មណ្ឌលគិរីៈ ក្រោយពីមានការអះអាងថា ដីនៅលើភ្នំដោះក្រមុំត្រូវបានគេបន្តរំលោភយកជាកម្មសិទ្ធិផ្ទាល់ខ្លួន អាជ្ញាធរបញ្ជាក់ពីម្សិលមិញថា សកម្មភាពទន្រ្ទានយកដីលើភ្នំដោះក្រមុំពីសំណាក់ប្រជាពលរដ្ឋនោះត្រូវបានចាត់វិធានការបញ្ចប់រួចរាល់ហើយ។
អភិបាលក្រុងសែនមនោរម្យ លោក ឡុង វិបុល បញ្ជាក់ថា អ្នកបោះបង្គោលរំលោភលើដីរបស់មជ្ឈមណ្ឌលវប្បធម៌ជនជាតិដើមភាគតិចនោះ គឺជាពលរដ្ឋដែលរស់នៅក្បែរភ្នំដោះក្រមុំ ហើយអាជ្ញាធរបានឱ្យពលរដ្ឋម្នាក់នោះរុះរើចេញវិញហើយ។
លោកបន្ថែមថា៖ «តាមពិតគាត់ជាប្រជាពលរដ្ឋរស់នៅទីតាំងហ្នឹង ហើយគាត់ក៏ចេះតែបោះ បង្គោលឡើងទៅលើទៅ អ៊ីចឹងវារំលោភក្នុងដែនគ្រប់គ្រងរបស់មន្ទីរវប្បធម៌ដែលគេចុច GPS ទុកហើយ ហើយម្សិលមិញនេះ ខ្ញុំបានចុះទៅ ហើយអារបងគាត់ព័ទ្ធជុំវិញ គាត់បានរុះសំណាញ់ (ដែក) ហើយ»។
លោក គ្រើង តុលា លេខាធិការនៃគណៈកម្មាធិការមជ្ឈមណ្ឌលវប្បធម៌ជនជាតិដើមភាគតិចភ្នំដោះក្រមុំ ប្រាប់ភ្នំពេញប៉ុស្ដិ៍ ម្សិលមិញថា កាលពីថ្ងៃទី ៤ ខែ ឧសភា នេះ លោកត្រូវបានអភិបាលខេត្តមណ្ឌលគិរី លោក ស្វាយ សំអ៊ាង ហៅទៅព្រមានចាប់វ៉ៃខ្នោះ បន្ទាប់ពីលោកសរសេររិះគន់តាមហ្វេសប៊ុកនៅថ្ងៃទី ២ ខែ ឧសភា ថាមានអ្នកលួចបោះបង្គោលរំលោភយកដីលើភ្នំដោះក្រមុំធ្វើជាកម្មសិទ្ធិឯកជន។ ការរិះគន់បែបនេះ ត្រូវលោក ស្វាយ សំអ៊ាង យល់ ថាជាការសរសេរមិនពិត និងមានលក្ខណៈវាយប្រហារ។
លោក តុលា បន្តថា ក្រោយការព្រមាន ១ ថ្ងៃ គឺនៅថ្ងៃទី ៥ ខែ ឧសភា នៅពេលមានមន្ត្រីខេត្តមួយចំនួនចុះទៅពិនិត្យផ្ទាល់ដល់ភ្នំដោះក្រមុំ ក៏បានធ្វើឱ្យលោក ស្វាយ សំអ៊ាង ទទួលស្គាល់វិញថា ពិតជាមានការបោះបង្គោលរំលោភដីលើភ្នំដោះក្រមុំមែន ប៉ុន្តែលោកបានបញ្ជាឲ្យរុះរើការបោះបង្គោលនោះចោលវិញដែរ។
លោកបញ្ជាក់ថា៖ «ខ្ញុំបានរាយការណ៍ទៅ គាត់អត់ចាប់អារម្មណ៍ទេ ខ្ញុំរាយការណ៍តាំងពីថ្ងៃទី ១១-១២ ខែ ៤ (មេសា) រហូតដល់ខែ ៥ (ឧសភា) នេះបានខ្ញុំរិះគន់ អ៊ីចឹងនៅយប់ថ្ងៃ ៤ ឯកឧត្តមគាត់បានគំរាមខ្ញុំ។ គាត់ថានឹងបញ្ជាកងកម្លាំងឱ្យមកចាប់ខ្ញុំ តែខ្ញុំថារឿងចាប់ខ្ញុំ ជារឿងធម្មតាទេ ប៉ុន្តែសំខាន់ឱ្យតែឯកឧត្តមដោះស្រាយបញ្ហានេះ ខ្ញុំលែងរិះគន់ឯកឧត្តមហើយ»។
លោក គ្រើង តុលា អះអាងថា ដីលើភ្នំដោះក្រមុំ ដែលគេបោះបង្គោលឈើរំលោភយកថ្មីៗនេះ គឺមានទំហំប្រហែលជាងកន្លះហិកតា និងស្ថិតនៅក្បែរកំពូលភ្នំតែម្ដង ហើយជនដែលរំលោភ គឺជាអ្នកមានលុយ និងជាមន្ត្រីរាជការ ដែលស្គាល់គ្នាស្និទ្ធស្នាលជាមួយមន្ត្រីមានឋានៈខ្ពង់ខ្ពស់នៅក្នុងខេត្តមណ្ឌលគិរី ប៉ុន្តែលោកមិនស្គាល់ឈ្មោះឡើយ។
ជុំវិញបញ្ហានេះ ភ្នំពេញប៉ុស្ដិ៍មិនអាចទាក់ទងសុំការបំភ្លឺពីលោក ស្វាយ សំអ៊ាង អភិបាលខេត្តមណ្ឌលគិរីបានទេ ដោយសារលោកមិនលើកទូរស័ព្ទ រីឯលោក សុក សេរ៉ា មន្ត្រីនាំពាក្យខេត្តបានប្រាប់ថាកំពុងព្យាបាលជំងឺក្នុងមន្ទីរពេទ្យនៅរាជធានីភ្នំពេញ ដូច្នោះលោកមិនអាចអត្ថាធិប្បាយបានទេ។
ភ្នំដោះក្រមុំស្ថិតក្នុងក្រុងសែនមនោរម្យ ខេត្តមណ្ឌលគិរី ត្រូវបានរដ្ឋាភិបាល ចេញ ស.ជ.ណ កាលពីឆ្នាំ ២០០៤ ដើម្បីកំណត់ជាមជ្ឈមណ្ឌលវប្បធម៌ជនជាតិដើម នៅលើទំហំផ្ទៃដីសរុបចំនួន ១០២ ហិកតា ដែលក្រុមសហគមន៍ជនជាតិដើមបញ្ជាក់ថា លាតសន្ធឹងចាប់ពីជើងភ្នំ ចង្កេះភ្នំ និងដល់កំពូលភ្នំ។
ប៉ុន្តែក្រោយៗមក ភ្នំនេះត្រូវគេចូលទៅទន្ទ្រានយកធ្វើជាកម្មសិទ្ធិឯកជន ដោយមានពលរដ្ឋខ្លះសាងសង់ជាផ្ទះនៅនិងខ្លះទៀតបើកជាកន្លែងច្រៀងខារ៉ាអូខេជាដើម រហូតធ្វើឱ្យដីរបស់មជ្ឈមណ្ឌលវប្បធម៌ជនជាតិដើមនៅពេលបច្ចុប្បន្ន កាន់តែរួមតូចជាងមុន។
កាលពីថ្ងៃទី ២៨ ខែ កុម្ភៈ លោកនាយករដ្ឋមន្ត្រី ហ៊ុន សែន បានបញ្ជាឱ្យអភិបាលខេត្តមណ្ឌលគិរី ត្រូវដកហូតយកដីលើភ្នំដោះក្រមុំមកគ្រប់គ្រងជាសម្បត្តិរួមវិញ ដោយមិនត្រូវខ្លាចអ្នកមានបុណ្យស័ក្តិណាម្នាក់ឡើយ។ ប៉ុន្តែមកដល់ពេលនេះ ការបញ្ជារបស់លោកហ៊ុន សែន ហាក់មិនត្រូវបានអនុវត្តចេញជារូបរាងនៅឡើយទេ។
លោក អ៊ាង ម៉េងលី មន្ត្រីសម្របសម្រួលសមាគមការពារសិទ្ធិមនុស្ស (អាដហុក) ប្រចាំខេត្តមណ្ឌលគិរី ថ្លែងថា អាជ្ញាធរខេត្តគួរពន្លឿនការដោះស្រាយបញ្ហាដីធ្លីនៅលើភ្នំដោះក្រមុំឱ្យបានឆាប់តាមការបញ្ជាពីនាយករដ្ឋមន្ត្រី ដើម្បីឱ្យពលរដ្ឋជាសហគមន៍ជាជនជាតិដើមភាគ តិចមានទំនុកចិត្ត ព្រោះលោកថា មកដល់ពេលនេះ ដំណើរការដោះស្រាយពុំទាន់ចេញជាលទ្ធផលអ្វីនៅឡើយទេ។
លោក ម៉េងលី និយាយថា៖ «អត់ទាន់ដឹងថា តើអាជ្ញាធរខេត្ត គាត់ដោះស្រាយចេញលទ្ធផលជាឯកសារ ដើម្បីឱ្យសាធារណជនបានដឹងបានឃើញថា អូខេ ដី ១០០ ឬ ១០៥ ហិកតា អ៊ីចឹងណា៎ ជាដីភ្នំដោះក្រមុំជាដីរបស់រដ្ឋ ដែលគេត្រៀមចុះបញ្ជីដាក់ជាបេតិកភណ្ឌពិភពលោក»៕