉ះពាល់ដល់ប្រព័ន្ធរំដោះទឹក និងគម្រោងស្ថាបនាផ្លូវក្នុងក្រុងព្រះសីហនុ។
រដ្ឋបាលខេត្ដបានថ្លែងទៀតថា៖ «ក្នុងករណីបងប្អូនមិនរុះរើចេញតាមការណែនាំទេ រដ្ឋបាលខេត្ដនឹងចុះអនុវត្ដវិធានការរដ្ឋបាលដោយមិនទទួលខុសត្រូវរាល់ការខូចខាតសម្ភារ ឬការបាត់បង់ទ្រព្យសម្បត្ដិរបស់បងប្អូនឡើយ»។
រដ្ឋបាលខេត្ដបញ្ជាក់ថា ដើម្បីបញ្ចៀសបាននូវការលិចលង់លំនៅឋានរបស់បងប្អូនប្រជាពលរដ្ឋក្នុងក្រុងព្រះសីហនុ ព្រោះតែជំនន់ទឹកភ្លៀងនោះ ប្រជាពលរដ្ឋទាំង ២៩ គ្រួសារត្រូវរុះរើសំណង់នៅថ្ងៃទី ២៣ ខែ មករា ឆ្នាំ ២០២០ ជាកំហិត ក្រោយពីបានជូនដំណឹងជាមុនចាប់តាំងពីថ្ងៃទី ១៧ ខែមករា។
លោក ឃាង ភារម្យ អ្នកនាំពាក្យរដ្ឋបាលសាលាខេត្ដព្រះសីហនុបានថ្លែងកាលពីម្សិលមិញថា៖ «ទីតាំងដែលត្រូវរុះរើនោះគឺទី ១ ពួកគាត់រស់នៅលើចំណីអូរ និងផ្លូវសាធារណៈរបស់រដ្ឋដែលវាប៉ះពាល់ទៅដល់ប្រព័ន្ធដក់ទឹក និងគម្រោងស្ថាបនាផ្លូវ។ ចំណែកគម្រោងនៃការអភិវឌ្ឍផ្លូវទាំង ៣៤ ខ្សែ មកដល់ពេលនេះយើងស្ថាបនាបាន ៣០ ភាគរយហើយ»។
លោក ទៀ បាញ់ រដ្ឋមន្ត្រីក្រសួងការពារជាតិ លោក ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ លោក សាយ សំអាល់ រដ្ឋមន្ត្រីក្រសួងបរិស្ថាន និងលោក គួច ចំរើន អភិបាលខេត្តព្រះសីហនុ និងមន្ត្រីពាក់ព័ន្ធជាច្រើនរូបទៀតបានចុះពិនិត្យការដ្ឋានសាងសង់ផ្លូវទាំង ៣៤ ខ្សែ នៅក្នុងខេត្តព្រះសីហនុកាលពីថ្ងៃទី ១៨ ខែមករា។ ក្នុងនោះមានផ្លូវមួយចំនួនដែលកំពុងអនុវត្តសាងសង់ដោយកងវិស្វកម្មលេខ ១៧៨ ស្ពានថ្នល់របស់ក្រសួងការពារជាតិផងដែរ។
រដ្ឋបាលខេត្ដព្រះសីហនុឱ្យដឹងថាផ្លូវចំនួន ៣៤ ខ្សែនោះមានប្រវែងសរុប ៨៤.៥០៥ ម៉ែត្រដែលមកដល់ពេលនេះសម្រេចបានប្រមាណ ៣០ ភាគរយ នៃចម្ងាយផ្លូវសរុប។ បច្ចុប្បន្នមានផ្លូវមួយចំនួនបាននិងកំពុងរៀបចំប្រព័ន្ធលូ និងចាប់ផ្តើមចាក់ក្រាលបេតុងជាបណ្តើរៗហើយ៕
