ស្វាយរៀងៈ សាលាខេត្តស្វាយរៀងបានបដិសេធសំណើរបស់លោក សួន សេរីរដ្ឋា ប្រធានគណបក្សអំណាចខ្មែរដែលគ្រោងដឹកនាំមន្ត្រីស្ថានទូតនៃប្រទេសហត្ថលេខីកិច្ចព្រមព្រៀងទីក្រុងប៉ារីសចុះធ្វើទស្សនកិច្ចពិនិត្យស្ថានភាពតំបន់ព្រំដែនកម្ពុជា-វៀតណាម។
កាលពីថ្ងៃទី ២៣ ខែតុលា គណបក្សអំណាចខ្មែរបានចុះពិនិត្យមើលតំបន់បង្គោលព្រំដែនលេខ ១៣៥ និង ១៣៨ នៅឃុំដូង ស្រុករមាសហែក ខេត្តស្វាយរៀង និងបានជួបជាមួយប្រជាពលរដ្ឋរស់នៅតំបន់នោះតែមិនបានបង្ហាញនូវលទ្ធផលសម្រាប់ការពិនិត្យរបស់ខ្លួននោះទេ។ ក្រោយមកនៅថ្ងៃទី ២៦ ខែតុលាគណបក្សនេះក៏បានដាក់លិខិតស្នើទៅកាន់អាជ្ញាធរខេត្តស្វាយរៀងពីគម្រោងដឹកនាំមន្ត្រីស្ថានទូតទាំង ១៨ នៃប្រទេសហត្ថលេខីកិច្ចព្រមព្រៀងទីក្រុងប៉ារីសដើម្បីធ្វើទស្សនកិច្ចសិក្សាពីស្ថានភាពតំបន់នោះនៅថ្ងៃទី ៣០ ខែតុលានេះ។
យ៉ាងណាក៏ដោយតាមលិខិតឆ្លើយតបចុះថ្ងៃទី ២៨ ខែតុលា លោក ម៉ែន វិបុល អភិបាលខេត្តស្តីទីបានឲ្យដឹងថារដ្ឋបាលខេត្តមិនអាចសម្រេចជូនតាមសំណើបានទេព្រោះការងារនេះជាសមត្ថកិច្ចរបស់ក្រសួងស្ថាប័នថ្នាក់ជាតិ និងគណៈកម្មាធិការចម្រុះកិច្ចការព្រំដែន។
អ្នកនាំពាក្យគណបក្សអំណាចខ្មែរលោក ទេព វីរៈ បានឲ្យដឹងថាគណបក្សនេះស្នើសុំជាថ្មីម្តងទៀតទៅកាន់អាជ្ញាធរខេត្តនេះក្រសួងមហាផ្ទៃ និងគណៈកម្មាធិការចម្រុះកិច្ចការព្រំដែនក្រោមការគាំទ្ររបស់ស្ថានទូតពាក់ព័ន្ធបន្ទាប់ពីបញ្ចប់ពិធីបុណ្យអុំទូក។
លោកថា រហូតមកទល់ថ្ងៃម្សិលមិញមានស្ថានទូតអាមេរិក និងមន្ត្រីទូតខ្លះបានឆ្លើយតបជាវិជ្ជមានចំពោះទស្សនកិច្ចនេះដើម្បីស្វែងយល់អំពីបញ្ហាព្រំដែនរវាងកម្ពុជា-វៀតណាម។
ប៉ុន្តែអ្នកនាំពាក្យស្ថានទូតសហរដ្ឋអាមេរិកប្រចាំកម្ពុជាលោក Jay Raman បានឲ្យដឹងតាមអ៊ីមែលថាស្ថានទូតអាមេរិកមិនមានជំហរក្នុងការចូលរួមចុះទៅពិនិត្យព្រំដែន និងមិនទាន់បានជួបពិភាក្សាជាមួយគណបក្សនេះនៅឡើយទេ។
លោក ទេព វីរៈ បញ្ជាក់ថា៖ «គោលដៅរបស់យើងគឺចង់ឲ្យស្ថានទូតម្ចាស់ប្រទេសហត្ថលេខីអាចបានឃើញ និងចុះពិនិត្យផ្ទាល់នៅតំបន់តាមព្រំដែនថាតើមានការបំពានពីវៀតណាមពិតមែនឬយ៉ាងណា ដើម្បីចាត់វិធានការហើយក៏នឹងមានការសាកសួរប្រជាពលរដ្ឋនៅតំបន់នោះពីទុក្ខលំបាករបស់ពួកគេជាជាងការចាំតែស្តាប់បក្សនយោបាយ ឬរដ្ឋាភិបាលប្រាប់»។
ទាក់ទិននឹងរឿងនេះលោក វ៉ា គឹមហុង ទេសរដ្ឋមន្ត្រីទទួលបន្ទុកកិច្ចការព្រំដែនបានឲ្យដឹងពីម្សិលមិញថាការសុំពិនិត្យព្រំដែនពីសំណាក់គណបក្សនយោបាយគប្បីសិក្សាឲ្យបានច្បាស់ និងបង្ហាញពីគោលដៅដែលខ្លួនចង់ទៅ និងអ្វីដែលចង់បានជាជាងគេស្នើចុះទៅដើម្បីបង្ករឿង ឬការភាន់ច្រឡំ។
លោកថា៖ «ខ្ញុំមិនចង់ឲ្យមានបញ្ហាអីទេតែគេគួរតែសិក្សាឲ្យបានច្បាស់ចង់ធ្វើអីបញ្ជាក់ឲ្យច្បាស់បើមិនច្បាស់កុំចេះតែនាំរឿងអង្គទូតក៏មិនគួរចេះតែទៅដើរព្រោះតាមនីតិវិធីអង្គទូតអាចចូលរួមលុះណាមានការរៀបចំតាមរយៈក្រសួងការបរទេសមិនមែនគណបក្សតូចមួយហៅចេះតែទៅទេ»។
បើតាមគណបក្ស អំណាច ខ្មែរ ខ្លួនបានដាក់លិខិតអញ្ជើញទៅកាន់តំណាងទូតដែលជាតំណាងប្រទេសហត្ថលេខីនៃកិច្ចព្រមព្រៀងទីក្រុងប៉ារីសចំនួន ១៨ តែក្នុងនោះស្ថានទូតវៀតណាមមិនបានទទួលយកលិខិតអញ្ជើញនោះទេ៕
