.jpg)
ជនជាតិ ៥ នាក់ ត្រូវបានចាប់ឃាត់ខ្លួននៅក្នុងខេត្តតាកែវ បន្ទាប់ពីឆ្លងដែនមកពីប្រទេសវៀតណាម។ រូបថត ប៉ូលិស
ភ្នំពេញៈ អាជ្ញាធរខេត្តមួយចំនួនកំពុងរឹតបន្តឹងតាមច្រកចេញចូលខេត្តរបស់ខ្លួន ដោយការដាក់ប៉ុស្តិ៍យាមត្រួតពិនិត្យ ហើយតម្រូវឱ្យអ្នកធ្វើដំណើរដែលមានជាប់សង្ស័យនឹងព្រឹតិ្តការណ៍សហគមន៍ ២០ កុម្ភៈ ធ្វើចត្តាឡីស័ករយៈពេល ១៤ ថ្ងៃ មុនចូលខេត្តរបស់ពួកគេ ដើម្បីទប់ស្កាត់ ការរីករាលដាលជំងឺកូវីដ ១៩ ដែលកំពុងផ្ទុះឡើងជាបន្តបន្ទាប់។
ការដាក់ចេញវិធានការជាបន្តបន្ទាប់របស់ខេត្តទាំងនេះធ្វើឡើងតាមសេចក្តីណែនាំរបស់រដ្ឋាភិបាល ដោយតម្រូវឱ្យខេត្តនីមួយៗត្រៀមការពារ និងរឹតបន្តឹងសន្តិសុខ សុវត្ថិភាព ជាពិសេសការទប់ស្កាត់ការចម្លងជំងឺកូវីដ ១៩ ទៅក្នុងសហគមន៍កាន់តែខ្លាំងបន្ថែមទៀត។
ជាមួយនឹងវិធានការនេះលោក ម៉ៅ ឌុង នាយករដ្ឋបាលសាលាខេត្តត្បូងឃ្មុំ ប្រាប់ភ្នំពេញប៉ុស្តិ៍ពីម្សិលមិញថា ប្រជាពលរដ្ឋរស់នៅរាជធានី-ខេត្តដែលមានហានិភ័យខ្ពស់ទៅនឹងជំងឺកូវីដ ១៩ គឺតម្រូវឱ្យធ្វើចត្តាឡីស័ករយៈពេល ១៤ ថ្ងៃជាមុនសិនទើបអនុញ្ញាតឱ្យចូលខេត្តត្បូងឃ្មុំ។ ការរឹតបន្តឹងយ៉ាងដូច្នេះ ក៏ព្រោះតែខេត្តនេះមិនទាន់មានករណីឆ្លងជំងឺកូវីដ ១៩ ក្នុងសហគមន៍នៅឡើយទេដែលជាហេតុនាំឱ្យរដ្ឋបាលខេត្តត្រូវតែដាក់ចេញវិធានការឱ្យបានម៉ឺងម៉ាត់ កុំឱ្យជំងឺនេះឆ្លងចូលទៅក្នុងសហគមន៍នៃខេត្តរបស់ខ្លួន។
លោកបញ្ជាក់ថា៖ «ពេលដែលពលរដ្ឋជាប់សង្ស័យពីតំបន់ដែលមានហានិភ័យទៅស្រុកណាមួយក្នុងខេត្តយើងត្រូវយកគាត់ទៅធ្វើចត្តាឡីស័ក ១៤ ថ្ងៃ នៅតាមទីកន្លែងដែលបានរៀបចំរួចរាល់ ដោយមានការផ្គត់ផ្គង់ និងទំនុកបម្រុងនូវម្ហូបអាហារជូនដល់ពួកគាត់។ ចំពោះអ្នកដែលមិនមែនមកពីកន្លែងហានិភ័យនេះ យើងឱ្យគាត់ចូលធម្មតា ដោយពិនិត្យសុខភាព»។
បើទោះជាខេត្តនេះនៅមិនទាន់មានករណីអ្នកជំងឺកូវីដ ១៩ ក្នុងព្រឹត្តិការណ៍ ២០ កុម្ភៈ ប៉ុន្តែលោកអះអាងថា គិតត្រឹមថ្ងៃទី ១៤ មីនា មានអ្នកកំពុងធ្វើចត្តាឡីស័កប្រមាណជិត ៥០០ នាក់។ ពួកគេគឺជាអ្នកដំណើរមកពីខេត្តផ្សេងៗ និងអ្នកដែលទើបតែឆ្លងដែនពីប្រទេសវៀតណាម។
ស្រដៀងគ្នានេះ លោក ទៀ សីហា អភិបាលខេត្តសៀមរាបក៏បានបញ្ជាឱ្យកងកម្លាំងប្រដាប់អាវុធទាំងអស់ និងក្រុមការងារមន្ទីរសុខាភិបាលដាក់ប៉ុស្តិ៍ត្រួតពិនិត្យនៅច្រកចេញចូលទាំង ៦ របស់ខេត្តធ្វើយ៉ាងណាត្រូវប្រាកដថា ពលរដ្ឋដែលមានការសង្ស័យនឹងអ្នកជំងឺកូវីដគឺត្រូវបានទប់ស្កាត់ទាន់ពេលវេលាមិនឱ្យឆ្លងបន្តចូលខេត្តសៀមរាបនោះទេ។
លោកបានតម្រូវឱ្យដាក់ប៉ុស្តិ៍ត្រួតពិនិត្យនៅច្រកចំនួន ៦ គឺមកពីខេត្តកំពង់ធំលើផ្លូវជាតិលេខ ៦ ចន្លោះពីស្រុកស្ទោង និងស្រុកជីក្រែង និងចន្លោះពីស្រុកក្រឡាញ់រវាងស្រុកព្រះនេត្រព្រះ ដែលចូលមកពីខេត្តបន្ទាយមានជ័យ និងខេត្តបាត់ដំបង។ ចំណែកនៅលើកំណត់ផ្លូវជាតិលេខ ៦៨ ចន្លោះពីស្រុកចុងកាល់ និងស្រុកស្រីស្នំ និងផ្លូវជាតិលេខ ៦៦ ចន្លោះពីស្រុកអន្លង់វែងមកវ៉ារិន និងផ្លូវជាតិលេខ ៦៤ ចន្លោះពីស្រុកគូលែន ខេត្តព្រះវិហារមកស្រុកស្វាយលើក៏ត្រូវធ្វើការរឹតបន្តឹងផងដែរ។
ក្រៅពីនេះលោកថាការធ្វើចរាចរណ៍លើផ្លូវទឹកចូលមកខេត្តនេះក៏ត្រូវបានរឹតបន្តឹង ដើម្បីធ្វើការការពារការរីករាលដាលជំងឺកូវីដ១៩ ចូលមកក្នុងខេត្តសៀមរាប។ លោកអះអាងថា អ្នកដែលគ្មានការសង្ស័យនៅតែអាចឆ្លងកាត់ជាធម្មតា ដោយគ្រាន់តែត្រូវត្រួតពិនិត្យតាមវិធានសុខាភិបាល។
លោកបញ្ជាក់ថា៖ «ចំពោះប៉ុស្តិ៍ត្រួតពិនិត្យនេះ យើងមិនមែនបិទមិនឱ្យចូលទេ យើងដាក់ប៉ុស្តិ៍ត្រួតពិនិត្យនេះក្នុងន័យការស្រង់ទិន្នន័យ សួរនាំថាតើអ្នកធ្វើដំណើរនេះមានគោលដៅទៅណាខ្លះ? ហើយគាត់មកពីណា? បើសិនជាមកពីខេត្ត និងរាជធានីដែលមានហានិភ័យ ដូចជារាជធានីភ្នំពេញ ព្រៃវែង និងកំពង់សោមជាដើមគឺត្រូវតែយកខ្លួនមកធ្វើចត្តាឡីស័ក និងពិនិត្យយកសំណាក»។
ព្រឹត្តិការណ៍សហគមន៍ ២០ កុម្ភៈនេះបានបន្តឆ្លងរីករាលដាលដល់រាជធានី-ខេត្តចំនួន ១០ នៃប្រទេសកម្ពុជារួមមាន រាជធានីភ្នំពេញ ខេត្តកណ្តាល ព្រៃវែង បាត់ដំបង កំពង់ចាម កំពង់ធំ សៀមរាប ព្រះសីហនុ កោះកុង និងខេត្តស្វាយរៀងចំនួន ៧៥១ នាក់ ស្រី ៣៥៧ ប្រុស ៣៩៤ នាក់ក្នុងនោះភ្នំពេញច្រើនជាងគេ។ បន្ទាប់មកខេត្តព្រះសីហនុ កណ្តាល និងព្រៃវែង។
លោក ខៀវ សុភ័គ អ្នកនាំពាក្យក្រសួងមហាផ្ទៃបានប្រាប់ ភ្នំពេញ ប៉ុស្តិ៍ ពីម្សិលមិញថា វិធានការដែលខេត្តនីមួយៗបានដាក់ចេញ គឺជាឆន្ទានុសិទ្ធិរបស់រដ្ឋបាលខេត្តទាំងនោះដោយផ្អែកលើស្ថានភាព និងភាពប្រឈមនៅក្នុងតំបន់របស់ពួកគេ។ លោកបន្តថា ខេត្តទាំងនោះអាចដាក់ចេញវិធានការនានា ដូចជាការបិទ ការផ្អាក ការធ្វើចរាចរណ៍ ឬតម្រូវឱ្យពលរដ្ឋធ្វើចត្តាឡីស័កទៅតាមស្ថានភាពជាក់ស្តែង។
លោកថ្លែងថា៖ «យើងជាថ្នាក់កណ្តាលណែនាំមិនច្បាស់លាស់ដូចថ្នាក់មូលដ្ឋានគាត់ទេ។ ឧទាហរណ៍ដូចខេត្តព្រៃវែងអ៊ីចឹង គាត់ដឹងកន្លែងណាៗ មានឆ្លងមានហានិភ័យ ព្រោះគាត់ដឹងលំហូរប្រជាពលរដ្ឋគាត់ទៅណាមកណា? ខេត្តនេះក៏បានបិទតំបន់ និងបិទផ្សារមួយចំនួនដែលបានឆ្លងរួចដែរ»។
បើតាមលោក ខៀវ សុភ័គ ក្រុមមេខ្យល់នាំពលករឆ្លងដែនខុសច្បាប់ដោយគេចពីការធ្វើចត្តាឡីស័កពីប្រទេសថៃ និងវៀតណាមដែលអាជ្ញាធរតាមព្រំដែនចាប់ខ្លួនបានគឺជិត ១០០ នាក់ គិតចាប់ពីថ្ងៃទី ១៣ ខែកុម្ភៈ មកដល់ថ្ងៃទី ២៣ ខែកុម្ភៈ ឆ្នាំ ២០២១។ ពួកគេត្រូវបានបញ្ជូនទៅតុលាការហើយ ដើម្បីផ្តន្ទាទោសតាមនីតិវិធីច្បាប់៕
វីដេអូ៖
