.jpg)
ពោងសុវត្ថិភាពដែលអាជ្ញាធរដាក់តាមឆ្នេរ។ រូបថត រដ្ឋបាលខេត្តព្រះសីហនុ
ព្រះសីហនុៈ អាជ្ញាធរខេត្តព្រះសីហនុបានដាក់បណ្ដែតពោងសុវត្ថិភាពក្នុងសមុទ្រនៅតាមបណ្ដោយឆ្នេរដើម្បីកំណត់ដែនសុវត្ថិភាពសម្រាប់ភ្ញៀវទេសចរជាតិ និងអន្តរជាតិដែលមកទស្សនា និងហែល ឬជិះម៉ូតូទឹកកម្សាន្តនៅក្នុងសមុទ្រ។
លោក ឃាង ភារម្យ អ្នកនាំពាក្យរដ្ឋបាលខេត្តព្រះសីហនុបានប្រាប់ភ្នំពេញប៉ុស្តិ៍ពីថ្ងៃចន្ទថា ដើម្បីធានាដល់សុវត្ថិភាពភ្ញៀវទេសចរជាតិ និងអន្តរជាតិ ដែលមកទស្សនា និងងូតទឹកកម្សាន្តនៅសមុទ្រខេត្តព្រះសីហនុអាជ្ញាធរខេត្តបានរៀបចំដាក់បណ្ដែតពោងសុវត្ថិភាពនៅតាមបណ្ដោយឆ្នេរសមុទ្រនេះចាប់ពីចំណុចតំបន់ឆ្នេរ អូរឈើទាល ១ ដល់តំបន់ឆ្នេរអូរត្រេះ។
លោកបញ្ជាក់ថា៖ «នៅពេលនេះក្រុមការងារបច្ចេកទេសកំពុងដំណើរការចងបណ្ដែតពោងសុវត្ថិភាពសម្រាប់កំណត់ខ្សែបន្ទាត់ ឬដែនសុវត្ថិភាព សម្រាប់អ្នកហែលទឹក និងអ្នកបើកម៉ូតូទឹកនៅតាមបណ្ដោយឆ្នេរអូរឈើទាល ១ ដែលដំណើរការនេះបានប្រព្រឹត្តទៅអស់រយៈពេលជាង ១ សប្ដាហ៍ហើយ»។
លោក ភារម្យ បន្តថា ក្រៅពីរៀបចំបណ្ដែតពោងសុវត្ថិភាពនៅតាមបណ្ដោយឆ្នេរខាងលើនេះរដ្ឋបាលខេត្តព្រះសីហនុក៏បាននិងកំពុងរៀបចំហេដ្ឋារចនាសម្ព័ន្ធមួយចំនួនទៀតនៅតាមបណ្ដោយឆ្នេរនេះផងដែរ ដូចជារៀបចំផ្លូវសម្រាប់ថ្មើរជើងចំណតបន្ទប់ទឹក សម្រាប់លាងសម្អាតខ្លួនក្រោយងូតទឹកសមុទ្រ បង្គន់អនាម័យ និងមានការបំពាក់បង្គោលអគ្គិសនី បំភ្លឺផ្លូវតាមបណ្ដោយឆ្នេរជាដើម។
ជុំវិញដំណើរការរៀបចំកំណត់ខ្សែបន្ទាត់ដែនសុវត្ថិភាពសម្រាប់ការលេងកម្សាន្តនៅក្នុងសមុទ្រតាមបណ្ដោយឆ្នេរនេះលោក តាំង សុចិត្តគ្រឹស្នា ប្រធានមន្ទីរទេសចរណ៍ខេត្តព្រះសីហនុដែលទទួលខុសត្រូវលើការងារអភិវឌ្ឍន៍តំបន់ឆ្នេរនេះបានប្រាប់ភ្នំពេញប៉ុស្តិ៍កាលពីម្សិលមិញថា ពោងសុវត្ថិភាពចំនួន ២០០ ព្រមទាំងពោងទង់សញ្ញាសុវត្ថិភាពសម្រាប់កំណត់ដែនសុវត្ថិភាពម៉ូតូទឹកមួយចំនួនទៀតនឹងត្រូវដាក់ពង្រាយឲ្យរួចរាល់នៅតាមបណ្ដោយឆ្នេរអូរឈើទាល ១ នៅល្ងាចថ្ងៃទី ១០ ខែកុម្ភៈ ២០២០ ដោយត្រូវចំណាយថវិកាអស់ ៤៣ ០០០ ដុល្លារ។
លោកបញ្ជាក់ថា៖ «តាមគម្រោងគឺយើងនឹងត្រូវរៀបចំដាក់បណ្ដែតពោងសុវត្ថិភាព និងពោងទង់សញ្ញាកំណត់ដែនសុវត្ថិភាពសម្រាប់អ្នកហែលទឹក និងអ្នកបើកម៉ូតូទឹកនៅតាមបណ្ដោយឆ្នេរអូរឈើទាល ១ និងឆ្នេរអូរឈើទាល ២ ឬ (ឆ្នេរអារីស្តុន) ឲ្យបានហើយរួចរាល់នៅមុនថ្ងៃបុណ្យចូលឆ្នាំថ្មី (ឆ្នាំ ២០២០) ខាងមុខនេះ»។
លោកបន្ថែមថា៖ «យើងក៏មានបំណងចង់រៀបចំឲ្យរួចរាល់ នៅក្នុងតំបន់ឆ្នេរអូរត្រេះនៅក្នុងចុងឆ្នាំ ២០២០ នេះផងដែរ ប្រសិនបើមានការចូលរួមគាំទ្រជាថវិកាពីអង្គការអភិវឌ្ឍន៍ជាដៃគូ ឬពីវិស័យឯកជនព្រោះកញ្ចប់ថវិកាសម្រាប់អភិវឌ្ឍតំបន់ឆ្នេររបស់យើងមានកំណត់»។
លោកបានឲ្យដឹងផងដែរថា ពោងសុវត្ថិភាពសម្រាប់កំណត់ខ្សែបន្ទាត់ដែនសុវត្ថិភាពអ្នកហែលទឹកកម្សាន្តសប្បាយត្រូវបានដាក់ពង្រាយនៅក្នុងរយៈចម្ងាយប្រមាណ ៥០ ម៉ែត្រ ពីមាត់ឆ្នេរមកក្នុងសមុទ្រនៅពេលទឹកនាច និងពោងទង់សញ្ញាពណ៌ក្រហមសម្រាប់កំណត់ដែនសុវត្ថិភាព អ្នកបើកម៉ូតូទឹកលេងកម្សាន្តត្រូវបានដាក់ពង្រាយក្នុងរយៈចម្ងាយ ១៥០ ម៉ែត្រពីមាត់ឆ្នេរ មកក្នុងសមុទ្រនៅពេលទឹកនាច។
លោកបន្តថា ដើម្បីសម្រួលដល់ភ្ញៀវទេសចរជាតិ និងអន្តរជាតិដែលមកលេងកម្សាន្តនៅខេត្តព្រះសីហនុ គណៈកម្មការអភិវឌ្ឍន៍តំបន់ឆ្នេរបានរៀបចំចំណត ស្តង់លក់ដូរចំណីអាហារដែលមានស្ដង់ដាសុវត្ថិភាព និងមានការកំណត់តារាងតម្លៃ មុខម្ហូបអាហារនីមួយៗច្បាស់លាស់ និងសមរម្យ។ ក្រៅពីនេះគណៈកម្មការក៏មានឆ្មាំសមុទ្រចំនួន ១៥ នាក់ រង់ចាំជួយអន្តរាគមន៍សង្គ្រោះដល់អ្នកងូតទឹកកម្សាន្តដែលមានបញ្ហាលង់ទឹកផងដែរ៕
វីដេអូ៖
