.jpg)
អាជ្ញាធរខេត្តមណ្ឌលគិរីចុះពិនិត្យគម្រោងព្រលានយន្តហោះនៅស្រុកអូររាំង ពីថ្ងៃទី ៧ មេសា។ រូបមន្ទីរព័ត៌មានខេត្តមណ្ឌលគិរី
មណ្ឌលគិរីៈ អភិបាលខេត្តមណ្ឌលគិរី លោក សា្វយ សំអ៊ាង ជំរុញឱ្យមន្ត្រីជំនាញនៃមន្ទីរ អង្គភាពពាក់ព័ន្ធរួមសហការគ្នាឱ្យបានល្អជាមួយអាជ្ញាធរមូលដ្ឋានក្នុងការគ្រប់គ្រងដីរដ្ឋពីការរំលោភបំពានរបស់ពលរដ្ឋទាំងក្នុង និងក្រៅមូលដ្ឋាន។ នេះបើតាមមន្ត្រីនាំពាក្យរដ្ឋបាលខេត្ត។
បើតាមលោក ជៀក ម៉េងហ៊ាង អភិបាលរង និងជាអ្នកនាំពាក្យរដ្ឋបាលខេត្តមណ្ឌលគិរី ការជំរុញនេះធ្វើឡើងកាលពីថ្ងៃទី ៦ មេសា បន្ទាប់ពីលោក ស្វាយ សំអ៊ាង ដឹកនាំកម្លាំងគណៈបញ្ជាការកងឯកភាពចុះពិនិត្យស្ថានភាពនៃការទន្ទ្រានកាន់ដីដោយខុសច្បាប់ក្នុងស្រុកអូររាំង ដែលជាតំបន់អភិវឌ្ឍន៍គម្រោងសាងសង់ព្រលានយន្តហោះថ្មីនៃខេត្តនេះ។
លោក ជៀក ម៉េងហ៊ាង ប្រាប់ ភ្នំពេញ ប៉ុស្តិ៍ នៅថ្ងៃពុធថា ថ្មីៗនេះរដ្ឋបាលខេត្តបានពិនិត្យឃើញករណីពលរដ្ឋចំណាកស្រុកមួយចំនួនបានចលនាប្រជាពលរដ្ឋក្នុងឃុំសែនមនោរម្យនៃស្រុកអូររាំងឱ្យដាំដំណាំកញ្ឆាខុសច្បាប់ក្នុងព្រៃបម្រុងទុករបស់រដ្ឋនៃតំបន់អភិវឌ្ឍន៍គម្រោងសាងសង់ព្រលានយន្តហោះមណ្ឌលគិរី និងក្នុងតំបន់ដែនជម្រកសត្វព្រៃកែវសីមា។ ប៉ុន្តែត្រូវបានកម្លាំងនគរបាលមូលដ្ឋាន និង ក្រុមមន្ត្រីឧទ្យានុរក្ស ចុះបង្ក្រាប និងដកហូតដីទាំងនោះមកធ្វើជាសម្បត្តិរដ្ឋវិញជាបន្តបន្ទាប់។
លោកថ្លែងថា៖ «បន្ទាប់ពីករណីនេះកើតឡើង ឯកឧត្តមអភិបាលខេត្តបានជំរុញដល់គ្រប់មន្ទីរ និងអង្គភាពពាក់ព័ន្ធរួមសហការគ្នាជាមួយអាជ្ញាធរមូលដ្ឋាន ចុះបោះបង្គោល និងកាយជាចង្អូរកំណត់ ព្រំប្រទល់ទីតាំងដីតំបន់អភិវឌ្ឍន៍គម្រោង ព្រលានយន្តហោះ និងតំបន់ដែនជម្រកសត្វព្រៃកែវសីមាឱ្យបានច្បាស់លាស់ ដើម្បីទប់ស្កាត់ការទន្ទ្រានកាន់កាប់ដីរដ្ឋខុសច្បាប់»។
បើតាមលោក ម៉េងហ៊ាង ទីតាំងដែលអ្នកភូមិលួចចូលទន្ទ្រានដាំដំណាំកញ្ឆាខុសច្បាប់ និងត្រូវបានកម្លាំងសមត្ថកិច្ចការិយាល័យបង្ក្រាបគ្រឿងញៀននៃស្នងការដ្ឋាននគរបាលខេត្តមណ្ឌលគិរី សហការជាមួយកម្លាំងអធិការដ្ឋាននគរបាលស្រុកអូររាំងចុះបង្ក្រាប និងដកហូតមកវិញកាលពីថ្ងៃទី ៤ មេសា នោះគឺស្ថិតក្នុងទីតាំងដីបម្រុងទុករបស់រដ្ឋ សម្រាប់អភិវឌ្ឍគម្រោងសាងសង់ព្រលានយន្តហោះខេត្តមណ្ឌលគិរី។ តំបន់អភិវឌ្ឍន៍គម្រោងសាងសង់ព្រលានយន្តហោះខេត្តមណ្ឌលគិរីមានផ្ទៃដីសរុប ៦០០ ហិកតា ស្ថិតក្នុងឃុំសែនមនោរម្យ ស្រុកអូររាំង។
ទោះយ៉ាងណានៅមានទីតាំងដីជាច្រើនកន្លែងទៀតក្នុងតំបន់ដែនជម្រកសត្វព្រៃកែវសីមា ត្រូវបានរកឃើញមានការចូលកាប់ទន្ទ្រានដើម្បីពង្រីកដីកសិកម្ម ដោយខុសច្បាប់។ នេះបើតាមការអះអាងរបស់លោក អ៊ុង សេរីវុទ្ធី មេភូមិអូររាំង កាលពីម្សិលមិញ។
លោកប្រាប់ ភ្នំពេញ ប៉ុស្តិ៍ថា ថ្មីៗនេះមានអ្នកភូមិមួយចំនួនបានរួមគំនិតជាមួយមនុស្សចំណូលថ្មីចូលទៅកាប់ទន្ទ្រានដីព្រៃសហគមន៍ និងព្រៃក្នុងតំបន់ ដែនជម្រកសត្វព្រៃកែវសីមា។ សកម្មភាពនេះបានកើតឡើងចាប់តាំងពីដើមខែមីនា ឆ្នាំ ២០២១ ក្នុងអំឡុងពេលកម្លាំងសមត្ថកិច្ចជំនាញកំពុងជាប់រវល់ខ្លាំងក្នុងភារកិច្ចប្រយុទ្ធប្រឆាំងនឹងជំងឺកូវីដ ១៩។
លោក សេរីវុទ្ធី ថ្លែងថា៖ «អ្នកចំណូលថ្មីគេចូលមកទិញដីអ្នកភូមិ ហើយអ្នកភូមិយើងមួយចំនួនបាននាំគ្នាលក់។ បន្ទាប់មក ក៏នាំគ្នាចូលទៅកាប់រានដីព្រៃសហគមន៍ និងដីព្រៃក្នុងតំបន់ដែនជម្រកសត្វព្រៃកែវសីមា ដើម្បីយកដីសង់ផ្ទះនៅ»។
ករណីនេះបានកើតមានស្ទើរគ្រប់កន្លែងទាំងអស់ក្នុងតំបន់ដែនជម្រកសត្វព្រៃកែវសីមា ហើយក្រុមមន្ត្រីឧទ្យានុរក្សបានប្រឹងប្រែងចុះល្បាតស្រាវជ្រាវ និងបង្ក្រាបបានជាបន្តបន្ទាប់ផងដែរ។ នេះជាការអះអាងពីលោក ព្រំ វិបុលរតនៈ ប្រធានដែនជម្រកសត្វព្រៃកែវសីមាកាលពីម្សិលមិញ។
លោកបន្តថា កន្លងមកអ្នកភូមិមួយចំនួនត្រូវបានចាប់ឃាត់ខ្លួនមកធ្វើការអប់រំណែនាំ និងផាកពិន័យតាមច្បាប់ស្ដីពីការការពារធនធានធម្មជាតិ។ ខ្លះទៀតក៏ត្រូវបានកសាងសំណុំរឿងបញ្ជូនឱ្យតុលាការចាត់វិធានការបន្តតាមនីតិវិធីច្បាប់។
លោក វិបុលរតនៈ បញ្ជាក់ថា៖ «ក្នុងអំឡុងពេលនេះ ក្រុមមន្ត្រីឧទ្យានុរក្សរបស់យើងបានបង្កើនសកម្មភាពចុះល្បាតទប់ស្កាត់បទល្មើសច្រើនជាងមុន ហើយបទល្មើសកាប់ទន្ទ្រានដីព្រៃក្នុងដែនជម្រកសត្វព្រៃកែវសីមា ដើម្បីយកដីពង្រីកផ្ទៃដីកសិកម្មខុសច្បាប់ត្រូវបានប្រទះឃើញជាច្រើនកន្លែង»។
លោកបានបន្តថា៖ «ទីតាំងដែលមានការទន្ទ្រានកាន់កាប់ច្រើនជាងគេនៅឃុំស្រែព្រះ និងឃុំស្រែខ្ទុំ ស្រុកកែវសីមា និងឃុំសែនមនោរម្យ ស្រុកអូររាំង»។
ទាក់ទិននឹងការបោះបង្គោលកំណត់ព្រំប្រទល់ទីតាំងដីនៃតំបន់ដែនជម្រកសត្វព្រៃកែវសីមា លោក វិបុលរតនៈ ថ្លែងថា ក្រុមការងារលោកបានធ្វើកិច្ចការនេះតាំងពីឆ្នាំ ២០១៨។ គិតមកទល់ពេលនេះសម្រេចបាន ១១៥ បង្គោលហើយ៕
