បន្ទាយមានជ័យ៖ អាជ្ញាធរស្រុកស្វាយចេក ខេត្តបន្ទាយមានជ័យ បានឃាត់ខ្លួនពលករចំនួន ១៧ នាក់ ខណៈកំពុងជិះរថយន្ត ២ គ្រឿង បម្រុងឆ្លងដែនទៅប្រទេសថៃ កាលពីថ្ងៃទី ៦ ខែឧសភា នៅចំណុចភូមិតេជោភ្នំឆត្រ ឃុំស្វាយចេក ស្រុកស្វាយចេក។
លោក លឿង សុភក្ដិ អភិបាលស្រុកស្វាយចេក បានប្រាប់ ភ្នំពេញ ប៉ុស្តិ៍ នៅថ្ងៃទី ៧ ខែឧសភានេះថា ពលករទាំង ១៧ នាក់នោះ ត្រូវបានបញ្ជូនទៅមណ្ឌលចត្តាឡីស័កវិទ្យាល័យស្វាយចេក រយៈពេល ១៤ ថ្ងៃសិន ទើបអនុញ្ញាតឲ្យវិលត្រឡប់ទៅលំនៅឋានពួកគាត់វិញ។ ប៉ុន្តែសម្រាប់ម្ចាស់រថយន្ត ២ គ្រឿង ក្នុងចំណោមនោះនឹងត្រូវបញ្ជូនទៅតុលាការ ដើម្បីបន្តតាមនីតិវិធីច្បាប់។
លោកបានបន្តថា ពេលនេះអាជ្ញាធរមិនអាចឲ្យពលករទាំងនោះត្រឡប់ទៅលំនៅឋានវិញទេ ព្រោះត្រូវគោរពតាមវិធានការក្រសួងសុខាភិបាល។ ក្រោយពីបញ្ចប់ការសាកសួរព័ត៌មាន និងបញ្ចប់ការធ្វើចត្តាឡីស័ក រដ្ឋបាលស្រុកនឹងស្នើសុំគោលការណ៍ពីថ្នាក់ខេត្ត ដើម្បីសម្រេចបញ្ជូនពួកគាត់ទៅលំនៅឋានរៀងៗខ្លួនវិញតាមរយៈរថយន្តរបស់កងទ័ពលើកលែងតែអ្នកបើកបរ ២ នាក់ ដែលត្រូវបន្តតាមនីតិវិធីច្បាប់។
ទោះជាយ៉ាងណា លោក លឿង សុភក្ដិ បានបញ្ជាក់ថា លោកមិនទាន់មានព័ត៌មានលម្អិតជុំវិញពលករទាំងនោះមកពីខេត្តណា ឬតំបន់ណានៅឡើយទេ។ មួយវិញទៀតក៏មិនទាន់ដឹងថា ពួកគាត់ចូលទៅប្រទេសថៃ ដើម្បីធ្វើការ ឬក៏មានការងារធ្វើនៅទីនោះរួចហើយនោះទេ ព្រោះពេលនេះសមត្ថកិច្ចកំពុងតែសួរនាំពួកគេ ដើម្បីធ្វើរបាយការណ៍។
លោក សុភក្ដិ បានថ្លែងថា៖ «ខ្ញុំអត់ដឹងលម្អិតទេ អាគោលដៅចុងក្រោយនេះ យើងអត់បានដឹងថា គាត់ទៅស្រុកថៃហ្នឹង គាត់ទៅធ្វើអី គាត់មានការងារហើយ ឬយ៉ាងណាទេ អ្វីដែលយើងធ្វើការ គឺយើងធ្វើការត្រឹមដែនរបស់យើង»។
យ៉ាងណាក្ដី លោក ជា ស្លូញ អធិការនគរបាលស្រុកស្វាយចេកបានឲ្យដឹងថា មនុស្សទាំង ១៧ នាក់នោះមកពីខេត្តកំពង់ចាម ៦ នាក់, បាត់ដំបង ១០ នាក់ និងបន្ទាយមានជ័យ ១ នាក់។
លោកអធិការបានឲ្យដឹងថា តាមចម្លើយសារភាពរបស់អ្នកបើករថយន្តទាំង ២ នាក់ថា មនុស្សដែលគេដឹកដើម្បីឆ្លងដែននោះ គឺដាក់តាមព្រំដែនដែលមេខ្យល់បានកំណត់ដោយគេយកតម្លៃតាមជិតតាមឆ្ងាយមាន ២៥០ បាត, ៣០០ បាត និង ៤០០ បាត។ បច្ចុប្បន្នអ្នកបើករថយន្តទាំង ២ នាក់នោះ កំពុងត្រូវបានកម្លាំងនគរបាលជំនាញអធិការដ្ឋាននគរបាលស្រុកស្វាយចេក រៀបចំសំណុំរឿងបញ្ជូនទៅស្នងការដ្ឋាននគរបាលខេត្ត ដើម្បីចាត់ការបន្តតាមនីតិវិធីច្បាប់៕