ព្រះសីហនុៈ រដ្ឋបាលខេត្តព្រះសីហនុកំពុងចាក់ខ្សាច់ថ្មីបំពេញនៅតាមកន្លែងជ្រលងទឹកហូរដែលមានខ្សាច់ទាប និងខ្សាច់ខ្មៅនៅចំណុចឆ្នេរអូរឈើទាលក្នុងសង្កាត់លេខ ៤ ក្រុងព្រះសីហនុ ដើម្បីកែលម្អសោភណភាពឆ្នេរខ្សាច់ ក៏ប៉ុន្តែមន្ត្រីខេត្តនៅមិនអាចប៉ាន់ប្រមាណថានឹងត្រូវប្រើខ្សាច់ប៉ុន្មានរថយន្តនោះទេ។
លោក ឃាង ភារម្យ អ្នកនាំពាក្យរដ្ឋបាលខេត្តព្រះសីហនុបានឱ្យដឹងថា ការចាក់ខ្សាច់នៅលើឆ្នេរអូរឈើទាលនេះ គឺដើម្បីរៀបចំសោភណភាពឆ្នេរឱ្យមានភាពស្រស់ស្អាតដោយបំបាត់ចោលនូវជង្ហុកណាដែលនាំឱ្យមានទឹកដក់។ ជាមួយគ្នានោះក៏មានការឈូសឆាយលុបបំបាត់កន្លែងមានខ្សាច់ពណ៌ខ្មៅមួយចំនួនដែលមើលទៅមិនគួរឱ្យទាក់ទាញផងដែរ។
លោកបានថ្លែងថា៖ «ការដែលចាក់ខ្សាច់ហ្នឹងគឺយើងដឹកពីកន្លែងផ្សេងៗដែលនៅជិតៗហ្នឹង យើងយកមកចាក់បំពេញកន្លែងខ្លះដែលវាមានសំណឹកដោយទឹករលក វាមានជង្ហុកមានអ៊ីចឹងទៅ យើងចាក់បំពេញដើម្បីកែលម្អសោភណភាពទីតាំងបណ្តោយឆ្នេរអូរឈើទាលហ្នឹង»។
យ៉ាងណាលោក ភារម្យ ប្រាប់ថា ចំពោះការចាក់ខ្សាច់បំពេញដើម្បីរៀបចំសោភណភាពឆ្នេរអូរឈើទាលនេះនៅមិនទាន់អាចបញ្ជាក់បានថាត្រូវចាក់ចំនួនប៉ុន្មានរថយន្តនោះទេ ព្រោះបច្ចុប្បន្ន ខេត្តកំពុងមានការរវល់ខ្លាំងជាមួយការពារស្ថានភាពជំងឺកូវីដ ១៩។
លោកបានបញ្ជាក់ថា៖ «មិនទាន់មានរបាយការណ៍នៅឡើយទេ ដោយសារបច្ចុប្បន្ននេះខេត្តរបស់យើងកំពុងមមាញឹកក្នុងការគ្រប់គ្រងស្ថានការណ៍កូវីដ ១៩»។
លោក តាំង សុចិត្រគ្រឹស្នា ប្រធានមន្ទីរទេសចរណ៍ខេត្តព្រះសីហនុប្រាប់ ភ្នំពេញ ប៉ុស្តិ៍ពីថ្ងៃទី ២៨ កុម្ភៈថា ការចាក់ខ្សាច់លុបកន្លែងទឹកដក់តាមឆ្នេរអូរឈើទាលនេះ គឺដើម្បីលុបបំបាត់កន្លែងកខ្វក់ដែលអាចប៉ះពាល់បរិស្ថាន និងខូចសោភណភាពឆ្នេរ។ ជាមួយគ្នានោះក៏មានការចាក់ដីធ្វើផ្លូវផងដែរដើម្បីភាពងាយស្រួលដល់ភ្ញៀវទេសចរដើរកម្សាន្ត។
លោកបានបញ្ជាក់ថា៖ «ការចាក់ខ្សាច់លុបកន្លែងដក់ទឹកកន្លែងកខ្វក់ គគ្រេចផ្សេងៗហ្នឹងអាចថាគេលុបធម្មតាទេ ដើម្បីកែលម្អឆ្នេរឱ្យស្អាត ប៉ុន្តែវាមាននៅចុងឆ្នេរអូរឈើទាលនោះមួយទៀត ដែលកំពុងចាក់ដែរអាហ្នឹង គេចាក់ដីដើម្បីធ្វើផ្លូវប្របមាត់សមុទ្ររហូតជាប់នៅតំបន់ដែលវាដាច់ដើម្បីភ្ជាប់ឱ្យមានផ្លូវតាមមាត់សមុទ្ររហូតអាហ្នឹងគឺនៅកន្លែងដែលគេតែងហៅថាពយ ៣៩»។
តាមការផ្សាយរបស់ក្រសួងសាធារណការ និងដឹកជញ្ជូនកាលពីថ្ងៃទី ២៥ ខែ មករា ឆ្នាំ ២០២១ បានឱ្យដឹងថា ខេត្តព្រះសីហនុគ្រោងសាងសង់ផ្លូវថ្មីភ្ជាប់ចរាចរណ៍ពីឆ្នេរសុខាទៅឆ្នេរអូរឈើទាល ប្របតាមឆ្នេរពយថ្មពយតាមុយមានប្រវែង ១ ០៣៤ ម៉ែត្រ និងទទឹង ១០,២៤ ម៉ែត្រដែលជាគម្រោងរបស់គណៈកម្មាធិការគ្រប់គ្រង និងអភិវឌ្ឍន៍តំបន់ឆ្នេរសមុទ្រកម្ពុជា។
លោក សុចិត្រគ្រឹស្នា ថ្លែងថា ការសាងសង់ផ្លូវថ្មីនេះនឹងក្លាយជាសមិទ្ធផលថ្មីនៃប្រវត្តិសាស្ត្ររបស់ខេត្តព្រះសីហនុ។ ក្រៅពីបង្កើនសោភណភាពក្នុងទីក្រុងដែលជាតំបន់ទេសចរណ៍ឆ្នេរលំដាប់ខ្ពស់ប្រចាំប្រទេសគឺផ្លូវនេះបានបង្កភាពងាយស្រួលដល់ភ្ញៀវទេសចរជាតិ និងអន្តរជាតិដោយមិនបាច់ចំណាយពេលធ្វើដំណើរតាមផ្លូវវាងពីឆ្នេរសុខាទៅកាន់ឆ្នេរអូរឈើទាលដូចមុនទៀត ពោលគឺអាចធ្វើដំណើរតភ្ជាប់រវាងឆ្នេរទាំង ២ ស្របតាមឆ្នេរសមុទ្រដ៏ស្រស់ស្អាតតែម្ដង៕