កោះកុងៈ រដ្ឋបាលខេត្តកោះកុងឱ្យរដ្ឋបាលស្រុកបទុមសាគរ និងអាជ្ញាធរឃុំពាក់ព័ន្ធ ចុះស្រង់ទិន្នន័យឈ្មោះពលរដ្ឋក្នុងចំណោម ១៣១ គ្រួសារ ដែលទទួលរងការប៉ះពាល់ពីគម្រោងអភិវឌ្ឍន៍របស់ក្រុមហ៊ុនស៊ីណូម៉ិចស៊ីមនៅឃុំអណ្តូងទឹក ស្រុកបទុមសាគរ និងអ្នកដែលបានលក់ដីក្នុងតំបន់នេះទៅឱ្យឈ្មូញរកស៊ីដីធ្លី ឱ្យបានច្បាស់លាស់ ដើម្បីយកមកធ្វើជាមូលដ្ឋានក្នុងការដោះស្រាយបញ្ហា។
លោក សុខ សុទ្ធី អភិបាលរងខេត្តកោះកុងប្រាប់ ភ្នំពេញ ប៉ុស្តិ៍ពី ថ្ងៃ ១០ មីនាថា រដ្ឋាភិបាលបានសម្រេចកាត់ឆ្វៀលដីទំហំ ៥៩៨ ហិកតា ចេញពីឧទ្យានជាតិបទុមសាគរមកជូនពលរដ្ឋ ១៣១ គ្រួសារ និងបានបំពេញសលាកបត្រព័ត៌មានរួចរាល់ជាមួយក្រសួងរៀបចំដែនដី នគរូបនីយកម្ម និងសំណង់នៅក្នុងឆ្នាំ ២០១៩ បន្ទាប់ពីបានរងផលប៉ះពាល់ពីគម្រោងអភិវឌ្ឍន៍របស់ក្រុមហ៊ុនស៊ីណូម៉ិចស៊ីមដែលទទួលបានដីសម្បទានសេដ្ឋកិច្ចនៅទីនោះ។
លោកបានថ្លែងថា បន្ទាប់ពីមានការទាមទារពីពលរដ្ឋ ក្រុមហ៊ុន ស៊ីណូម៉ិចស៊ីម បានប្រគល់ដីទំហំ ៥៩៨ ហិកតា ឱ្យអាជ្ញាធរបែងចែកជូនពួកគាត់វិញដោយក្នុង ១ គ្រួសារ បានក្បាលដីទំហំ ២០x៥០ ម៉ែត្រសម្រាប់ដីលំនៅឋាន។
ប៉ុន្តែដោយពលរដ្ឋទាំងនោះ រងផលប៉ះពាល់យូរឆ្នាំ អាជ្ញាធរបានសម្រេចឱ្យក្បាលដីទំហំ ២០x៧០ ម៉ែត្រ នៅជាប់ផ្លូវ និងទី ២ ក្បាលដីទំហំ ២០x១០០ ម៉ែត្រ ដីបន្ទាប់ពីផ្លូវ។
បើតាម សុខសុទ្ធី ដីដែលនៅសល់ត្រូវបានរៀបចំទុកជាដីបម្រុងរបស់រដ្ឋក្នុងការសាងសង់សាលារៀន មន្ទីរពេទ្យ រៀបចំទីលានចាក់សំរាម និងធ្វើជាកន្លែងសាធារណៈផ្សេងទៀត។ ក្នុងការបែងចែកនេះ គឺមានពលរដ្ឋ ៧០ គ្រួសារបានយល់ព្រមទទួលតាមការរៀបចំឱ្យរបស់អាជ្ញាធរដែនដី ប៉ុន្តែមាន ៦១ គ្រួសារផ្សេងបានទាមទារដីចំនួន ២ ឬ ៣ ហិកតាសម្រាប់ធ្វើចម្ការទៀត។
លោកអភិបាលរងខេត្តបានបន្តថា ប៉ុន្តែក្រោយមកមានឈ្មួញចំនួន ៤ នាក់ (អ្នករស់នៅក្រៅពីតំបន់នេះ) បានមកទិញដីក្នុងតំបន់នេះ ដោយអះអាងថា ក្នុងម្នាក់ៗបានទិញដីចំនួន ១៨១ ហិកតា ខ្លះថា ១៥ ហិកតា ខ្លះថា ២០ ហិកតា និងខ្លះទៀតថាទិញ ៦០ ហិកតា ។ បើបូកសរុបទៅវាស្ទើរអស់ដីរបស់ពលរដ្ឋ ១៣១ គ្រួសារ ដែលនឹងទទួលបាននោះទៅហើយ។
លោកបញ្ជាក់ថា៖ «ពលរដ្ឋមិនមានសិទ្ធិក្នុងការលក់ទេ ប៉ុន្តែបើពួកគេ [ឈ្មួញ] មិនបានទិញ តើពួកគេបានដីមកពីណា? ឥឡូវខ្ញុំឱ្យអាជ្ញាធរសិក្សារឿងហ្នឹងឱ្យខ្ញុំសិន ហើយនៅពេលដែលទទួលបានចម្លើយថា យ៉ាងម៉េច យើងនឹងរកវិធីដោះស្រាយជូនពលរដ្ឋទៅតាមហ្នឹងថែមទៀត។ តែខ្ញុំសូមបញ្ជាក់ថា ដីទាំងនេះមិនបានជាប់ពាក់ព័ន្ធជាមួយនឹងក្រុមហ៊ុនទៀតទេ ព្រោះគេបានកាត់ឆ្វៀលរួចហើយជាង ៥០០ ហិកតា»។
លោក មឿង ឃុន មេភូមិជីត្រេះ ឃុំអណ្តូងទឹក ស្រុកបទុមសាគរបានថ្លែងកាលពីថ្ងៃ ១០ មីនាថា ដីនេះត្រូវបានរដ្ឋកាត់ឆ្វៀលជូនពលរដ្ឋទាំង ១៣១ គ្រួសារនេះរួចហើយ ប៉ុន្តែយូរៗទៅពួកគាត់បានកាត់លក់បន្តិចម្តងៗទៅឱ្យឈ្មួញដែលមិនរស់នៅក្នុងតំបន់នេះ។ ទោះជាយ៉ាងណា រដ្ឋគ្រាន់តែចង់ដឹងទិន្នន័យរបស់អ្នកទិញមានចំនួនប៉ុន្មានហិកតាក្នុងម្នាក់ៗក្នុងចំណោមដីជាង ៥០០ ហិកតានោះ ដើម្បីងាយស្រួលក្នុងដោះស្រាយ។
លោកថ្លែងថា៖ «ប្រជាពលរដ្ឋស្ទើរតែ ៩០ ភាគរយនៃចំនួន ១៣១ គ្រួសារនេះបានលក់ទៅឱ្យឈ្មួញ ប៉ុន្តែយើងកំពុងស្វែងរកអ្នកទិញដីក្នុងទំហំធំៗទាំងនេះសិន តើម្នាក់មានដីប៉ុន្មានហិកតាសេសសល់ដីប៉ុន្មានដាក់លើតុទាំងអស់គ្នា ចាំយើងគិតគូរដោះស្រាយគ្នាឱ្យមានភាពរលូន»។
បើតាមលោក មឿង ឃុន កាលពីដើមឡើយពលរដ្ឋបានស្នើសុំដី ៥ ហិកតា ក្នុង ១ គ្រួសារ ប៉ុន្តែមិនបាននោះទេ ព្រោះដីមានទំហំតូច ហើយក្រោយមកក៏ស្នើសុំត្រឹម ២ ហិកតា ក្នុង ១ គ្រួសារទៀត ប៉ុន្តែនៅតែមិនទទួលបាន។ មានពលរដ្ឋមួយចំនួនបានកំណត់ខ្លួនឯង និងទាមទារក្នុង ១ គ្រួសារៗចំនួន ២ ហិកតា ឬ ៥ ហិកតា។
លោក ថោង ច័ន្ទដារ៉ា អ្នកសម្របសម្រួលផ្នែកសិទ្ធិមនុស្សនៃសមាគមអាដហុកប្រចាំខេត្តកោះកុងថ្លែងថាបញ្ហានេះលោកនឹងដឹកនាំក្រុមការងារចុះទៅស្រាវជ្រាវដល់ទីតាំងជាក់ស្តែងនៅចុងសប្តាហ៍នេះ ប៉ុន្តែលោកមិនរំពឹងថា ពលរដ្ឋចូលរួមសហការទេ ព្រោះលោកយល់ថា ពលរដ្ឋខ្លះអាចជាប់ពាក់ព័ន្ធនឹងការលក់ដូរដីនេះ។
យ៉ាងណាក្ដីលោក ថោង ច័ន្ទដារ៉ា បានបញ្ជាក់ថា អាជ្ញាធរគួរតែមានវិធានការ និងដោះស្រាយជូនពលរដ្ឋទាំង ១៣១ គ្រួសារនេះឱ្យចប់សព្វគ្រប់តាំងពីយូរមកហើយ ប៉ុន្តែនៅពេលមានផែនការថ្មីទើបចាប់ផ្តើមធ្វើ ឬស្រាវជ្រាវ ជាហេតុធ្វើឱ្យមានការច្របូកច្របល់ ដោយសារមានពលរដ្ឋខ្លះបានលក់ដីរួចទៅហើយ តែបានទាមទារយកដីមកវិញ៕