.jpg)
ក្រុមអាជីវករតាមឆ្នេរដែលស្នើរកដំណោះស្រាយ។ រូបថត សហការី
ព្រះសីហនុៈ អាជ្ញាធរខេត្ត និងក្រុងព្រះសីហនុកាលពីម្សិលមិញបានចាប់ផ្ដើមរុះរើតូបលក់ដូរចាប់ពីឆ្នេរអារីស្តុនរហូតដល់ឆ្នេរអូរត្រេះ ប៉ុន្តែមានអាជីវករខ្លះថា ពួកគេមិនព្រមរុះរើទេ ដោយបានស្នើសុំឲ្យអាជ្ញាធរបង្កើតស្តង់ដាតូបថ្មីលក់ដូរនៅទីតាំងដដែល។
ក៏ប៉ុន្តែលោក អ៊ី សុខឡេង អភិបាលក្រុងព្រះសីហនុបានប្រាប់អ្នកសារព័ត៌មានពីម្សិលមិញថា មានតូប ៩០ ភាគរយ ត្រូវបានម្ចាស់ស្ម័គ្រចិត្តរុះរើខ្លួនឯង រីឯ ១០ ភាគរយ គឺជាកម្ទេចកម្ទីដែលនៅសេសសល់។ ការចុះរុះរើនេះមានការចូលរួមពីផ្នែកពាក់ព័ន្ធដែលមានទាំងប្រជាការពារផងសរុបចំនួន ៣៣២ នាក់ ដោយប្រើគ្រឿងចក្រ ៣៥ គ្រឿង ដើម្បីដឹកសម្ភារជូនអាជីវករ បន្ទាប់ពីជូនដំណឹងកាលពីថ្ងៃទី ៤ ខែធ្នូឆ្នាំមុន ។
លោកបានបញ្ជាក់ថា៖ «កម្លាំងជាង ៣០០ នេះយើងមិនមែនមកប្រើអំពើហិង្សា ឬមកឈូសឆាយសំណង់តូបអនាធិបតេយ្យនេះដោយកម្រោលទេ គឺដំបូងឡើយយើងបានជូនដំណឹងមកទល់ពេលនេះជាង ១ ខែហើយ ហើយថ្ងៃនេះមុននឹងយើងចុះមករុះរើក៏បងប្អូនស្ម័គ្រចិត្តឲ្យយើងរុះរើដែរ ។ របស់ណាដែលអាចប្រើប្រាស់បានដូចជាឈើ តង់ ឬក៏សម្ភារផ្សេងៗទៀត ប្រជាការពារនឹងជញ្ជូនដាក់ឡានដឹកដល់ផ្ទះគាត់។ រីឯសម្ភារដែលគាត់លែងប្រើប្រាស់ យើងឈូស ហើយដឹកចេញ»។
លោកបន្តថា៖ «ឆ្នេរនេះពេលយើងរើស្អាតគឺជាឆ្នេររបស់ជាតិយើងតែមួយហើយជាឆ្នេររបស់ប្រជាពលរដ្ឋយើងទាំងអស់គ្នាមិនឲ្យទៅបុគ្គលណានោះទេគឺថា ធ្វើដើម្បីឲ្យឆ្នេរនេះមានសោភណភាព មានបរិស្ថាន មានអនាម័យ ហើយបម្រើឲ្យបងប្អូនភ្ញៀវទេសចរទាំងជាតិ និងអន្តរជាតិបានមកកម្សាន្ត មកសម្រាកនៅទីនេះ»។
លោក អ៊ី សុខឡេង បានបន្តថា វាជាប្រវត្តិសាស្ត្រហើយដែលតាមបណ្ដោយឆ្នេរនៅខេត្តនេះមានផ្លូវ។ ពលរដ្ឋនឹងភ្ញាក់ផ្អើលពេលមកលេងខេត្តនេះនៅពាក់កណ្ដាលឆ្នាំ ២០២០។ អាជ្ញាធរកំពុងស្ដារអូរចម្ងាយជាង ២៥ គីឡូម៉ែត្រ និងផ្លូវ ១០ ខ្សែថ្មីបន្ថែមទៀត ខណៈផ្លូវសរុបនៅក្រុងនេះមានចំនួន ៤៤ ខ្សែ។
លោកថ្លែងថា៖ «ឆ្នេរចាប់ពីអារីស្តុនដល់ចុងអូរត្រេះយើងនឹងរើជាបន្តបន្ទាប់រហូតដល់ឆ្នេរយើងត្រូវបានរំដោះពីការរំលោភសាងសង់រោងអនាធិតេយ្យគ្មានសណ្ដាប់ធ្នាប់ យើងសង្ឃឹមថានឹងរំដោះបានហើយប្រគល់ឆ្នេរនេះទៅឲ្យពលរដ្ឋកម្ពុជាទាំងអស់ក្នុងការមកកម្សាន្ត មានសិទ្ធិស្មើៗគ្នា »។
អ្នកស្រី ជ្រៀប សុធារី មន្ត្រីសម្របសម្រួលសមាគមអាដហុក ខេត្តព្រះសីហនុ បានឲ្យដឹងថា តាមព័ត៌មានដែលអ្នកស្រីទទួលបានគឺមានតូបចំនួន ១០៥ នៅឆ្នេរអារីស្តុន ហើយនៅឆ្នេរអូរត្រេះមានតូបចំនួន ៦២។ អាជីវករនៅឆ្នេរទាំង ២ ធ្លាប់បានសុំការអនុញ្ញាតពីអាជ្ញាធរក្នុងអាណត្តិមុនៗត្រឹមត្រូវដើម្បីបានលក់ដូរនៅទីនោះ។
អ្នកស្រីបន្តថា ពេលអាជ្ញាធរសម្រេចចិត្តដេញដូច្នេះ ពួកគាត់មិនសុខចិត្តហើយបានស្នើសុំឲ្យអាជ្ញាធររៀបចំការលក់ដូរទៅតាមស្តង់ដារបស់អាជ្ញាធរខេត្តចង់បាន ហើយអាជីវករនឹងធ្វើតាមការណែនាំ ដូចជា ការបង់សេវានានាជាដើម។
លោក ទី អៀន អាជីវករម្នាក់ដែលលក់ដូរនៅឆ្នេរអូរត្រេះបានថ្លែងពីម្សិលមិញថា លោកនិងអាជីវករផ្សេងនៅឆ្នេរនេះមិនព្រមរើទេ ដោយសារមិនដឹងរើទៅលក់នៅទីណា ប៉ុន្តែបើអាជ្ញាធររុះរើក៏លោកមិនដឹងធ្វើម៉េចដែរ។ លោកបញ្ជាក់ថា ពីឆ្នេរអារីស្តុនមកឆ្នេរអូរត្រះមានចម្ងាយប្រមាណ ២ គីឡូម៉ែត្រ។
លោកថា៖ «ពួកខ្ញុំនៅដំណើរការដដែលទោះបីជាខាងអាជ្ញាធរគាត់មកក៏ដោយ។ ឥឡូវគេកំពុងតែមកដើរកាយជិតដល់អូរត្រេះ ប៉ុន្តែពួកខ្ញុំអត់រើ។
ខ្ញុំបានដាក់លិខិតទៅក្រសួងមហាផ្ទៃ ហើយក្រសួងយោងតាមការស្នើសុំរបស់អាជីវករ ហើយបង្វែរសំណើទៅរដ្ឋបាលខេត្តព្រះសីហនុដោយស្នើឲ្យអនុវត្តតាមនីតិវិធី និងបទដ្ឋានគតិយុត្ត»។
លោក ទី អៀន ស្នើឲ្យអាជ្ញាធរជួបជាមួយអាជីវករ ហើយពិភាក្សាគ្នារកដំណោះស្រាយ គឺការរៀបចំបទដ្ឋានថ្មីសម្រាប់ឲ្យអាជីវករធ្វើតាម ហើយអនុញ្ញាតឲ្យពួកគាត់អាចលក់ដូរនៅទីនោះបន្តទៀត។
លោក សន ជ័យ ប្រធានអង្គការសម្ព័ន្ធគណនេយ្យភាពសង្គមកម្ពុជាបានថ្លែងកាលពីម្សិលមិញថា ការរុះរើតូបអាជីវករបែបនេះមិនមែនជារឿងត្រឹមត្រូវនោះទេ ព្រោះអាជីវករដែលកំពុងប្រកបមុខរបរបែបសេដ្ឋកិច្ចក្រៅប្រព័ន្ធនេះក៏កំពុងចូលរួមដល់សេដ្ឋកិច្ចជាតិ និងទាក់ទាញដល់ភ្ញៀវទេសចរផងដែរ ដោយសារម្ហូបអាហាររបស់ពួកគេមានតម្លៃសមរម្យ ។
លោកបានបញ្ជាក់ថា៖ «បើយល់ថាវាមិនសូវល្អ អាជ្ញាធរគួរតែគិតគូររឿងសំរាម រឿងបរិស្ថានជាជាងដេញ ឬរុះរើសំណង់ពួកគាត់ចេញ ព្រោះអ្នកសេដ្ឋកិច្ចក្រៅប្រព័ន្ធនេះមានប្រយោជន៍ដល់សង្គម និងជួយដល់សេដ្ឋកិច្ចជាតិច្រើនដែរ» ៕
