ព្រះសីហនុៈ ពលរដ្ឋជិត ១០០ គ្រួសារ ស្ថិតក្នុងឃុំអណ្តូងថ្ម និងឃុំសំរុង ស្រុកព្រៃនប់ ខេត្តព្រះសីហនុនាំគ្នាទៅដាក់ឯកសារកាន់កាប់ និងអាស្រ័យផលជាក់ស្តែងយូរឆ្នាំលើដីគម្របព្រៃឈើ នៅឯសាលាឃុំ តាមការប្រកាសរបស់រដ្ឋបាលខេត្ត ប៉ុន្តែអាជ្ញាធរឃុំមិនទទួលដោយថា ដីនោះកំពុងមានទំនាស់។ មន្ត្រីសិទ្ធិមនុស្សស្នើឱ្យអាជ្ញាធរទទួលសំណើពលរដ្ឋយកទៅពិនិត្យសិន។
លោក យូ វាសនា តំណាងពលរដ្ឋសហគមន៍មានទំនាស់ដីធ្លីនៅខេត្តព្រះសីហនុ ប្រាប់ភ្នំពេញប៉ុស្តិ៍កាលពីថ្ងៃទី ៥ តុលា ថា បញ្ហានេះថ្នាក់ឃុំ ប្រាប់ឱ្យទៅសួរថ្នាក់ខេត្ត នៅពេលសួរទៅកាន់ថ្នាក់ខេត្ត ខាងខេត្តថា ឱ្យសួរទៅកាន់ខាងមន្ទីរកសិកម្ម។ ហេតុនេះ ចំពោះបញ្ហាដែលពលរដ្ឋបានជួបគឺមិនដឹងថា ត្រូវជួបខាងណាដើម្បីមានដំណោះស្រាយនោះទេ។
លោក វាសនា ថ្លែងថា៖ «និយាយរួមទៅយើងមិនយល់អំពីដំណាក់កាលរបស់ខេត្ត។ គាត់ចេញលិខិតជូនដំណឹងហើយ បែរជាមកប្រជុំជាសម្ងាត់ឱ្យបិទពីការប្រថាប់ត្រាជូនប្រជាពលរដ្ឋទៅវិញ»។
បើតាមលោក វាសនា ចំណុចដែលធ្វើឱ្យប្រជាពលរដ្ឋពិបាកក្នុងការជឿទុកចិត្តចំពោះថ្នាក់ដឹកនាំក្នុងខេត្ត គឺប្រជាពលរដ្ឋបានទទួលបណ្ណ និងរស់នៅអាស្រ័យផលច្រើនឆ្នាំហើយបែរជាមិនទទួលយកជាផ្លូវការ។ ប៉ុន្តែបណ្ណរបស់អ្នកមានអំណាចធំៗមិនបានតាំងនៅអាស្រ័យផលផង បែរជាផ្លូវការទៅវិញ ហេតុនេះធ្វើឱ្យជម្លោះដីធ្លីមានបញ្ហារុំារ៉ៃរហូតមកដល់បច្ចុប្បន្ន។
លោក សំ សុផាត តំណាងពលរដ្ឋក្នុងសហគមន៍តំបន់អូរត្រជាក់ចិត្តស្ថិតក្នុងឃុំសំរុង ស្រុកព្រៃនប់ ឱ្យដឹងថា អាជ្ញាធរឃុំមិនព្រមទទួលយកពាក្យដែលប្រជាពលរដ្ឋយកទៅដាក់នោះ ដោយសំអាងថា ប្រជាពលរដ្ឋមិនបានចុះនិយាមការ ចុះឯកសារដីបានត្រឹមត្រូវ។ បើតាមលោក សុផាត មកដល់ថ្ងៃទី ៥ ខែតុលានេះ ប្រជាពលរដ្ឋកំពុងសរសេរនិយាមការដើម្បីយកពាក្យទៅដាក់ម្តងទៀត។
ប៉ុន្តែលោក ហ៊ី អាន មេឃុំសំរុង ប្រាប់ភ្នំពេញប៉ុស្តិ៍ពីថ្ងៃទី ៥ តុលា ថា អាជ្ញាធរឃុំមិនអាចទទួលស្គាល់ពាក្យរបស់ពលរដ្ឋ ដែលរស់នៅក្បែរភ្នំត្រងោល ភូមិអូរត្រជាក់ចិត្តទេ ព្រោះដីនោះជាដីដែលអាជ្ញាធរខេត្តហាមឃាត់។
លោកថា៖ «ដីនោះមិនមែនខ្ញុំជាអ្នកហាមឃាត់ទេប៉ុន្តែមានសេចក្តីជូនដំណឹង ១ ដែលថ្នាក់ខេត្តយកមកឱ្យឃុំដោយបញ្ជាក់ថា មិនអាចឱ្យទទួលពាក្យចំពោះដីដែលត្រូវបានហាមឃាត់នោះទេ»។
ចំណែកអ្នកស្រី ហែម សម្បត្តិ តំណាងពលរដ្ឋក្នុងឃុំអណ្តូងថ្ម ថ្លែងថា ដីដែលជាប្រជាពលរដ្ឋកាន់កាប់រយៈពេលជាង ២០ ឆ្នាំកន្លមកនេះ អាជ្ញាធរឃុំមិនព្រមទទួលពាក្យដើម្បីដោះស្រាយជូននោះទេ។ អាជ្ញាធរសំអាងថា ដីនោះស្ថិតក្នុងប្លង់របស់គេ និងពាក់ព័ន្ធក្នុងសំណុំរឿងតុលាការ។
អ្នកស្រី សម្បត្តិ ថ្លែងថា៖ «ដីនោះ ខ្ញុំកាន់កាប់មុនគេធ្វើប្លង់ទៅទៀត ព្រោះខ្ញុំបានកាន់កាប់តាំងពីឆ្នាំ ១៩៩២ មកម្ល៉េះ។ រហូតមកដល់សព្វថ្ងៃ ខ្ញុំនៅតែថែរក្សាមើលខុសត្រូវ កាប់ឆ្ការ ដាំដំណាំ។ ប៉ុន្តែបែរជាត្រូវ លើង កាប់ត្រាយដុត បំផ្លាញអស់សម្ភាររបស់ប្រជាជនដែលខំថែរក្សា ហើយគ្មានឃើញដំណោះស្រាយអ្វីទាំងអស់»។
ឆ្លើយតបនឹងបញ្ហានេះលោក វ៉ាន់ នោ មេឃុំអណ្តូងថ្ម ប្រាប់ភ្នំពេញ-ប៉ុស្តិ៍ពីថ្ងៃទី ៥ តុលា ដែរ ថា មិនមែនអាជ្ញាធរឃុំមិនយល់ព្រមទទួលពាក្យរបស់ពលរដ្ឋទាំងនោះទេ ប៉ុន្តែដីនោះជាដីមានទំនាស់ ហើយត្រូវបានគេប្តឹងឡើងតុលាការ។
លោកថា៖ «ប្រជាពលរដ្ឋចាប់ដីចំលើដីប្លង់របស់គេ ហើយគេប្តឹងឡើងតុលាការ ចារឱ្យម៉េចកើត។ ដីហ្នឹងបើតុលាការមិនទាន់ដោះចប់ផង ខ្ញុំម៉េចហ៊ានសម្រេច»។
ប៉ុន្តែអ្នកនាំពាក្យរដ្ឋបាលខេត្តព្រះសីហនុលោក ឃាង ភារម្យ បញ្ជាក់ពីម្សិលមិញថា ពាក់ព័ន្ធនឹងការមិនទទួលពាក្យគឺដោយសារដីមួយចំនួនស្ថិតក្នុងតំបន់ការពារធម្មជាតិដែលគ្រប់គ្រងដោយក្រសួងបរិស្ថាន។ ចំណែកដីខ្លះទៀតគឺជាដីដែលគេមានបណ្ណ និងដីដែលមានទំនាស់។
លោក ភារម្យ ថ្លែងថា៖ «ប្រជាពលរដ្ឋគួរតែសួរទៅកាន់អាជ្ញាធរឃុំឱ្យបានច្បាស់ថា តើដី [របស់] ខ្លួនស្ថិតក្នុងទីណាឱ្យប្រាកដ ដើម្បីកុំឱ្យមានការយល់ច្រឡំហើយនាំគ្នាធ្វើការតវ៉ា»។
រដ្ឋបាលខេត្តព្រះសីហនុនាថ្ងៃទី ១០ ខែកញ្ញា បានចេញសេចក្តីជូនដំណឹងជម្រាបជូនប្រជាពលរដ្ឋដែលបានកាន់កាប់ និងអាស្រ័យផលជាក់ស្តែងយូរឆ្នាំនៅទីតាំងដីស្ថិតក្នុងដែនសមត្ថកិច្ចគ្រប់គ្រងរបស់ក្រសួងកសិកម្ម រុក្ខាប្រមាញ់ និងនេសាទ ដូចជាដីសម្បទានសេដ្ឋកិច្ច ដីសហគមន៍ ដីព្រៃសម្បទាន ដីព្រៃមានដីកាដកហូត ដីចម្ការឈើរដ្ឋ ស្ថិតក្នុងភូមិសាស្ត្រខេត្តព្រះសីហនុ។ រដ្ឋបាលខេត្តប្រាប់ពលរដ្ឋឱ្យមកដាក់ពាក្យស្នើសុំនៅតាមសាលាឃុំ/សង្កាត់ ឱ្យបានមុនថ្ងៃទី ១៦ ខែតុលា ជាកំហិត។
អ្នកស្រី ជៀប សុធារី អ្នកសម្របសម្រួលសមាគមអាដហុកប្រចាំខេត្តព្រះសីហនុនិយាយថា៖ «បើសិន អាជ្ញាធរមូលដ្ឋានបានដឹងថា ប្រជាពលរដ្ឋធ្លាប់កាន់កាប់ប្រើប្រាស់ដីនោះលោកគួរតែចុះហត្ថលេខា ហើយចំណារបញ្ជាក់បន្ថែម ថាប្រជាពលរដ្ឋពិតជាបានកាន់កាប់ដីមែន ប៉ុន្តែការផ្តល់ឱ្យជាកម្មសិទ្ធិ ឬមិនឱ្យគឺជាការសម្រេចចិត្តរបស់ជំនាញក្រោយពីពិនិត្យឯកសារទាំងអស់នោះ»។
បើតាមអ្នកស្រី សុធារី ដីពលរដ្ឋនៅឃុំអណ្តូងថ្ម និងឃុំសំរុងពីមុនមកគឺពលរដ្ឋជាអ្នកកាន់កាប់។ ប៉ុន្តែក្រោយមានទំនាស់ជាមួយក្រុមហ៊ុន ពួកគាត់ក៏ត្រូវបានឃ្លាតចេញពីទីតាំងដីទាំងនោះ។ ដូច្នេះអាជ្ញាធរមូលដ្ឋានគួរបញ្ជាក់ថា ពីឆ្នាំណាដល់ឆ្នាំណា ពលរដ្ឋបានកាន់កាប់ ហើយចាប់ពីឆ្នាំណា ដល់ ឆ្នាំណាទៀតដែលពលរដ្ឋមិនបានកាន់កាប់ដីនោះ។ បើមានឯកសារ មន្ត្រីជំនាញពាក់ព័ន្ធអាចយកទៅពិចារណាដើម្បីដោះស្រាយ៕