.jpg)
លោក សេរី កុសល (ឆ្វេង) ពេលនាំពលរដ្ឋទៅដាំកូនឈើនៅក្នុងតំបន់អភិរក្សពីថ្ងៃអាទិត្យ។ សហការី
បាត់ដំបងៈ អាជ្ញាធរចម្រុះស្រុកសំឡូត បានចុះទៅរារាំងនិងបញ្ឈប់សកម្មភាពពលរដ្ឋប្រមាណ ១៥០ នាក់ ដែលដឹកនាំដោយមន្ត្រីជាន់ខ្ពស់រដ្ឋាភិបាលម្នាក់បានចូលទៅដាំដើមឈើក្នុងតំបន់អភិរក្សប្រើប្រាស់ច្រើនយ៉ាងសំឡូតដោយមិនបានសុំច្បាប់អនុញ្ញាតខណៈមានការសង្ស័យថា ការចូលទៅដាំកូនឈើនេះគ្រាន់តែជាលេសដើម្បីរុករានវាតយកដីព្រៃក្នុងតំបន់អភិរក្សធ្វើជាកម្មសិទ្ធិប៉ុណ្ណោះ។
កាលពីថ្ងៃអាទិត្យ មានប្រជាពលរដ្ឋប្រមាណ ១៥០ នាក់ បានធ្វើដំណើរតាមឡានក្រុងដែលដឹកនាំដោយលោក សេរី កុសល ដែលគេស្គាល់ថា ជាមន្ត្រីជាន់ខ្ពស់រាជរដ្ឋាភិបាល បានចុះទៅធ្វើពិធីដាំកូនឈើ នៅក្បែរផ្លូវបន្ទាត់ព្រំដែនដែលរដ្ឋាភិបាលកំពុងសាងសង់ផ្លូវក្រវាត់ព្រំដែន ហើយក៏ជាតំបន់អភិរក្ស «ប្រើប្រាស់ច្រើនយ៉ាងសំឡូត»។
ក្រោយសកម្មភាពដាំដើមឈើកំពុងដំណើរការបាន ១ ព្រឹក និងដាំដើមឈើបានប្រមាណជាង ២០០ ដើម ក្នុងចំណោមកូនឈើដែលគ្រោងដាំសរុប ៦៥០ ដើម អាជ្ញាធរចម្រុះ មានមកពីមន្ទីរបរិស្ថានទាហាន ប៉ូលិស អាជ្ញាធរមូលដ្ឋាន រួមទាំងមន្ត្រីសង្គមស៊ីវិលការពារបរិស្ថាន បានរួមគ្នាចុះទៅរារាំង និងបញ្ឈប់សកម្មភាពទាំងនេះ។
លោក ហង្ស រៀម មេប៉ុស្តិ៍ឃុំសំឡូត បានឲ្យដឹងពីម្សិលមិញថា ក្រោយទទួលបានការរាយការណ៍ពីប្រជាពលរដ្ឋក្នុងតំបន់ អាជ្ញាធរបានចុះទៅដល់ទីតាំងភ្លាមៗ ហើយបានរារាំងដោយបានណែនាំឲ្យពលរដ្ឋទាំងនោះ បញ្ឈប់ការដាំកូនឈើ។
លោកបន្តថា ការបញ្ឈប់សកម្មភាពនេះ ព្រោះតែពលរដ្ឋទាំងនោះ មិនបានជូនដំណឹងដល់អាជ្ញាធរពាក់ព័ន្ធណាមួយក្នុងតំបន់នោះឡើយ ស្របពេលតំបន់នេះ ជាតំបន់ការពារ និងមានមីនទៀតផង។
លោកថា៖ «មុនដំបូងគាត់ថា ដាំក្នុងដីគាត់ ប៉ុន្តែនៅពេលយើងទៅសួរនាំ គាត់ថា ដាំទៅ តែយូរទៅវានឹងក្លាយជារបស់រដ្ឋហើយ។ គាត់ដាំផ្តេសផ្តាស ហើយដីនេះ គឺយើងហាមប្រាមហើយព្រោះរបស់រដ្ឋ ណាមួយតំបន់នេះ មានមីនមានអី យើងខ្លាចប៉ះពាល់សុវត្ថិភាពពួកគាត់»។
លោក កត បូរ៉ាន ប្រធានមន្ទីរបរិស្ថានខេត្តបាត់ដំបង ប្រាប់ភ្នំពេញប៉ុស្តិ៍ដែរថា ជាទូទៅការធ្វើសកម្មភាពអ្វីលើដីរបស់រដ្ឋ គឺត្រូវតែជូនដំណឹងដល់អាជ្ញាធរ ដើម្បីការពារសុវត្ថិភាពជូន តែនេះពួកគាត់ មិនបានធ្វើដូច្នេះទេ។ លោកមើលឃើញថា នេះអាចជាចេតនាមួយរបស់ពួកគេក្នុងការរុករានដើម្បីកាន់កាប់លើដីទាំងនេះនៅពេលដែលពួកគេ បានធ្វើសកម្មភាពដាំដុះលើដីនេះហើយ។
លោកបន្តថា៖ «គោលបំណងរបស់គាត់ (សេរី កុសល) អាចទៅជាអ៊ីចឹង ព្រោះកន្លែងហ្នឹងជាកន្លែង CMAC កំពុងធ្វើផ្លូវ ហើយកន្លែងហ្នឹង គឺវិស្វកម្មធំៗ កំពុងធ្វើផ្លូវទៅដែលការដាំហ្នឹង ចំផ្លូវក្រវាត់ព្រំដែនរបស់រដ្ឋាភិបាលកំពុងតែធ្វើ។ ម្យ៉ាងមានផ្ទុះរឿងលក់ (ដី) អី បានថ្លៃ បានអីអ៊ីចឹង»។
ពលរដ្ឋម្នាក់រស់នៅក្នុងស្រុកសំឡូត ដែលសុំមិនបញ្ចេញឈ្មោះ បានប្រាប់ភ្នំពេញប៉ុស្តិ៍ពីម្សិលមិញថា កន្លងទៅ លោក សេរី កុសល ធ្លាប់បានកាប់ទន្ទ្រានកាន់កាប់ដីក្នុងតំបន់ប្រើប្រាស់ច្រើនយ៉ាងសំឡូតនេះបានប្រមាណ ៣០ ហិកតា ដើម្បីធ្វើជាកម្មសិទ្ធិរួចទៅហើយ។
ជាមួយនឹងការចុះមកដាំក្រោមការដឹកនាំរបស់លោក សេរី កុសល នេះ ពលរដ្ឋបានដាក់ការសង្ស័យ និងបារម្ភថា អាចជាលេសមួយប៉ុណ្ណោះ។ «ខ្ញុំដឹងរឿងរ៉ាវហ្នឹង ព្រោះលោក សេរី កុសល ហ្នឹង គាត់រំលោភដីក្នុងតំបន់អភិរក្សអស់រាប់សិបហិកតាហើយ នៅជិតច្រក ៤០០។ តាមខ្ញុំដឹង នៅពេលអ្នកមានអំណាចដូចគាត់អ្នកនៅខាងក្រោមហ្នឹង មន្ត្រីបរិស្ថានហ្នឹង និងអភិបាលស្រុក អ្នកភូមិអី គាត់មិនសូវហ៊ានទេរឿងរ៉ាវថ្មីហ្នឹង ដែលគាត់យកកូនឈើទៅដាំហ្នឹង មិនមានពលរដ្ឋនៅក្នុងមូលដ្ឋានអីទេគឺយកពលរដ្ឋដឹកឡានក្រុងមកពីភ្នំពេញដែលដីគាត់ចង់បានដែរអ៊ីចឹង ដើម្បីគាត់ពង្រីកការកាន់កាប់របស់គាត់»។
ភ្នំពេញប៉ុស្តិ៍មិនអាចទាក់ទងសុំអធិប្បាយពីលោក សេរី កុសល បានទេកាលពីម្សិលមិញដោយសារទូរស័ព្ទលោក មិនអាចទាក់ទងបាន។
បើតាមប្រធានមន្ទីរបរិស្ថានខេត្តបាត់ដំបង តំបន់ប្រើប្រាស់ច្រើនយ៉ាងសំឡូត ស្ថិតក្នុងឃុំសំឡូត ស្រុកសំឡូត ជាប់ព្រំដែនថៃ គឺមានទំហំប្រមាណ ៣ ម៉ឺនហិកតា៕
