.jpg)
រថយន្តធុនធំដឹកទំនិញ កំពុងធ្វើចរាចរណ៍តាមផ្លូវជាតិលេខ ៤៨ ក្នុងស្រុកស្រែអំបិលខេត្តកោះកុង។ រូបថត សហការី
កោះកុងៈ លោកស្រី មិថុនា ភូថង អភិបាលខេត្តកោះកុង គ្រោងនឹងផ្អាកការធ្វើចរាចរណ៍រថយន្តដឹកទំនិញធុនធ្ងន់ទៅមក លើផ្លូវជាតិលេខ ៤៨ ដែលកំពុងរងការខូចខាត ដើម្បីទុកលទ្ធភាពដល់ក្រុមការងារជំនាញជួសជុលកែលម្អឱ្យបានរឹងមាំ។
ក្រោយបញ្ចប់កិច្ចប្រជុំលើកទី ២ ស្តីពីការរៀបចំបុណ្យសមុទ្រកាលពីថ្ងៃទី ៣០ ខែកញ្ញាលោកស្រី មិថុនា ភូថងបានឲ្យដឹងថា លោកស្រីនឹងសរសេរលិខិតជាផ្លូវការមួយ ទៅកាន់ម្ចាស់ក្រុមហ៊ុនរថយន្តដឹកជញ្ជូនទំនិញធំៗទាំងអស់ ក្នុងខេត្តកោះកុង សុំផ្អាកសកម្មភាពចរាចរណ៍លើផ្លូវជាតិលេខ ៤៨ ជាបណ្តោះអាសន្ន។
បើតាមអភិបាលខេត្តកោះកុង ហេតុដែលអាជ្ញាធរចាំបាច់ត្រូវផ្អាកការធ្វើចរាចរណ៍សម្រាប់រថយន្តធុនធ្ងន់ គឺដើម្បីចៀសវាងបង្កគ្រោះថ្នាក់តាមដងផ្លូវដែលកំពុងរងការខូចខាត។ ពិសេសទុកពេលវេលាដល់ក្រុមការងារជំនាញមានលទ្ធភាពគ្រប់គ្រាន់ សម្រាប់ជួសជុលផ្លូវ ឲ្យបានរឹងមាំស្អាតល្អ សម្រួលដល់ការធ្វើដំណើរខណៈពិធីបុណ្យសមុទ្រខិតជិតមកដល់។
លោក សុខ សុទ្ធី អភិបាលរងខេត្ដកោះកុង និងជាអ្នកនាំពាក្យបានប្រាប់ភ្នំពេញប៉ុស្ដិ៍កាលពីម្សិលមិញថា នេះជាគម្រោងមួយរបស់ខេត្ដ ហើយថ្ងៃអង្គារនេះ នឹងលើកឡើងមកពិភាក្សាបន្ថែម ដើម្បីរកដំណោះស្រាយរួម។
លោកបន្ដថា៖«បើសិនជារថយន្ដរបស់ពួកគាត់អាច ជួយកាត់ទ្រុង មិនដឹកលើសទម្ងន់ យើងមិនផ្អាកអីទេ។ ប៉ុន្ដែបើសិនជាផ្លូវឆ្ងាយ ហើយពិបាកធ្វើដំណើរបែបនេះ ទាល់តែផ្អាកមួយរយៈសិន ដើម្បីជួសជុលឲ្យដីវារឹងសិនទើបអាចចរាចរណ៍បាន»។
បើតាមលោក សុទ្ធី នាពេលថ្មីៗនេះ អាកាសធាតុនៅក្នុងខេត្តកោះកុង ហាក់មានអំណោយផលច្រើនដល់ក្រុមការងារអាចជួសជុលផ្លូវនៅតាមតំបន់មួយចំនួន ដែលរងការខូចខាតខ្លាំងលើកំណាត់ផ្លូវជាតិលេខ ៤៨។ ប៉ុន្តែបានរងការខូចខាតខ្លះៗទៅវិញ ដោយសារតែមិនអាចទ្រាំទ្រនឹងទម្ងន់រថយន្តដឹកទំនិញធំៗបាន។
លោក អន ដាវុធ ប្រធានមន្ទីរសាធារណការ និងដឹកជញ្ចូនខេត្តកោះកុង ធ្លាប់ថ្លែងប្រាប់អ្នកសារព័ត៌មានថា លោកបានសហការជាមួយស្នងការនគរបាល និងកងរាជអាវុធហត្ថខេត្ត ចុះត្រួតពិនិត្យលក្ខណៈបច្ចេកទេសយានយន្តតាមដងផ្លូវជាតិលេខ ៤៨ ជាបន្តបន្ទាប់។
លោក អន ដាវុធ ក៏ធ្លាប់បានដាក់សំណើទៅរដ្ឋមន្ត្រីក្រសួងសាធារណការ និងដឹកជញ្ជូនដើម្បីបង្កើតស្ថានីយថ្លឹងរថយន្តធំៗនៅផ្លូវលេខ ៤៨ នេះដែរ។ ប៉ុន្ដែគិតមកដល់ពេលនេះ ពុំទាន់មានការឆ្លើយតបណាមួយនៅឡើយ។
បើតាមការវាយតម្លៃរបស់ក្រសួងសាធាណការនិងដឹកជញ្ជូនគិតមកត្រឹមថ្ងៃទី ២២ ខែសីហាឆ្នាំ ២០១៨ ទំហំនៃការខូចខាតផ្លូវជាតិលេខ ៤៨ ចាប់ពីស្រុកស្រែអំបិល ដល់ក្រុងខេមរភូមិន្ទ ខេត្តកោះកុង មានប្រវែង ៣៥ គីឡូ ម៉ែត្រ ស្មើនឹង ២២,២៦ ភាគរយ រាប់បញ្ចូលទាំងកំណាត់ផ្លូវដែលបានកែលម្អកាលពីឆ្នាំ ២០១៧ ផងដែរ៕
