.jpg)
ពលរដ្ឋរើសអេតចាយនៅលើគំនរសំរាមក្នុងខណ្ឌដង្កោ។ អាជ្ញាធររៀបចំទីលានចាក់សំរាមថ្មី ១ ទៀតនៅស្រុកអង្គស្នួល ខេត្តកណ្ដាល។ ហុង មិនា
ភ្នំពេញៈ ស្ថានីយផ្ទេរសំរាមបណ្តោះអាសន្នថ្មី ១ កន្លែងទៀត ដែលស្ថិតនៅភាគខាងជើងរាជធានីភ្នំពេញ កំពុងបន្តការសាងសង់ ខណៈអាជ្ញាធរមានគម្រោងសាងសង់ទីលានចាក់សំរាមថ្មីចុងក្រោយ ១ ទៀតលើផ្ទៃដីជាង ៥០ ហិកតា នៅក្នុងស្រុកអង្គស្នួល ខេត្តកណ្តាលនាពេលខាងមុខ។
មន្ត្រីសាលារាជធានីភ្នំពេញបានប្រាប់ ភ្នំពេញ ប៉ុស្តិ៍ ក្នុងលក្ខខណ្ឌមិនបញ្ចេញ ឈ្មោះ កាលពីថ្ងៃទី ១៧ ខែកុម្ភៈថា គម្រោងដែលចេញជាផ្លូវការសម្រាប់ដោះស្រាយបញ្ហាការកកស្ទះកន្លែងផ្ទុកសំរាមគឺបានសម្រេចហើយ ខណៈដែលទីលានចាក់សំរាមចុងក្រោយដែលមានផ្ទៃដីធំជាង ៥០ ហិកតា គ្រោងនឹងសាងសង់ក្នុងរយៈពេល ២ ឆ្នាំខាងមុខ។
លោកបន្តថា៖ «(ក្នុងរាជធានីភ្នំពេញ) យើងមានរៀបចំស្ថានីយផ្ទេរសំរាមចំនួន ២ និងស្ថានីយផ្ទុកសំរាមចុងក្រោយចំនួន ១។ ចំពោះស្ថានីយផ្ទេរសំរាមបណ្តោះអាសន្នចំនួន ២ គឺមានទីតាំងនៅខណ្ឌដង្កោ ដែលមានស្រាប់ និងស្ថានីយផ្ទេរសំរាមដែលកំពុងបង្កើតថ្មី នៅភាគខាងជើងរាជធានីភ្នំពេញ ១ កន្លែងទៀតដែលមានទំហំ ១០ ហិកតា»។
បើតាមមន្ត្រីរូបនេះការបង្កើតទីលានទាំងនេះគឺដើម្បីបំពេញតម្រូវការចាំបាច់ជាក់ស្តែង នៅពេលដែលទីលានចាក់សំរាមតែ ១ គត់ស្ថិតនៅក្នុងខណ្ឌដង្កោ អាចនឹងលែងផ្ទុកសំរាមបានក្នុងពេលឆាប់ៗ។
លោកបន្ថែមថា៖ «ទីលានចាក់សំរាមចុងក្រោយដែលគ្រោងនឹងធ្វើក្នុងរយៈពេល ២ ឆ្នាំទៀត គឺនៅតាមកំណាត់ផ្លូវលេខ ៥១។ ប៉ុន្តែគម្រោងនេះ មិនទាន់ត្រូវបានចាប់ផ្តើមនោះទេ ដោយសារតែគម្រោងនេះនៅថ្នាក់ជាតិ ដោយរង់ចាំការសម្រេចពីក្រសួងហិរញ្ញវត្ថុ និងក្រសួងបរិស្ថាន។ យើងត្រូវការពេលវេលា ២ ឆ្នាំទៀត ដើម្បីអាចទទួលបានទីលានចាក់សំរាម ប្រកបដោយស្តង់ដា នៅផ្លូវ ៥១ នេះ»។
បុរសម្នាក់ និងក្មេងប្រុសម្នាក់កំពុងដើររើសសំរាមនៅគំនរសំរាមជើងឯកក្នុងខណ្ឌដង្កោពីខែមិថុនា ២០២០។ ហុង មិនា
លោក កែវ ចាន់ណារិទ្ធ ប្រធានគណៈគ្រប់គ្រងទីលានចាក់សំរាមក្នុងខណ្ឌដង្កោបានប្រាប់ ភ្នំពេញ ប៉ុស្តិ៍ កាលពីថ្ងៃទី ១៧ ខែកុម្ភៈថា ដោយសារតែពាក់ព័ន្ធនឹងកំណែទម្រង់របស់រដ្ឋាភិបាលក្នុងការគ្រប់គ្រងសំរាម សំណល់រឹងក្នុងរាជធានីភ្នំពេញ គឺមានការកែប្រែតាំងពីដើមខ្សែ រហូតដល់ចុងខ្សែ។
លោកបន្តថា ការធ្វើកំណែទម្រង់នេះគឺធ្វើការកែទម្រង់រាប់ចាប់តាំងពីការបង្កើត ការប្រមូលសំរាម និងការទុកដាក់សំរាមនៅទីលានចុងក្រោយ។ លោកបន្តថា ចំពោះយន្តការចុងក្រោយ រដ្ឋាភិបាលក៏បានរៀបចំការបង្កើតនូវកន្លែងទុកដាក់សំរាម ក្នុងនោះមានការរៀបចំកន្លែងផ្ទេរសំរាមចំនួន ២ កន្លែងគឺនៅខណ្ឌដង្កោ និងទីតាំងថ្មីស្ថិតនៅតំបន់បឹងតាមោក និងទីលានចាក់សំរាមចុងក្រោយមានផ្ទៃដីជាង ៥០ ហិកតា ដែលស្ថិតក្នុងស្រុកអង្គស្នួលខេត្តកណ្តាល។
លោកបញ្ជាក់ថា៖ «យើងមានទីតាំងផ្ទេរចំនួន ២ កន្លែង និងទីលានចាក់សំរាមចុងក្រោយ ១ កន្លែង ដែលរដ្ឋាភិបាលគ្រោងនឹងបង្កើតនូវអ្វីដែលខ្ញុំ និយាយនេះ។ គ្រាន់តែថា នៅចំពោះមុខទីលានចាក់សំរាមនៅខណ្ឌដង្កោចាស់របស់យើងនេះ យើងនៅបន្តចាក់ និងចាត់ទុកជាទីលានចុងក្រោយដដែលសិន រយៈពេល ២ ឆ្នាំតទៅមុខទៀតនេះ»។
លោកបន្ថែម៖ «ក្នុងរយៈពេល ២ ឆ្នាំខាងមុខនេះ គឺរដ្ឋាភិបាលនឹងរៀបចំកសាងហេដ្ឋារចនាសម្ព័ន្ធ ដើម្បីកែប្រែកន្លែងចាក់សំរាមនៅខណ្ឌដង្កោនេះឱ្យទៅជាកន្លែងផ្ទេរ ១ កន្លែង និងរៀបចំមួយកន្លែងថ្មីទៀតនៅខាងជើង ឱ្យទៅជាកន្លែងផ្ទេរសំរាមដែរ»។
បើតាមលោក កែវ ចាន់ណារិទ្ធ ចំពោះទីលានចាក់សំរាមចុងក្រោយដែលគ្រោងនឹងបង្កើតឡើងនេះ គឺនឹងមានមុខងារទទួលសំរាម ដែលបានដឹកមកពីគ្រប់ទិសទីក្នុងរាជធានីភ្នំពេញ និងក្នុងខេត្តកណ្តាលហើយវាក៏មិនមែនត្រឹមតែជាទីលានចាក់សំរាមតែ ១ មុខនោះទេ ក្នុងនោះក៏មានការរៀបចំជាលក្ខណៈបច្ចេកទេស ជុំវិញការកែច្នៃសំរាមផងដែរ។
តាមរបាយការណ៍របស់ក្រសួងបរិស្ថានសំរាមដែលបានបង្កើតឡើងនៅកម្ពុជាក្នុង ១ ថ្ងៃៗមានជាង ១ ម៉ឺនតោន និងជិត ៤ លានតោនក្នុង ១ ឆ្នាំ។ សំរាមទាំងនោះមាន ៦៥ ភាគរយជាសំណល់សរីរាង្គ ២០ ភាគរយជាសំណល់ថង់ប្លាស្ទិក និងនៅសេសសល់គឺជាសំណល់រឹង និងសំណល់ផ្សេងទៀត។ សម្រាប់តែរាជធានីភ្នំពេញសំរាមត្រូវបានបង្កើតឡើងប្រមាណ ៣ ពាន់តោនក្នុង ១ ថ្ងៃៗ។
លោក សន ជ័យ ប្រធានអង្គការសម្ព័ន្ធគណនេយ្យភាពសង្គមកម្ពុជា សាទរចំពោះគម្រោងបង្កើតទីលានចាក់សំរាមបន្ថែម។ ប៉ុន្តែលោក ថា ការមានតែកន្លែងទុកដាក់សំរាមគឺមិនទាន់គ្រប់គ្រាន់នោះទេ រដ្ឋាភិបាលត្រូវមានការចាត់វិធានការឱ្យបានតឹងរ៉ឹងបន្ថែមទៀត ចំពោះរបៀបរៀបរយលើអ្នកចោលសំរាមផ្តេសផ្តាស និងការគ្រប់គ្រងសំរាមនៅកន្លែងទីសាធារណៈ ជាពិសេសនៅតាមប្រឡាយ និងលូ។
លោកថា៖ «រឿងសំរាមនេះ គឺជាយន្តការសាធារណៈប៉ុន្តែក្រៅពីនោះអាជ្ញាធរត្រូវតែជំរុញឱ្យក្រុមហ៊ុនប្រមូលសំរាម កុំឱ្យក្លាយជាអ្នកប្រមូលសំរាមផង ក្លាយជាអ្នកបង្ហូរទឹកសម្អុយតាមផ្លូវផង ជាពិសេសក្រុមហ៊ុនស៊ីនទ្រីនេះ យើងឧស្សាហ៍ឃើញណាស់។ យើងត្រូវមើលគ្នាជាប្រព័ន្ធទាំងយន្តការប្រមូលសំរាម ដឹកជញ្ចូនសំរាម និងកន្លែងចាក់សំរាម»៕
