.jpg)
អាជ្ញាធរខេត្តមណ្ឌលគិរីចុះពិនិត្យទីតាំងដីពលរដ្ឋកាប់រាន។ រូបថត ក្រសួងមហាផ្ទៃ
មណ្ឌលគិរីៈ អាជ្ញាធរខេត្តមណ្ឌលគិរីបានប្រាប់ពលរដ្ឋមកពីខេត្តត្បូងឃ្មុំ ដែលបានទន្ទ្រានរានយកដីព្រៃ ធ្វើជាកម្មសិទ្ធិជាច្រើនហិកតានៅចំណុចព្រៃខៀវ ស្ថិតនៅភូមិរវ៉ាក់ ឃុំរយ៉ ស្រុកកោះញែក ឱ្យបញ្ឈប់សកម្មភាព និងវិលត្រឡប់ទៅកាន់ស្រុកកំណើតរបស់ខ្លួនវិញជាបន្ទាន់។
លោក នាង វណ្ណៈ អ្នកនាំពាក្យរដ្ឋបាលខេត្តមណ្ឌលគិរីប្រាប់ភ្នំពេញប៉ុស្តិ៍ពីម្សិលមិញថា ពលរដ្ឋមកពីខេត្តត្បូងឃ្មុំបានចូលមកកាប់ទន្ទ្រានកាន់កាប់ដីថ្មីនៅក្នុងចំណុចព្រៃខៀវដោយពួកគេបានទិញដីនៅក្នុងតំបន់នេះ តាមរយៈមេខ្យល់ដែលបានរៀបចំដីឱ្យពួកគេ និងបានសាងសង់រោង និងខ្ទមនៅលើដីដែលខុសច្បាប់នេះ។
លោកថ្លែងថា ដីដែលពលរដ្ឋបានទិញនេះត្រូវបានគេពុះជាឡូត៍ក្នុងទំហំក្បាល ៥០ ម៉ែត្រគុណ ១ ០០០ ម៉ែត្រដែលមានតម្លៃ ១ លានរៀលពីមេខ្លោង ឬមេខ្យល់ ហើយបច្ចុប្បន្ននេះអាជ្ញាធរខេត្តកំពុងស្រាវជ្រាវស្វែងរកមេខ្លោង និងអ្នកនៅពីក្រោយយកមកអនុវត្តទៅតាមច្បាប់។
លោក នាង វណ្ណៈ ថ្លែងថា៖ «នៅពេលដែលយើងចុះទៅពិនិត្យជាក់ស្តែងទីតាំងនេះគឺឃើញប្រជាពលរដ្ឋបាននិងកំពុងសាងសង់រោង និងខ្ទមនៅលើដីដែលខុសច្បាប់នេះឯកឧត្តមអភិបាលខេត្តបានណែនាំដល់បងប្អូនប្រជាពលរដ្ឋប្រាប់ពលរដ្ឋថា ការធ្វើនេះវាខុសច្បាប់ និងឱ្យបញ្ឈប់សកម្មភាពជាបន្ទាន់»។
ទោះជាយ៉ាងណាលោក នាង វណ្ណៈ ថាបច្ចុប្បន្ននេះរដ្ឋបាលខេត្តមិនទាន់បានបូកសរុបពីទិន្នន័យដី និងពលរដ្ឋដែលត្រូវបានទន្ទ្រានរានយកដីធ្វើជាកម្មសិទ្ធិនោះទេ ប៉ុន្តែបើតាមការសាកសួរប្រជាពលរដ្ឋនៅទីនោះជាក់ស្តែង គឺ ដីដែលគាត់ (មេខ្យល់) បែងចែកមានជាង ១០០ ឡូត៍ ហើយដោយប្រជាពលដ្ឋខ្លះមាន ២ ឬ ៣ ឡូត៍ ក្នុង ១ គ្រួសារ។
បើតាមលោក នាង វណ្ណៈ តំបន់ព្រៃខៀវនេះមានពលរដ្ឋរស់នៅជាង ១ ០០០ គ្រួសារ ដែលបានកាប់រានពីមុន និងបច្ចុប្បន្ននេះ ហើយដីដែលត្រូវបានទន្ទ្រានថ្មីនេះគឺស្ថិតនៅក្រោមការគ្រប់គ្រងរបស់រដ្ឋបាលព្រៃឈើខេត្ត។
លោកបញ្ជាក់ថា៖ «បើឱ្យគាត់ចេះតែដើរកាប់ឆ្ការ ធ្វើជាកម្មសិទ្ធិបែបនេះ មិនដឹងនរណាគ្រប់គ្រងនរណាទេ ហើយយើងបានណែនាំឱ្យពួកគាត់បញ្ឈប់សកម្មភាព និងឱ្យគាត់ទៅរស់នៅក្នុងស្រុកកំណើតគាត់វិញ ព្រោះរស់នៅទីនេះខុសច្បាប់»។
ទោះយ៉ាងណាលោក វណ្ណៈ លើកឡើងថា បើពលរដ្ឋទាំងនោះអត់មានដីអាស្រ័យផលពិតប្រាកដមែនពលរដ្ឋទាំងនោះអាចដាក់ពាក្យស្នើសុំដីសម្បទានសង្គមកិច្ចនៅខេត្តដែលខ្លួនរស់នៅតាមរយៈភូមិ ឃុំ និងខេត្តស្នើមកខេត្តមណ្ឌលគិរីមកខេត្តអាចពិចារណាចាត់ចែងជូនបាន។
លោក បូរ៉េត កំពី ជំនួយការសមាគម អាដហុកប្រចាំនៅខេត្តមណ្ឌលគិរីថ្លែងថានៅក្នុងខេត្តមណ្ឌលគិរីនេះ គឺមានសកម្មភាព រុករានកាប់ទន្ទ្រានយកដីរដ្ឋធ្វើជាកម្មសិទ្ធិពីសំណាក់ប្រជាពលរដ្ឋ ស្ទើរតែគ្រប់ទីកន្លែង មិនថានៅចំណុចព្រៃខៀវ។
ប្រជាពលរដ្ឋមួយចំនួនមានគំនិតខូចខ្លាំងណាស់ដោយបានចូលទន្ទ្រានកាន់កាប់ដីរដ្ឋដោយខុសច្បាប់ និងមួយវិញទៀត គឺមានឈ្មួញ ឬមេខ្យល់ប្រមូលឈ្មោះប្រជាពលរដ្ឋទៅទន្ទ្រានយកដីរដ្ឋ ដោយសហការជាមួយនឹងមន្ត្រីមូលដ្ឋានជាថ្នូរទៅនឹងការបានលុយកាក់ខ្លះដូចទៅនឹងករណីនៅចំណុចព្រៃខៀវនេះដែរ។
លោកបញ្ជាក់ថា បើអាជ្ញាធរមានសមត្ថកិច្ចមិនមានវិធានការសមស្រប ឬអនុវត្តច្បាប់ឱ្យបានតឹងរ៉ឹងទេ វានឹងធ្វើឱ្យមានអនាធិបតេយ្យទៅលើការគ្រប់គ្រងដីរដ្ឋនេះជាពិសេសវានឹងធ្វើឱ្យប៉ះពាល់ដល់ធនធានធម្មជាតិ និងដីសាធារណៈរបស់រដ្ឋ។
លោកថ្លែងថា៖ «ខ្ញុំមិនគាំទ្រទេ ចំពោះប្រជាពលរដ្ឋក៏ដូចជាអាជ្ញាធរដែលបានចូលទៅទន្ទ្រានរានយកដីរដ្ឋធ្វើជាកម្មសិទ្ធិនេះ ព្រោះនេះជាដីរដ្ឋ ឬដីព្រៃរបស់រដ្ឋ ជារបស់យើងទាំងអស់គ្នា មិនមែនបុគ្គលម្នាក់ ឬ ២ នាក់អាចទៅចង្អុលនេះ ជាដីរបស់អញ នោះជាដីរបស់អញ។ ធ្វើអ៊ីចឹងវាមិនត្រូវទេ អាជ្ញាធរគួរតែមានវិធានការហើយ»។
លោក ស្វាយ សំអ៊ាង អភិបាលខេត្តមណ្ឌលគិរីកាលពីថ្ងៃទី ៣ ខែមេសា បានចុះពិនិត្យមើលស្ថានភាព ការកាប់រុករានដីព្រៃយកដីធ្វើជាកម្មសិទ្ធិនៅចំណុចព្រៃខៀវស្ថិតនៅភូមិរវ៉ាក់ ឃុំរយ៉ ស្រុកកោះញែក ដើម្បីទប់ស្កាត់ លុបបំបាត់ និងបង្ក្រាបការកាប់រាន ដុត ឈូសឆាយ និងហ៊ុមព័ទ្ធដីព្រៃឈើធ្វើជាកម្មសិទ្ធិ។
លោក ស្វាយ សំអ៊ាង បានណែនាំដល់មន្ត្រីជំនាញត្រូវចុះពិនិត្យ សិក្សាស្រាវជ្រាវ និងបង្ក្រាបបទល្មើសដីព្រៃឈើគ្រប់ប្រភេទ ជាពិសេសត្រូវចំណាត់ការឱ្យបានម៉ឺងម៉ាត់ចំពោះមេខ្យល់ និងមេខ្លោងដែលរៀបចំឱ្យមានចលនានៃការកាប់រាន ដុត ឈូសឆាយ និងហ៊ុមព័ទ្ធយកដីព្រៃខុសច្បាប់៕
