មណ្ឌលគិរីៈ លោក ស្វាយ សំអ៊ាង អភិបាលខេត្តមណ្ឌលគិរីបានថ្លែងថា អាជ្ញាធរថ្នាក់ខេត្តកំពុងធ្វើការកំណត់ព្រំដីព្រលានយន្តហោះថ្មី ដែលមានផ្ទៃក្រឡាប្រមាណ ៦០០ ហិកតា ស្ថិតនៅឆ្ងាយពីក្រុងសែនមនោរម្យជាង ២០ គីឡូម៉ែត្រ ខណៈព្រលានយន្តហោះចាស់គ្រោងនឹងអភិវឌ្ឍធ្វើជាសួនសាធារណៈ។
ការលើកឡើងយ៉ាងដូច្នេះ គឺជាការឆ្លើយតបទៅនឹងសំណួរអ្នកកាសែតកាលពីម្សិលមិញ នៅក្នុងសន្និសីទសារព័ត៌មានស្ដីពី «វឌ្ឍនភាព និងទិសដៅការងារបន្ដរបស់រដ្ឋបាលខេត្ដមណ្ឌលគិរី» ដែលរៀបចំដោយអង្គភាពអ្នកនាំពាក្យរាជរដ្ឋាភិបាលនាទីស្តីការគណៈរដ្ឋមន្ត្រី។
លោក ស្វាយ សំអ៊ាង បានលើកឡើងថា កន្លងទៅខេត្តធ្លាប់មានព្រលានយន្តហោះចាស់រួចមកហើយ តាំងពីសម័យរំដោះឆ្នាំ ១៩៧៩។ ប៉ុន្តែដោយសារតែប្រភេទព្រលានយន្តហោះនៅក្នុងដំណាក់កាលនោះ វាលែងស័ក្តិសមនឹងស្ថានភាពនាពេលបច្ចុប្បន្ន ព្រោះតែមានប្រជាពលរដ្ឋរស់នៅជុំវិញច្រើន ហើយផ្ទៃដីក៏តូច។
លោកបន្តថា ព្រលានយន្តហោះចាស់គឺនៅសល់ដីប្រមាណ ១៩ ហិកតាប៉ុណ្ណោះ ខណៈដែលគម្រោងព្រលានយន្តហោះថ្មីបានត្រៀមដីដល់ ៦០០ ហិកតា។ លោកថា ចំពោះព្រលានយន្តហោះចាស់គឺទុកសម្រាប់អភិវឌ្ឍធ្វើសួនច្បារសាធារណៈជាជំហានៗទៅតាមលទ្ធភាពកញ្ចប់ថវិការបស់ខេត្ត បន្ទាប់ពីបានសិក្សាដោយក្រសួងរៀបចំដែនដីដែលត្រូវរក្សាទីតាំងនេះ សម្រាប់ធ្វើការអភិរក្សព្រៃឈើ។
លោកបញ្ជាក់ថា៖ «វា (ព្រលានចាស់) មិនអាចចតយន្តហោះបានទេ គួបផ្សំទៅនឹងកត្តាប្រជាពលរដ្ឋរស់នៅជុំវិញ យើងក៏បានបញ្ឈប់ការហោះហើរ ទៅតាមអនុសាសន៍របស់សម្តេចនាយករដ្ឋមន្ត្រី គឺយើងទុកទីតាំងព្រលាននេះ ធ្វើជាសួនច្បារហើយរកទីតាំងថ្មី។ ទីតាំងថ្មីនេះ គឺឃ្លាតពីក្រុងសែនមនោរម្យ ទៅឃុំសែនមនោរម្យ ស្រុកអូររាំងប្រមាណ ២២ គីឡូម៉ែត្រ ដែលវាជាការងារមួយក្នុងការពង្រីកព្រលានយន្តហោះខ្នាតធំនៅក្នុងស្រុក និងខ្នាតអន្តរជាតិ ដោយអាស្រ័យទៅលើការសិក្សារបស់អ្នកបច្ចេកទេស និងក្រសួងពាក់ព័ន្ធ»។
លោក ជុក ជំនោរ អ្នកនាំពាក្យក្រសួងទេសចរណ៍បានប្រាប់ភ្នំពេញប៉ុស្តិ៍ពីម្សិលមិញថា មន្ត្រីជំនាញកំពុងបន្តការសិក្សាលើគម្រោងអភិវឌ្ឍន៍ព្រលានយន្តហោះថ្មីនេះ ដោយភ្ជាប់ជាមួយនឹងគម្រោងអភិវឌ្ឍន៍ផែនការមេនៃវិស័យទេសចរណ៍នៅក្នុងខេត្តភាគឦសាន។
លោកបន្តថា នៅពេលគម្រោងទាំងនេះដំណើរការក្នុងពេលខាងមុខនឹងធ្វើឲ្យខេត្តទាំងមូល មានការអភិវឌ្ឍគ្រប់វិស័យ ជាពិសេសវិស័យទេសចរណ៍ស្របពេលដែលខេត្តនេះមានសក្តានុពលខាងវិស័យទេសចរណ៍បែបអេកូទេសចរណ៍។
លោកបញ្ជាក់ថា៖ «ការរៀបចំនេះ គឺមិនត្រឹមតែគិតគូរដល់វិស័យទេសចរណ៍ទេ សូម្បីវិស័យផ្សេងៗទៀតក៏ទទួលបានផលប្រយោជន៍ពីគម្រោងនេះ។ នៅពេលមានព្រលានយន្តហោះក្នុងពេលខាងមុខនេះគឺនឹងទាក់ទាញការហោះហើរត្រង់ក្នុងតំបន់គោលដៅទេសចរណ៍មួយចំនួននៅក្នុងប្រទេសអាស៊ានផងដែរ»។
លោក គ្រើង តុលា សកម្មជនការពារព្រៃឈើនៅខេត្តមណ្ឌលគិរីបានសាទរ ចំពោះគម្រោងអភិវឌ្ឍន៍របស់រដ្ឋាភិបាលក៏ដូចជាថ្នាក់ខេត្តដែលមានផែនការការពារដីរបស់រដ្ឋ ដើម្បីអភិវឌ្ឍព្រលានយន្តហោះថ្មី។ ប៉ុន្តែលោកមើលឃើញថា បន្ទាប់ពីមានការប្រកាសពីគម្រោងព្រលានយន្តហោះថ្មី តំបន់ទាំងនោះក៏ត្រូវបានអ្នកមានអំណាច និងអ្នកមានលុយ ដណ្តើមកាន់កាប់ដែលបង្កជាជម្លោះដែលធ្វើឲ្យប៉ះពាល់ដល់ការអភិវឌ្ឍ។
លោកបញ្ជាក់ថា៖ «យើងមិនដឹងថា កំហុសខាងណាទេ រាល់ថ្ងៃនេះ ឃើញថា គ្រាន់តែដឹងថា កន្លែងណាគេធ្វើព្រលានយន្តហោះ គេទៅចាប់ដីសិនហើយបានគេដោះស្រាយ ហើយបញ្ហានេះកើតចេញពីសំណាក់អាជ្ញាធរមូលដ្ឋានក៏មាន អ្នកមានអំណាចក៏មានដើម្បីឲ្យមានជាសំណង់ហូរហែ ហើយនេះជាចំណុចអាក្រក់មួយ ដែលធ្វើឲ្យមានការរាំងស្ទះគម្រោងនៃការអភិវឌ្ឍ»។
បន្ថែមពីនេះលោក គ្រើង តុលា ក៏រំពឹងថា អាជ្ញាធរខេត្តនឹងរក្សាព្រលានយន្តហោះចាស់ឲ្យបានគង់វង្ស ដើម្បីជាប្រយោជន៍ដល់សាធារណជនទូទៅ ចៀសវាងយកវាទៅប្រើប្រាស់ក្នុងប្រយោជន៍ឯកជន ខណៈលោកសង្កេតឃើញថាដីមួយចំនួននៅទីតាំងព្រលានយន្តហោះចាស់ត្រូវបានវិស័យឯកជនគ្រប់គ្រង។
ប៉ុន្តែលោក ស្វាយ សំអ៊ាង បានបញ្ជាក់ថា ដើម្បីការពារដីធ្លីពីការរំលោភបំពាន អាជ្ញាធរខេត្តរួមជាមួយស្ថាប័នពាក់ព័ន្ធបានកាយព្រំដី និងរៀបចំកំណត់ ព្រំដីដោយដោះស្រាយបញ្ហានានាលើដីនេះ រួចរាល់អស់ហើយ ដោយរង់ចាំតែដៃគូវិនិយោគ ឬក៏មានទុនសម្រាប់អភិវឌ្ឍព្រលានយន្តហោះនេះតែប៉ុណ្ណោះ។
លោកបញ្ជាក់ថា៖ «គ្រាន់តែបានត្រៀមរៀបចំការពារដីទាំង ៦០០ ហិកតានោះ ឲ្យបាននៅទីនោះ នៅពេលដែលរដ្ឋាភិបាលមានថវិកាវិនិយោគគឺយើងមានដី ដើម្បីចៀសវាងពេលអត់ដីពិបាកក្នុងការអភិវឌ្ឍព្រលានយន្តហោះនេះ។ មកដល់ពេលនេះការគិតគូររបស់អាកាសចរណ៍ស៊ីវិល គឺបានកាយព្រំដី និងរៀបចំកំណត់ដោះស្រាយបញ្ហា (លើដី) នេះអស់ហើយ»៕