.jpg)
ក្រុមយុវជនអតីតមាតាធម្មជាតិដែលដាក់ញត្តិទៅអាជ្ញាធរខេត្តព្រះសីហនុ។ រូបថត VOD
ព្រះសីហនុៈ អាជ្ញាធរខេត្តព្រះសីហនុកំពុងគិតគូរពីការចុះរុះរើសំណង់អគារកាស៊ីណូក្រុមហ៊ុនចិន ជីនទីង ខុសច្បាប់នៅកោះរ៉ុងសន្លឹម ខណៈដែលក្រុមយុវជនអតីតអង្គការមាតាធម្មជាតិបានប្រកាសពីគម្រោងដើរហែក្បួនដើម្បីជំរុញឲ្យមានការរុះរើសំណង់នេះឲ្យបានឆាប់។
កាលពីថ្ងៃចន្ទ អតីតក្រុមយុវជនចលនាមាតាធម្មជាតិចំនួន ១៤ នាក់ បានប្រមូលផ្តុំគ្នានៅមុខសាលាខេត្តព្រះសីហនុដោយដាក់ញត្តិទៅកាន់អភិបាលខេត្តលោក គួច ចំរើន ដើម្បីទាមទារឱ្យពន្លឿនការរុះរើអគារកាស៊ីណូក្រុមហ៊ុនចិន ជីនទីងខុសច្បាប់នៅកោះរ៉ុងសន្លឹមបន្ទាប់ពីអាជ្ញាធរប្រកាសបិទអាជីវកម្មនេះកាលពីអំឡុងខែឧសភា និងតម្រូវឲ្យរុះរើចេញក្រោយរកឃើញថា បានសាងសង់រំលោភលើដីឆ្នេរ បើកកន្លែងលេងល្បែងស៊ីសងខុសច្បាប់ និងបានបង្ហូរទឹកកខ្វក់ចូលសមុទ្រ។
លោក ឃាង ភារម្យ អ្នកនាំពាក្យរដ្ឋបាលខេត្តព្រះសីហនុបានប្រាប់ភ្នំពេញប៉ុស្តិ៍ ពីម្សិលមិញថារដ្ឋបាលខេត្តកំពុងរង់ចាំចំណាត់ការក្រោយការប្រជុំសម្រេចពីថ្នាក់លើ ព្រោះសំណង់អគារនេះកំពុងស្ថិតក្នុងការអនុវត្តរបស់ក្រុមការងារដែលចុះអនុវត្តក្នុងការវាយកម្ទេចសំណង់អគារ។
លោកបញ្ជាក់ថា៖ «អ្វីដែលសំខាន់ ទីតាំងនេះគឺពិតជាបិទជាស្ថាពរហើយ មិនមានសកម្មភាពអ្វីទៀតទេ ហើយស្ថិតក្រោមការឃ្លាំមើលរបស់អាជ្ញាធរខេត្តយើង។ យើងត្រូវគិតថា មិនមែនតែក្រុមយុវជនរបស់គាត់ទេ ដែលស្រឡាញ់ប្រទេសជាតិ យើងជាមន្ត្រីរាជការហ្នឹងក៏ស្រឡាញ់ជាតិដូចគ្នាដែរ ហើយត្រូវយល់ថាការងារនៅក្នុងខេត្តព្រះសីហនុមិនមែនធ្វើតែមួយរឿងទេ គឺមានរឿងច្រើនណាស់ដែលអាជ្ញាធរត្រូវដោះស្រាយបើក្នុងករណីយើងមិនធ្វើ គឺជារឿងមួយថា ខុសប៉ុន្តែនេះយើងធ្វើរហូត»។
សមាជិកអតីតចលនាមាតាធម្មជាតិលោក ហ៊ុន វណ្ណៈ ដែលបានចូលរួមដាក់ញត្តិថ្លែងពីម្សិលមិញថា លោកនៅតែបារម្ភពីផលប៉ះពាល់ដល់ឆ្នេរសមុទ្រពីសំណាក់សំណង់អគារដែលបានសង់ក្បែរសមុទ្រចម្ងាយប្រមាណតែ ១០ ម៉ែត្រប៉ុណ្ណោះ។ ដូចនេះលោកនៅតែចង់ឲ្យអាជ្ញាធរអនុវត្តវិធានការផ្លូវច្បាប់ឱ្យមានប្រសិទ្ធភាព ចៀសវាងមានការប្រើប្រាស់សំណង់ទាំងនោះឡើងវិញពីជនមានអំណាច។
លោក ហ៊ុន វណ្ណៈ បញ្ជាក់ថា៖ «រឿងហ្នឹងវាជាការបរាជ័យក្នុងការអនុវត្តច្បាប់របស់រដ្ឋាភិបាលយើង ដែលជាមូលហេតុបង្កឲ្យមានបញ្ហាមិនចេះចប់ មិនចេះហើយនៅក្នុងខេត្តព្រះសីហនុ។ យើងបារម្ភណាស់បានយើងសម្រេចដាក់លិខិតហ្នឹង ព្រោះសង្កេតឃើញថាកាស៊ីណូហ្នឹងមិនមានជំហរបិទមែនទែនទេ ព្រោះកន្លងមកធ្លាប់បានបិទម្តងហើយ បន្ទាប់មកបើកវិញ...»។
ក្រៅពីជំរុញឲ្យពន្លឿនការវាយកម្ទេចសំណង់អគារនេះ ក្រុមយុវជនក៏បានព្រមានដែរថា ពួកគេនឹងបន្តធ្វើយុទ្ធនាការដើរហែក្បួនដើម្បីជំរុញឲ្យមានចំណាត់ការឆាប់រហ័ស។
បើតាមក្រុមយុវជនអគារកាស៊ីណូ ជីនទីង ដែលមានទីតាំងស្ថិតនៅលើកោះរ៉ុងសន្លឹមមានម្ចាស់ជាជនជាតិខ្មែរបានជួលទៅឱ្យជនជាតិចិនឈ្មោះ Zhou Jianhua ដែលជាប្រធានក្រុមហ៊ុន 168 Jingding International Entertainment Co., Ltd.។
លោកស្រី ជៀប សុធារី មន្ត្រីឃ្លាំមើលសិទ្ធិមនុស្សនៃសមាគមអាដហុកប្រចាំខេត្តព្រះសីហនុរំពឹងថាអាជ្ញាធរនឹងពន្លឿនក្នុងការរុះរើសំណង់អគារខុសច្បាប់មួយនេះរួមទាំងសំណង់អគារផ្សេងៗទៀតដែលអាជ្ញាធរបានប្រកាសកន្លងមក ស្របពេលដែលពលរដ្ឋជាច្រើនកំពុងរង់ចាំមើលចំណាត់ការនេះ។
លោកស្រីបញ្ជាក់ថា៖ «គេប្រកាសឲ្យរុះរើ ១៤ កន្លែង តែខ្ញុំមិនទាន់ដឹងថា កន្លែងណាខ្លះទេ? គ្រាន់តែដឹងថា កន្លែងយើងមើលឃើញនៅចំណុចតោ ២ ហ្នឹងរហូតមកដល់ពេលនេះនៅមិនទាន់មានការរុះរើចេញទេ ព្រោះសំណង់ហ្នឹង វា ៩ ជាន់ ហើយធំណាស់។ យើងមិនដឹងថា មធ្យោបាយនៃការរុះរើរបស់គេធ្វើបែបម៉េចដែរ? យើងនៅតែរង់ចាំមើលចំណាត់ការរបស់អាជ្ញាធរ ព្រោះរឿងនេះមិនអាចលាក់បាំងបានទេ»៕
